അവിവാഹിതയായ കണ്ണൂര്‍ സദേശിനിയെ പീഡിപ്പിച്ച കേസില്‍ അഭിഭാഷകനെ അറസ്റ്റ് ചെയ്തു. ആലുവ പൈപ്പ്‌െലെന്‍ റോഡില്‍ എസ്.എന്‍. പുരത്ത് കോഴിക്കാട്ടില്‍ വീട്ടില്‍ ധനീഷിനെയാണ് നോര്‍ത്ത് ഇന്‍സ്‌പെക്ടര്‍ കെ.ജെ. പീറ്ററിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. സഹായ വാഗ്ദാനം നല്‍കിയായിരുന്നു പെണ്‍കുട്ടിയെ അഭിഭാഷകന്‍ പീഡനത്തിനിരയാക്കിയത്. എസ്.ആര്‍.എം. റോഡിലെ ഫഌറ്റില്‍ പീഡിപ്പിച്ചശേഷം വിവരം മറ്റുള്ളവരെ അറിയിക്കുമെന്നു ഭയപ്പെടുത്തി വര്‍ഷങ്ങളോളം ഇംഗിതത്തിനു വിധേയയാക്കി.

ആലുവ ഭാഗത്തു താമസിച്ചുവന്ന സമയത്താണ് പെണ്‍കുട്ടിയുടെ കുടുംബം പ്രതിയുമായി പരിചയത്തിലായത്. രാഷ്ട്രീയ പ്രവര്‍ത്തകനായ പ്രതി, തന്റെ സ്വാധീനം ഉപയോഗിച്ചു സര്‍ക്കാര്‍തലത്തിലുള്ള കാര്യങ്ങള്‍ എളുപ്പത്തില്‍ നടത്തിക്കൊടുക്കാമെന്നു വാഗ്ദാനം ചെയ്തു കുടുംബാംഗങ്ങളെ െകെയിലെടുക്കുകയായിരുന്നു. പെണ്‍കുട്ടിയുടെ വീട്ടില്‍ വന്നുപോവുന്നതു ശ്രദ്ധയില്‍പ്പെട്ട നാട്ടുകാര്‍ ഇയാളെ തടഞ്ഞുവച്ചു പോലീസില്‍ അറിയിച്ചെങ്കിലും വീട്ടുകാരെ ഭീഷണിപ്പെടുത്തി തനിക്കനുകൂലമായി പറയിപ്പിക്കുകയായിരുന്നു.


പ്രളയസമയത്ത് രക്ഷകനായെത്തിയശേഷം വീട്ടുകാരെ വരാപ്പുഴയിലെ ഹോട്ടലില്‍കൊണ്ടുപോയി താമസിപ്പിച്ച പ്രതി, ഹോട്ടല്‍ ബില്‍ അടയ്ക്കാതെ മുങ്ങി. ഈ സമയത്താണ് പ്രതിയുടെ അവിശുദ്ധബന്ധങ്ങള്‍ വീട്ടുകാര്‍ അറിഞ്ഞത്. തുടര്‍ന്നാണ് പെണ്‍കുട്ടി പരാതിയുമായി പോലീസിനെ സമീപിച്ചത്. കേസ് സംബന്ധമായ കാര്യങ്ങള്‍ക്കാണെന്നും മറ്റും പറഞ്ഞ് അയാളുടെ വനിത സുഹൃത്തിന്റെ എസ്.ആര്‍.എം റോഡിലെ ഫ്‌ലാറ്റില്‍ കയറ്റിയാണ് ബലപ്രയോഗത്തിലൂടെ കുട്ടിയെ കീഴടക്കിയതെന്ന് പൊലീസ് പറഞ്ഞു. അപമാനം മൂലവും ഭീഷണി മൂലവും സംഭവത്തെപ്പറ്റി ആരോടും പറയാതിരുന്ന പെണ്‍കുട്ടിയെ പ്രതി നിരന്തരം ലൈംഗികമായി ചൂഷണം ചെയ്തുവരുകയായിരുന്നു.

പ്രതി പെണ്‍കുട്ടിയുടെ മാതാവിന്റെ പക്കല്‍നിന്ന് 28 ലക്ഷത്തോളം രൂപ വിവിധ ആവശ്യങ്ങള്‍ പറഞ്ഞ് കൈക്കലാക്കിയിട്ടുണ്ട്. പ്രതി ഉപയോഗിച്ചുവരുന്ന ബലേനോ കാറും ബുള്ളറ്റ് മോട്ടോര്‍ സൈക്കിളും പെണ്‍കുട്ടിയുടെ മാതാവിന്റെ പണം ഉപയോഗിച്ച് വാങ്ങിയതാണെന്ന് പരാതിക്കാരി ആരോപിക്കുന്നു.പെണ്‍കുട്ടി പരാതി കൊടുത്തതറിഞ്ഞ പ്രതി മൊബൈല്‍ ഫോണ്‍ സ്വിച് ഓഫ് ചെയ്ത് ഒളിവില്‍ പോയി. കോടതിവഴി മുന്‍കൂര്‍ ജാമ്യത്തിന് ശ്രമിക്കുന്നതിനിടെയാണ് പ്രതിയെ സൈബര്‍ സെല്ലിന്റെ സഹായത്തോടെ അറസ്റ്റ് ചെയ്തത്.