കേരള സർക്കാർ നാഷണൽ ആയുഷ് മിഷൻ ഫെബ്രുവരി 15 മുതൽ 18 വരെ തിരുവനന്തപുരം കനകക്കുന്നിൽ വച്ചു നടത്തുന്ന പ്രഥമ ഇന്റർനാഷണൽ ആയുഷ് കോൺക്ലേവിനോടനുബന്ധിച്ച് ഷോർട്ട് ഫിലിം മത്സരം സംഘടിപ്പിക്കുന്നു. ആയുഷ് ചികിത്സാ ശാസ്ത്രങ്ങളെ മുൻനിർത്തിയുളള മത്സരത്തിൽ വ്യക്തികൾക്കോ സ്ഥാപനങ്ങൾക്കോ സംഘടനകൾക്കോ മത്സരിക്കാവുന്നതാണ്.

ആയുഷ് ചികിത്സാ ശാസ്ത്രങ്ങളായ ആയുർവേദം, യോഗ - നാച്ചുറോപ്പതി, യുനാനി, സിദ്ധ, ഹോമിയോപ്പതി വിഭാഗങ്ങളിലെ പൊതുജനാരോഗ്യ സംബന്ധമായ ഏതു വിഷയവും പ്രമേയമാക്കാവുന്നതാണ്. എച്ച് ഡി ക്വാളിറ്റിയുളള മൊബൈൽ ക്യാമറ ഉപയോഗിച്ചും ചിത്രീകരണം നടത്താം. 6 മുതൽ 12 വരെ മിനിറ്റ് ദൈർഘ്യമുണ്ടായിരിക്കണം. തയ്യാറാക്കിയ ഷോർട്ട് ഫിലിം ടീമംഗങ്ങളുടെ പേരുവിവരം ഉൾപ്പെടെ ഫെബ്രുവരി 10ന് മുൻപ് മീഡിയ കമ്മിറ്റി ഓഫിസ്, ഇൻറർനാഷണൽ ആയുഷ് കോൺക്ലേവ്, ആരോഗ്യ ഭവൻ, തിരുവനന്തപുരം എന്ന വിലാസത്തിൽ എത്തിക്കേണ്ടതാണ്. ഷോർട്ട് ഫിലിമുകൾ പെൻ ഡ്രൈവിലോ ഡി വി ഡി യിലോ ഓൺ ലൈൻ ലിങ്ക് ആയോ മലയാളത്തിലും ഇംഗ്ലീഷിലും സമർപ്പിക്കാവുന്നതാണ്.

25000 രൂപ, 15000 രൂപ, 10000 രൂപ എന്നിങ്ങനെ യഥാക്രമം ഒന്നും രണ്ടും മൂന്നും സമ്മാനം ഉണ്ടായിരിക്കുന്നതാണ്. കൂടുതൽ വിവരങ്ങൾക്ക് 9747597140 എന്ന ഫോൺ നമ്പറിൽ ബന്ധപ്പെടുക.സോഷ്യൽ മീഡിയ/ ഓൺലൈൻ മാധ്യമങ്ങളിൽ മുൻപ്‌ പ്രസിദ്ധീകരിച്ച രചനകൾ സ്വീകരിക്കുന്നതല്ല.

അതേസമയം ഇൻറർനാഷണൽ ആയുഷ് കോൺക്ലേവിന്റെ പ്രചരാണാർത്ഥം ടിക്ടോക് വീഡിയോ മത്സരവും സംഘടിപ്പിക്കുന്നു. അഡിക്ഷൻസ് എന്ന വിഷയത്തിലാണ് മത്സരാർത്ഥികൾ വീഡിയോ ചെയ്യേണ്ടത്. ആയുഷിന് കീഴിലുള്ള വിദ്യാർത്ഥികൾക്കും അദ്ധ്യാപകർക്കും മറ്റു വ്യക്തികൾക്കും സംഘടനകൾക്കും മത്സരത്തിൽ പങ്കെടുക്കാം. വിജയികളാകുന്നവർക്ക് ആകർഷകമായ ഒന്നും രണ്ടും സമ്മാനങ്ങൾക്ക് പുറമെ പ്രശസ്ത സിനിമാ താരത്തിന്റെ കൂടെ ടിക് ടോക് വീഡിയോ ചെയ്യാനുള്ള അവസരവും ഉണ്ടായിരിക്കുന്നതാണ്. മത്സരത്തിനായി അയക്കുന്ന വീഡിയോ ഐ. എ.സി യുടെ ഒഫീഷ്യൽ ഫേസ്ബുക്ക് പേജിൽ പോസ്റ്റ് ചെയ്യുന്നതായിരിക്കും.

ഓരോ വീഡിയോസിനും കിട്ടുന്ന ലൈക്കുകളുടെ എണ്ണം കൂടി പരിഗണിച്ചാവും വിജയികളെ തീരുമാനിക്കുക. ഫേസ് ബുക്ക് ഷെയറുകളുടെ എണ്ണം പരിഗണിക്കില്ല. നേരത്തെ നിലനിൽക്കുന്ന സിനിമാ രംഗങ്ങൾ ഉപയോഗിക്കുവാൻ പാടുള്ളതല്ല. വീഡിയോയുടെ ദൈർഘ്യം 45 സെക്കൻറ് മുതൽ രണ്ട് മിനുട്ട് വരെ ആകാം. സിംഗിൾ ആയോ ഗ്രൂപ്പ് ആയോ വീഡിയോ ചെയ്യാം. ഒരാൾ ഒന്നിലധികം വീഡിയോ ചെയ്യാൻ പാടുള്ളതല്ല. വീഡിയോ മലയാളത്തിലാണ് ചെയ്യേണ്ടത്. വീഡിയോക്ക് പശ്ചാത്തല സംഗീതം ഉപയോഗിക്കാവുന്നതാണ്. എന്നാൽ സിനിമാരംഗങ്ങൾക്ക് ലിപ് കൊടുക്കുന്ന തരത്തിലുള്ള വീഡിയോ പാടില്ല. വീഡിയോ 9946361472 എന്ന നമ്പറിലേക്കോ iackerala2018@gmail.com എന്ന മെയിലിലേക്കോ സെന്റ് ചെയ്യുക. വീഡിയോ ലഭിക്കേണ്ട അവസാന തിയ്യതി ഫെബ്രുവരി ഏഴ് ആയിരിക്കും.