മഴക്കാലത്ത് കരിമണല്‍ ഖനനം ഒഴിവാക്കുന്നതിനുള്ള നടപടികളിലേക്ക് സര്‍ക്കാര്‍ കടക്കുകയാണെന്ന് മുഖ്യമന്ത്രി പിണറായി വിജയന്‍ പറഞ്ഞു. നിയമസഭാ സമിതിയുടെ റിപ്പോര്‍ട്ടിന്റെ അടിസ്ഥാനത്തിലാണ് സര്‍ക്കാര്‍ തീരുമാനം. തീരം സംരക്ഷിച്ച് ഖനനം മുന്നോട്ടുകൊണ്ടുപോകാനാണ് സര്‍ക്കാര്‍ ആലോചിക്കുന്നതെന്ന് മുഖ്യമന്ത്രി നിയമസഭയില്‍ പറഞ്ഞു.

ആലപ്പാട്ട് ഖനന വിരുദ്ധ സമരത്തിന്റെ പശ്ചാത്തലത്തില്‍ പി.സി ജോര്‍ജാണ് കരിമണല്‍ ഖനനത്തിന് നിയന്ത്രണം കൊണ്ടു വരുന്നത് സംബന്ധിച്ച് നിയമസഭയില്‍ ചോദ്യമുന്നയിച്ചത്. കരിമണല്‍ ഖനന മേഖലയില്‍ പ്രതിഷേധങ്ങള്‍ക്ക് കാരണം കരയെടുത്ത് പോകുന്നതാണ്. ഇത് പരിഹരിക്കാന്‍ നടപടി വേണമെന്ന് പി.സി ജോര്‍ജ് ആവശ്യപ്പെട്ടു. മഴക്കാലത്ത് ഖനനം നടത്തുന്നതാണ് കടലാക്രമണം വര്‍ദ്ധിക്കാനും കര എടുക്കാനും കാരണമെന്ന് നിയമസഭ സമിതി റിപ്പോര്‍ട്ട് നല്‍കിയിട്ടുണ്ടെന്ന് മുഖ്യമന്ത്രി സൂചിപ്പിച്ചു. അതുകൊണ്ടുതന്നെ മഴക്കാലത്തെ ഖനനം നിര്‍ത്താനുള്ള നടപടികളിലേക്കാണ് സര്‍ക്കാര്‍ പോകുന്നതെന്നും മുഖ്യമന്ത്രി പറഞ്ഞു.

മഴക്കാലത്ത് ഖനനം നിര്‍ത്തുന്നതിനുള്ള വ്യവസ്ഥകള്‍ കൊണ്ടുവരും. ഖനനം നടത്തുന്നവര്‍ക്ക് അത് പാലിക്കല്‍ നിര്‍ബന്ധമാക്കുന്ന രീതിയില്‍ സര്‍ക്കാര്‍ വ്യവസ്ഥകള്‍ ശക്തമാക്കുമെന്നും മുഖ്യമന്ത്രി പറഞ്ഞു. കരിമണല്‍ ഖനനം തുടരുമെന്ന് വ്യക്തമാക്കിയ മുഖ്യമന്ത്രി അതേസമയം കരയെടുത്തു പോകുന്നതിന് കാരണമാകുന്ന മഴക്കാലത്തെ ഖനനം നിര്‍ത്തി വയ്ക്കുമെന്നാണ് നിയമസഭയില്‍ പറഞ്ഞത്.