പിണറായി സര്ക്കാര് പരസ്യത്തിനായി പൊടിച്ചത് കോടികൾ..ഞെട്ടിക്കുന്ന കണക്കുകൾ..ഖജനാവില് നിന്ന് ചെലവാക്കിയത് 173 കോടിയിലേറെ രൂപ..റീല് വീഡിയോകള്ക്കായി മാത്രം 37,34,800 രൂപ..
സര്ക്കാരുകള് അവരുടെ ഭരണ നേട്ടങ്ങള് പ്രചരിപ്പിക്കാന് പരസ്യം നല്കുന്നത് പണ്ട് മുതലേയുള്ള പതിവാണ്. സമൂഹ മാധ്യമങ്ങളും റീലുകളുമെല്ലാം കളം പിടിച്ചതോടെ സര്ക്കാരും പ്രചാരണം ആ വഴിക്ക് നീങ്ങി. പിണറായി സര്ക്കാര് പരസ്യത്തിനായി കോടികള് പൊടിക്കുന്നൂവെന്ന ആക്ഷേപം അന്ന് പ്രതിപക്ഷമായിരുന്ന യു.ഡി.എഫ് ഉന്നയിച്ചിരുന്നു. ആ ആരോപണം ശരിയാണോ? എത്ര രൂപയാണ് പിണറായി സര്ക്കാര് ജനങ്ങള്ക്ക് മുന്നില് മുഖം നന്നാക്കാന് വേണ്ടി പൊടിച്ചത് എന്നറിയണോ?
ജനങ്ങള്ക്ക് മുന്നില് സര്ക്കാരിന്റെ പ്രതിച്ഛായ വര്ദ്ധിപ്പിക്കുന്നതിനായി മാത്രം രണ്ടാം പിണറായി സര്ക്കാര് ഖജനാവില് നിന്ന് ചെലവാക്കിയത് 173 കോടിയിലേറെ രൂപ. സര്ക്കാരിന്റെ ഔദ്യോഗിക വകുപ്പായ പബ്ലിക് റിലേഷന്സ് ഡിപ്പാര്ട്ട്മെന്റ് (PRD) വഴി മാത്രം നല്കിയ പരസ്യങ്ങളുടെ കൃത്യമായ വിവരങ്ങളാണ് ഇപ്പോള് പുറത്തുവന്നിരിക്കുന്നത്. ഒന്നാം പിണറായി സര്ക്കാരിന്റെ കാലം തൊട്ട് തന്നെ പരസ്യങ്ങള്ക്കായി സര്ക്കാര് കോടികള് പൊടിക്കുന്നു എന്ന ശക്തമായ ആക്ഷേപം അന്ന് പ്രതിപക്ഷമായിരുന്ന യു.ഡി.എഫ് നിയമസഭയ്ക്കകത്തും പുറത്തും ഉന്നയിച്ചിരുന്നു.
പ്രതിപക്ഷത്തിന്റെ ആ ആരോപണങ്ങളെ പൂര്ണ്ണമായി ശരിവെക്കുന്ന തരത്തിലുള്ള വന് തുകയുടെ കണക്കുകളാണ് ഇപ്പോള് പുറത്തുവന്നിരിക്കുന്നത്.സമൂഹമാധ്യമങ്ങള് ജനങ്ങള്ക്കിടയില് വലിയ സ്വാധീനം ചെലുത്താന് തുടങ്ങിയതോടെ,പരമ്പരാഗതമായ രീതികളില് നിന്ന് മാറി റീലുകള് നിര്മ്മിച്ച് പ്രചരിപ്പിക്കാനും സര്ക്കാര് വന്തോതില് പണം വാരിയെറിഞ്ഞു. റീല് വീഡിയോകള്ക്കായി മാത്രം 37,34,800 രൂപയാണ് ഖജനാവില് നിന്ന് ചെലവിട്ടത്. റീലുകളില് മാത്രം ഈ പ്രചാരണം ഒതുങ്ങിയില്ല.
ഇതിന് പുറമേ വിവിധ സോഷ്യല് മീഡിയ പ്ലാറ്റ്ഫോമുകളില് സര്ക്കാരിന് അനുകൂലമായ കണ്ടന്റുകള്, വീഡിയോകള്, ലേഖനങ്ങള് എന്നിവ പ്രസിദ്ധീകരിക്കാനായി വേറെയും ലക്ഷങ്ങള് ഒഴുക്കിയിട്ടുണ്ട്. ആ വകയില് മാത്രം ഖജനാവിന് നഷ്ടമായത് 1,56,70,246 രൂപയാണ്. ചുരുക്കത്തില്, സമൂഹമാധ്യമങ്ങളിലെ മാത്രം സര്ക്കാരിന്റെ പിആര് വര്ക്കുകള്ക്കായി ഏതാണ്ട് രണ്ട് കോടിയോളം രൂപയാണ് പൊടിച്ചത്.കഴിഞ്ഞ നിയമസഭാ-ലോക്സഭാ തിരഞ്ഞെടുപ്പ് കാലത്ത് സംസ്ഥാനത്തിന്റെ നീളത്തിലും വീതിയിലും സര്ക്കാരിന്റെ നേട്ടങ്ങള് വിളിച്ചോതുന്ന വലിയ ഹോര്ഡിംഗുകള് നാട്ടിലെമ്പാടും സ്ഥാപിച്ചിരുന്നത് എല്ലാവരും കണ്ടതാണ്.അങ്ങിനെ പോയ കാശ് എത്രയാണെന്ന് അറിയാമോ? ഈ ഹോര്ഡിംഗുകള് സ്ഥാപിക്കാന് മാത്രം ചെലവാക്കിയത് 7,61,23,724 രൂപയാണ്.
https://www.facebook.com/Malayalivartha
