ഒളിമ്പിക് മെഡൽ സ്വപ്നവുമായി 'ഓപ്പറേഷൻ ഒളിമ്പ്യ' എന്ന വിദഗ്ധ പരിശീലന പരിപാടിക്ക് സംസ്ഥാനത്ത് തുടക്കമായി. മുഖ്യമന്ത്രി പിണറായി വിജയന്‍ ഫേസ്ബുക്കിലാണ് ഇക്കാര്യം പങ്കുവെച്ചത്. ഇന്ത്യയിലെയും വിദേശത്തെയും പ്രഗത്ഭരായ പരിശീലകരുടെ സേവനം കൂടി ലഭ്യമാക്കി കായിക താരങ്ങളെ അന്തർദേശീയ മത്സരങ്ങൾക്ക് സജ്ജമാക്കുകയാണ് ലക്ഷ്യമെന്ന് മുഖ്യമന്ത്രി ഫേസ്ബുക്കില്‍ കുറിച്ചു

നിലവില്‍ റസ്ലിംഗ്, സൈക്ളിംഗ്, സ്വിമ്മിംഗ്, ബോക്സിംഗ് എന്നീ ഇനങ്ങളിലെ പരിശീലനം തിരുവനന്തപുരം ജില്ലയിലെ വിവിധ സ്റ്റേഡിയങ്ങളിലായി നടന്നു വരുന്നു. കനോയിംഗ്‌ - കയാക്കിംഗ് പരിശീലനം കൊല്ലത്തും, ബാഡ്മിന്‍റണ്‍ എറണാകുളത്തും ഫെന്‍സിംഗ് കണ്ണൂരിലും റോവിംഗ് പരിശീലനം ആലപ്പുഴയിലുമാണ് പുരോഗമിക്കുന്നത്. 123 കായിക താരങ്ങൾക്ക് നിലവിൽ പരിശീലനം നൽകുന്നുണ്ട്. ദീർഘകാല പരിശീലനത്തിലൂടെ കേരളത്തിന്റെ കായിക ഭാവി ഭദ്രമാക്കാനാണ് സർക്കാരിന്‍റെ ശ്രമമെന്നും മുഖ്യമന്ത്രി വ്യക്തമാക്കുന്നു.

മുഖ്യമന്ത്രിയുടെ ഫേസ്ബുക്ക് പോസ്റ്റ്......

ഒരു ഒളിമ്പിക്സ് മെഡൽ, അതാണ് വളർന്നു വരുന്ന ഓരോ കായിക താരവും സ്വപ്നം കാണുന്നത്. ഒളിമ്പിക്സ് ദിനങ്ങളിൽ കായിക കേരളം ചർച്ച ചെയ്യുന്ന മെഡൽ സ്വപ്നങ്ങളിലക്ക് കായിക താരങ്ങളെ സജ്ജമാക്കാൻ തയ്യാറെടുക്കുകയാണ് കായിക വകുപ്പും സ്പോർട്സ് കൗൺസിലും. 'ഓപ്പറേഷൻ ഒളിമ്പ്യ' എന്ന വിദഗ്ധ പരിശീലന പരിപാടിക്ക് സംസ്ഥാനത്ത് തുടക്കമായി. ഇന്ത്യയിലെയും വിദേശത്തെയും പ്രഗത്ഭരായ പരിശീലകരുടെ സേവനം കൂടി ലഭ്യമാക്കി കായിക താരങ്ങളെ അന്തർദേശീയ മത്സരങ്ങൾക്ക് സജ്ജമാക്കുകയാണ് ലക്ഷ്യം.

അത് ലറ്റിക്സ്, ബോക്സിംഗ്, സൈക്ളിംഗ്, സ്വിമ്മിംഗ്, ഷൂട്ടിംഗ്, റസ്ലിംഗ്, ബാഡ്മിന്‍റണ്‍, കനോയിംഗ് കയാക്കിംഗ്, ഫെന്‍സിംഗ്, റോവിംഗ്, ആര്‍ച്ചറി എന്നീ 11 കായിക ഇനങ്ങളിലെ തിരഞ്ഞെടുക്കപ്പെട്ട കായിക താരങ്ങള്‍ക്ക് അന്തര്‍ദേശീയ നിലവാരത്തിലുളള സജ്ജീകരണങ്ങളോടു കൂടിയുള്ള വിദഗ്ധ പരിശീലനമാണ് പദ്ധതിയിൽ ഉൾപ്പെടുത്തിയിരിക്കുന്നത്.

നിലവില്‍ റസ്ലിംഗ്, സൈക്ളിംഗ്, സ്വിമ്മിംഗ്, ബോക്സിംഗ് എന്നീ ഇനങ്ങളിലെ പരിശീലനം തിരുവനന്തപുരം ജില്ലയിലെ വിവിധ സ്റ്റേഡിയങ്ങളിലായി നടന്നു വരുന്നു. കനോയിംഗ്‌ - കയാക്കിംഗ് പരിശീലനം കൊല്ലത്തും , ബാഡ്മിന്‍റണ്‍ എറണാകുളത്തും ഫെന്‍സിംഗ് കണ്ണൂരിലും റോവിംഗ് പരിശീലനം ആലപ്പുഴയിലുമാണ് പുരോഗമിക്കുന്നത്. 123 കായിക താരങ്ങൾക്ക് നിലവിൽ പരിശീലനം നൽകുന്നുണ്ട്. ദീർഘകാല പരിശീലനത്തിലൂടെ കേരളത്തിന്റെ കായിക ഭാവി ഭദ്രമാക്കാനാണ് സർക്കാരിന്റെ ശ്രമം.