ശബരിമല യുവതീപ്രവേശ വിധിയുടെ പുനപരിശോധനയേക്കാള് ബി.ജെ.പി നേതൃത്വം നല്കുന്ന കേന്ദ്രസര്ക്കാര് ആഗ്രഹിക്കുന്നത് പാര്ലമെന്റിലെ വിജയമെന്ന് സൂചന
ശബരിമല യുവതീപ്രവേശ വിധിയുടെ പുനപരിശോധനയേക്കാള് ബി.ജെ.പി നേതൃത്വം നല്കുന്ന കേന്ദ്രസര്ക്കാര് ആഗ്രഹിക്കുന്നത് പാര്ലമെന്റിലെ വിജയമെന്ന് സൂചന. ശബരിമല ഹര്ജികള് ഇന്ന് തള്ളിയാല് ബി ജെ പി ക്ക് പ്ലാന് ബി ഉണ്ടെന്നാണ് സര്ക്കാര് അഭിഭാഷകരില് നിന്ന് ലഭിക്കുന്ന സൂചനയെന്ന് സുപ്രീംകോടതിയിലെ മുതിര്ന്ന മാധ്യമപ്രവര്ത്തകനായ ബാലഗോപാല് ബി. നായര് പറയുന്നു.
ഫെബ്രുവരി 13 ന് മുമ്പ് പാര്ലമെന്റില് യുവതി പ്രവേശനം തടയുന്ന നിയമ നിര്മ്മാണം കൊണ്ട് വരികയാണ് ലക്ഷ്യം. കോണ്ഗ്രസ് അധ്യക്ഷന് രാഹുല് ഗാന്ധിക്ക് പോലും രണ്ട് കൈ പൊക്കി ആ നിയമ നിര്മ്മാണത്തെ പിന്താങ്ങേണ്ടി വരുമെന്നാണ് ബി ജെ പിയുടെ വിലയിരുത്തല്. പ്രധാനമന്ത്രി ഉള്പ്പടെ ഉള്ളവര്ക്ക് പാര്ലമെന്റിന്റെ ഇരുസഭകളിലും സംസാരിക്കാന് അവസരം ലഭിക്കും. അതായിരിക്കും രാഷ്ട്രീയമായി കൂടുതല് മെച്ചം എന്നാണ് ബി ജെ പിയിലെ കേരള നേതൃത്വം ഉള്പ്പെടെ വിലയിരുത്തുന്നത്.
നിയമ നിര്മ്മാണം സുപ്രീം കോടതിയില് നില നില്ക്കുമോ എന്ന് നിയമവിദഗ്ധര് ഉള്പ്പെടെ ആശങ്കപ്രകടിപ്പിക്കുന്നുണ്ട്. അതിനും സര്ക്കാര് അഭിഭാഷകര്ക്ക് മറുപടി ഉണ്ട്. 'സാമ്പത്തിക സംവരണ നിയമം സുപ്രീം കോടതി പരിഗണിക്കുന്ന ആദ്യ ദിവസം ചവറ്റു കുട്ടയില് പോകും എന്നായിരുന്നെല്ലോ പലരും പറഞ്ഞിരുന്നത്. സംവരണ വിഷയത്തില് സുപ്രീം കോടതി നോട്ടീസ് അയക്കുക മാത്രമാണ് ചെയ്തത്. സ്റ്റേ ആവശ്യം പോലും കോടതി അംഗീകരിച്ചില്ല. നിയമ നിര്മ്മാണം ചോദ്യം ചെയ്ത് സുപ്രീം കോടതിയില് എത്തുന്ന ഹര്ജി ഇപ്പോഴത്തെ ബെഞ്ച് തന്നെ കേള്ക്കണമെന്നില്ല എന്നതും അനുകൂലമാകും. ഇത് സര്ക്കാര് അഭിഭാഷകരുടെ നിലപാട് ആണ്. നരേന്ദ്ര മോദിയുടെയും അമിത് ഷാ യുടെയും മനസ്സില് എന്താണെന്ന് ഇത് വരെ വ്യക്തമല്ല.
ബി ജെ പി സംസ്ഥാന നേതാവ് രാധാകൃഷ്ണ മേനോനും പുനഃ പരിശോധന ഹര്ജി ഫയല് ചെയ്തിട്ടുണ്ട്. മുകുള് റോത്തഗി നേരത്തെ അദ്ദേഹത്തിന് വേണ്ടി ഹാജര് ആകും എന്നായിരുന്നു അറിയിച്ചിരുന്നത്. എന്നാല് റോത്തഗിക്ക് പകരം മുന് അഡീഷണല് സോളിസിറ്റര് ജനറല് മോഹന് പരാശരന് ആകും ബി ജെ പി നേതാവിന് വേണ്ടി ഹാജരായത്. കോണ്ഗ്രസ്സ് നേതാവ് പ്രയാര് ഗോപാല കൃഷ്ണന് വേണ്ടി കപില് സിബലിനെ ഹാജരാക്കാന് ശ്രമിച്ചെങ്കിലും അഭിഷേക് മനു സിംഗ്വിയാണ് അവസാനം എത്തിയത്. നിയമ പോരാട്ടത്തില് വിജയം കൈവരിക്കാമെന്നാണ് കോണ്ഗ്രസ് കരുതുന്നത്. അതിനാല് ശബരിമല വിധി നിയമപോരാട്ടം എന്നതിനപ്പുറം രാഷ്ട്രീയ യുദ്ധമായി മാറിയിരിക്കുന്നു.
ജയ രാജ് കുമാര്, സരള പണിക്കര് എന്നീ വിശ്വ ഹിന്ദു പരിഷത്ത് , ശബരിമല കര്മ്മ സമിതിയുടെ നേതാക്കള് നല്കിയിരിക്കുന്ന റിട്ട് ഹര്ജിയിലെ ഒന്നാം എതിര് കക്ഷി കേന്ദ്ര സര്ക്കാര് ആണ്. എതിര് കക്ഷി അല്ലെന്ന ന്യായം ചൂണ്ടിക്കാട്ടി കോടതിയില് നിന്ന് ഒഴിഞ്ഞു മാറാന് കേന്ദ്ര സര്ക്കാരിന് ബുദ്ധിമുട്ട് ആകുന്നത് ഈ റിട്ട് ഹര്ജി കാരണം ആണ്. സാങ്കേതികം ആയി പറഞ്ഞാല് നോട്ടീസ് ലഭിക്കാത്ത ഒരു ഹര്ജിയില് എതിര് കക്ഷി ഹാജര് ആകേണ്ടതില്ല. എന്നാല് വിഷയത്തിന്റെ ഗൗരവ്വം കണക്കില് എടുത്ത് നോട്ടീസ് ലഭിക്കാതെ കേന്ദ്ര സര്ക്കാര് അഭിഭാഷകന് ഹാജര് ആയി ജയ രാജ് കുമാര്, സരള പണിക്കര് എന്നിവരുടെ ഹര്ജി പരിഗണിക്കേണ്ടി വന്നു.
https://www.facebook.com/Malayalivartha
