സമാധാനപരമായ തിരുവനന്തപുരത്തെ നെടുമങ്ങാട്ട് ബോംബ് സ്‌ഫോടനം നടന്നത് പ്രദേശവാസികളെ നടുക്കിയിരുന്നു. ശബരിമല യുവതി പ്രവേശനത്തില്‍ പ്രതിഷേധിച്ച് ബി.ജെ.പി ആഹ്വാനം ചെയ്ത ഹര്‍ത്താലിനിടെയാണ് സംഭവമുണ്ടായത്. തുടര്‍ന്ന് നെടുമങ്ങാട് പോലീസ് സ്‌റ്റേഷനിലേക്ക് ബോംബെറിയുകയും ചെയ്തു. ആ കേസിലെ പ്രതിയെ പിടികൂടാന്‍ നടത്തിയ ശ്രമങ്ങളെല്ലാം പരാജയപ്പെടുകയായിരുന്നു.

ആ കേസിലെ മുഖ്യപ്രതിയെ പോലീസ് അറസ്റ്റ് ചെയ്തു. ആര്‍.എസ്.എസ് ജില്ലാ പ്രചാരക് പ്രവീണ്‍ ആണ് അറസ്റ്റിലായത്. നെടുമങ്ങാട് ഡി.വൈ.എസ്.പിയുടെ നേതൃത്വത്തിലുള്ള സംഘം തമ്പാനൂരില്‍ നിന്നാണ് പ്രവീണിനെ പിടികൂടിയത്.

ബോംബേറിനു ശേഷം ഒളിവില്‍ പോയ ഇയാള്‍ തിരുവനന്തപുരത്ത് എത്തിയതായി പോലീസിന് രഹസ്യവിവരം ലഭിച്ചിരുന്നു. ബോംബെറ് നടന്ന ഒരു മാസം തികയുന്ന ദിവസമാണ് അറസ്റ്റ് നടന്നിരിക്കുന്നത്. സിസിടിവി ദൃശ്യങ്ങളുടെ അടിസ്ഥാനത്തിലാണ് അറസ്റ്റ്.

പ്രവീണ്‍ തിരുവനന്തപുരത്തുണ്ടെന്ന രഹസ്യ വിവരത്തെ തുടര്‍ന്ന് അന്വേഷണ സംഘം രാവിലെ മുതല്‍ തമ്പാനൂര്‍ ഭാഗത്ത് സിവില്‍ ഡ്രസിലും മറ്റും തമ്പടിച്ചിരുന്നു. തുടര്‍ന്നാണ് റെയില്‍വേ സ്റ്റേഷനില്‍ പ്രവീണ്‍ എത്തിയതും പോലീസ് പിടികൂടുകയും ചെയ്തത്.

ആര്‍.എസ്.എസ് നെടുമങ്ങാട് ജില്ലാ പ്രചാരക് ആയ പ്രവീണ്‍ നൂറനാട് സ്വദേശിയാണ്. ഇയാള്‍ മുന്‍പ് ഒരു വധശ്രമക്കേസില്‍ പ്രതിയാണ്. വ്യാപാരിയെ കൊലപ്പെടുത്താന്‍ ശ്രമിച്ച കേസില്‍ പ്രതിയാണെങ്കിലും ഇതുവരെ പിടിയിലായിട്ടില്ല. പോലീസ് സ്‌റ്റേഷനു നേര്‍ക്ക് ബോംബെറിയുന്ന സിസിടിവി ദൃശ്യം പുറത്തുവന്നിരുന്നു.

ജനുവരി മൂന്നിന് ഹര്‍ത്താല്‍ ദിനം നെടുമങ്ങാട് തുറന്നുപ്രവര്‍ത്തിച്ച ഒരു സ്വകാര്യ ബാങ്ക് ആര്‍.എസ്.എസ്ബി.ജെ.പി പ്രവര്‍ത്തകര്‍ അടപ്പിച്ചിരുന്നു. ഇതുമായി ബന്ധപ്പെട്ട സംഘര്‍ഷത്തിനിടെ സ്ഥലത്തെത്തിയ നെടുമങ്ങാട് എസ്.ഐയുടെ നേതൃത്വത്തിലുള്ള പോലീസ് സംഘം ഏതാനും ആര്‍.എസ്.എസ്ബി.ജെ.പി പ്രവര്‍ത്തകരെ കസ്റ്റഡിയിലെടുത്ത് സ്‌റ്റേഷനില്‍ കൊണ്ടുവന്നിരുന്നു.

ഇതോടെ ആര്‍.എസ്.എസ്ബി.ജെ.പി പ്രവര്‍ത്തകരും സി.പി.എം പ്രവര്‍ത്തകരും സ്‌റ്റേഷനു മുന്നില്‍ തടിച്ചുകൂടി. റോഡില്‍ നിന്നാണ് ഈ സമയം നാലു ബോംബുകള്‍ സ്‌റ്റേഷനു നേര്‍ക്ക് അജ്ഞാതര്‍ എറിഞ്ഞത്. ആക്രമണത്തിനു പിന്നില്‍ സി.പി.എം ആണെന്നും ബി.ജെ.പി ആണെന്നും ഇരുകൂട്ടരും പരസ്പരം ആരോപിച്ചിരുന്നു. അന്നേ ദിവസം തന്നെ സി.പി.എം പ്രകടനത്തിന് നേര്‍ക്ക് രണ്ട് ബോംബുകള്‍ എറിഞ്ഞിരുന്നു.