ശബരിമല വിഷയം അഭിമാന പ്രശ്‌നമായി മാറിയതോടെ അയ്യപ്പന്റെ സ്വന്തം നാട്ടില്‍ വിജയം നേടാനുറച്ച് ബിജെപി കേന്ദ്ര നേതൃത്വം. ബിജെപിയുടെ തെരഞ്ഞെടുപ്പ് ഒരുക്കങ്ങളുടെ മുന്നോടിയായി ഇന്ന് പത്തനംതിട്ടയില്‍ ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥ് പങ്കെടുക്കും. തെക്കന്‍കേരളത്തില്‍ തിരുവന്തപുരത്തിനൊപ്പം ബിജെപി ഏറ്റവും പ്രതീക്ഷ കൊടുക്കുന്ന മണ്ഡലമായ പത്തനംതിട്ടയില്‍ ക്‌ളസ്റ്റര്‍ ശക്തികേന്ദ്ര ഇന്‍ചാര്‍ജുമാരുടെയും പേജ് പ്രമുഖന്മാരുടെയും യോഗത്തില്‍ പങ്കെടുക്കും.

അഞ്ചു ബൂത്തുകളുടെ ചുമതല വഹിക്കുന്ന ആളാണ് ശക്തികേന്ദ്ര ഇന്‍ചാര്‍ജ്. നാല് മണ്ഡലങ്ങളിലെ 1200 പേരടങ്ങുന്ന തിരുവനന്തപുരം ക്ലസ്റ്റര്‍ ശക്തികേന്ദ്ര ഇന്‍ചാര്‍ജുമാരുടെ യോഗത്തിലാണ് ഉത്തര്‍പ്രദേശ് മുഖ്യമന്ത്രി ആദ്യം പങ്കെടുക്കുക. തുടര്‍ന്നാണ് സ്‌റ്റേഡിയത്തില്‍ പേജ് പ്രമുഖ്മാരുടെ യോഗം. വോട്ടര്‍പട്ടികയിലെ പേജ് നോക്കി പ്രവര്‍ത്തിക്കേണ്ടവരുടെ കമ്മിറ്റിയുടെ അദ്ധ്യക്ഷനാണ് പേജ് പ്രമുഖ്. ശബരിമല വിഷയത്തില്‍ പ്രക്ഷോഭങ്ങളുടെ കേന്ദ്രമായിരുന്നു എന്നതും നിരവധി പേര്‍ സമരങ്ങളെ തുടര്‍ന്ന് അറസ്റ്റിലായതുമെല്ലാം പാര്‍ട്ടിക്ക് ഗുണകരമായെന്നാണ് നേതൃത്വത്തിന്റെ വിലയിരുത്തല്‍. അതുകൊണ്ട് തന്നെയാണ് ഉത്തര്‍പ്രദേശ് മുഖ്യമന്ത്രിയെ എത്തിക്കുന്നത്.

യോഗിക്ക് പിന്നാലെ കൂടുതല്‍ കേന്ദ്ര മന്ത്രിമാരും ജില്ലയില്‍ എത്തും. ?25000 പേര്‍ പേജ് പ്രമുഖുമാരുടെ യോഗത്തിലാണ് യോഗി ഇന്ന് പങ്കെടുക്കുക. 5 ക്ലസ്റ്റര്‍ ആയി ആണ് കേരളത്തിലെ മണ്ഡലങ്ങളെ തിരിച്ചിരിക്കുന്നത്. കേരളത്തിലെ മണ്ഡലങ്ങളെ അഞ്ചു ക്ലസ്റ്ററായി തിരിച്ചു കൊണ്ടുള്ള പുതിയ പ്രചരണ തന്ത്രമാണ് ബിജെപി ആവിഷ്‌ക്കരിച്ചിരിക്കുന്നത്. ഇതുവരെ പാര്‍ലമെന്റിലേക്ക് ഒരു സീറ്റു പോലും കിട്ടിയിട്ടില്ലാത്ത ബിജെപി ഒര സീറ്റെങ്കിലും പിടിക്കുകയും അതിലൂടെ സംസ്ഥാനത്തേക്ക് നുഴഞ്ഞുകയറുകയും ചെയ്യുക എന്ന തന്ത്രമാണ് ഇത്തവണ പരീക്ഷിക്കന്നത്.

കേരളത്തില്‍ ആദ്യമായി ഗൃഹസമ്പര്‍ക്കത്തിന് ഒരുങ്ങുന്നത്. പത്തനംതിട്ടയിലെ മത്സരം ഇക്കുറി ബിജെപിക്ക് അഭിമാന പോരാട്ടമാണ്. ശബരിമല വിഷയത്തില്‍ വലിയ ജനപിന്തുണ കിട്ടുമെന്ന പ്രതീക്ഷയിലാണ് ബിജെപി. ശബരിമലവിഷയം ഇല്ലാതിരുന്നിട്ട് കൂടി കഴിഞ്ഞ തെരഞ്ഞെടുപ്പില്‍ ഒരു ലക്ഷത്തി മുപ്പത്തി എട്ടായിരം വോട്ടുകള്‍ ബിജെപി സ്ഥാനാര്‍ത്ഥിയായ എം.ടി രമേശിന് നേടാന്‍ പത്തനംതിട്ടയില്‍ കഴിഞ്ഞിരുന്നു.

അതിനിടെ സംസ്ഥാനത്തെ ബി.ജെ.പി സ്ഥാനാര്‍ത്ഥികളുടെ പ്രാഥമിക പട്ടിക കേന്ദ്ര നേതൃത്വത്തിന് സമര്‍പ്പിച്ചു. തിരുവനന്തപുരത്ത് കുമ്മനത്തിനാണ് പരിഗണന. കുമ്മനമില്ലെങ്കില്‍ കെ.സുരേന്ദ്രന്‍, സുരേഷ് ഗോപി, പി.എസ് ശ്രീധരന്‍ പിള്ള എന്നിവരാണ് സാധ്യതാ പട്ടികയില്‍ ഉള്ളത്. എന്നാല്‍, തുഷാര്‍ വെള്ളാപ്പള്ളി മത്സരരംഗത്തേയ്ക്ക് എത്തിയാല്‍ ഇപ്പോള്‍ പുറത്തു വന്നിട്ടുള്ള പട്ടികയില്‍ മാറ്റം വരും.

22 ന് തലസ്ഥാനത്ത് എത്തുന്ന അമിത്ഷായുമായി ചര്‍ച്ച നടത്തി അന്തിമ തീരുമാനത്തിലെത്തും. പ്രാഥമിക പട്ടിക കേന്ദ്ര നേതൃത്വത്തിന് കൈമാറിയതായി സംസ്ഥാന അധ്യക്ഷന്‍ പി.എസ് ശ്രീധരന്‍ പിള്ള പറഞ്ഞു. പറഞ്ഞു. മൂന്നു പേരുകള്‍ വീതമാണ് ബി.ജെ.പി പ്രാഥമിക പട്ടികയില്‍ ഉള്ളത്.

എന്നാല്‍, എ പ്ലസ് മണ്ഡലങ്ങളായി പാര്‍ട്ടി കരുതുന്ന തിരുവനന്തപുരം, പത്തനംതിട്ട, തൃശ്ശൂര്‍, പാലക്കാട് മണ്ഡലങ്ങളില്‍ മൂന്നിലേറെപ്പേര്‍ പരിഗണനാ പട്ടികയിലുണ്ട്. പത്തനംതിട്ടയില്‍ മഹേഷ് മോഹനര്, അല്‍ഫോന്‍സ് കണ്ണന്താനം, ശശികുമാരവര്‍മ്മ, എം.ടി രമേശ് എന്നിവരെ പരിഗണിക്കുന്നു.

പാലക്കാടും, ആറ്റിങ്ങലും ശോഭാ സുരേന്ദ്രശനയും തിരുവനന്തപുരത്തിന് പുറമേ തൃശ്ശൂരും കാസര്‍ഗോഡും കെ.സുരേന്ദ്രനെയും പരിഗണിക്കുന്നുണ്ട്. അതേസമയം, ആര്‍.എസ്.എസ് നിര്‍ദേശിച്ച മോഹന്‍ലാലിന്റെ പേര് ബി.ജെ.പിയുടെ തിരുവനന്തപുരം പട്ടികയില്‍ ഇല്ലെന്നതാണ് ശ്രദ്ധേയം.

ആറ്റിങ്ങലില്‍ നിന്നും സജീവമായി പരിഗണിച്ച ടി.പി സെന്‍കുമാറിനെ പട്ടികയില്‍ നിന്നും ഒഴിവാക്കി. പദ്മപുരസ്‌കാരത്തില്‍ നമ്പി നാരായണനെതിരെയുള്ള വിവാദ പ്രസ്താവനയാണ് ഒഴിവാക്കാന്‍ കാരണം. അതേസമയം, തുഷാര്‍ മത്സരിച്ചാല്‍, തിരുവനന്തപുരം, പത്തനംതിട്ട ഒഴികെയുള്ള ഏതു മണ്ഡലവും വിട്ടു നല്‍കാന്‍ തയ്യാറായേക്കും. 22 ന് അമിത്ഷാ എത്തുന്നതോടെ കുമ്മനം തിരിച്ചു വരുമോ എന്ന കാര്യത്തില്‍ വ്യക്തത ഉണ്ടായേക്കും.