പുറ്റിങ്ങല് അപകടം: മെഡിക്കല് കോളേജ് അലുമ്നി അസോസിയേഷന്റെ സേവനം എടുത്തു പറയേണ്ടതെന്ന് ഗവര്ണര്
തിരുവനന്തപുരം: മെഡിക്കല് കോളേജ് അലുമ്നി അസോസിയേഷന്റെ സേവനം സന്തോഷം പകരുന്നതാണെന്നും പുറ്റിങ്ങല് അപകടത്തില് അവരുടെ സേവനം എടുത്തു പറയേണ്ടതാണെന്നും ഗവര്ണര് ജസ്റ്റിസ് പി. സദാശിവം. ഡോക്ടര്മാരുമായി വളരെ അടുത്ത സൗഹൃദമാണുള്ളത്. ജഡ്ജിയായിരുന്നപ്പോള് തന്നെ അവരുമായി ഇടപെടാന് സാധിച്ചിട്ടുണ്ട്. വിശ്രമമില്ലാതെ 24 മണിക്കൂറും സേവനം നടത്തുന്ന ഡോക്ടര്മാരെ വിസ്മരിക്കാന് കഴിയില്ലെന്നും ഗവര്ണര് പറഞ്ഞു. തിരുവനന്തപുരം മെഡിക്കല് കോളേജ് അലുമ്നി അസോസിയേഷന്റെ 14-ാമത് വാര്ഷിക സമ്മേളനം മെഡിക്കല് കോളേജ് ഡയമണ്ട് ജൂബിലി അലുമ്നി ഓഡിറ്റോറിയത്തില് ഉദ്ഘാടനം ചെയ്ത് സംസാരിക്കുകയായിരുന്നു ഗവര്ണര്.
ആരോഗ്യ മേഖലയില് വലിയ മാറ്റങ്ങളാണ് ഉണ്ടായിക്കൊണ്ടിരിക്കുന്നതെന്ന് ചടങ്ങില് മുഖ്യ പ്രഭാഷണവും പൂര്വ വിദ്യാര്ത്ഥികളുടെ നേതൃത്വത്തില് എസ്.എ.ടി. ആശുപത്രിയിലെ നവീകരിച്ച ഡോ. ഓമന മാത്യു ഹാളിന്റെ സമര്പ്പണവും നിര്വഹിച്ച് സംസാരിച്ച ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര് പറഞ്ഞു. തിരുവനന്തപുരം മെഡിക്കല് കോളേജിനെ മികവിന്റെ കേന്ദ്രമാക്കി മാറ്റാന് ശ്രമിക്കുകയാണ് സര്ക്കാര്. ഇതിന് അലുമ്നി അസോസിയേഷന് നല്കുന്ന സഹകരണം വളരെ വലുതാണെന്നും മന്ത്രി പറഞ്ഞു.
ആരോഗ്യ സര്വകലാശാല വൈസ് ചാന്സലര് ഡോ. എം.കെ.സി. നായര്, അലുമ്നി അസോസിയേഷന് പ്രസിഡന്റ് ഡോ. കെ. രാമകൃഷ്ണന് നായര്, വൈസ് പ്രസിഡന്റ് ഡോ. ജോണ്പണിക്കര്, സെക്രട്ടറി ഡോ. കെ.വി. വിശ്വനാഥന്, മെഡിക്കല് കോളേജ് പ്രിന്സിപ്പല് ഡോ. തോമസ് മാത്യു, ഡോ. കെ.പി. മുരളിക്കുട്ടന്, ഡോ. കെ. ദിനേശ് എന്നിവര് പങ്കെടുത്തു.
ഉദ്ഘാടന സമ്മേളനത്തില് വൈദ്യശാസ്ത്ര രംഗത്തെ വിലപ്പെട്ട സംഭാവനകള് നല്കിയ പൂര്വ വിദ്യാര്ത്ഥികളെ ആദരിച്ചു. വിദ്യാര്ത്ഥികള്ക്കായുള്ള സ്കോളര്ഷിപ്പ് വിതരണവും ഇതോടൊപ്പം നടന്നു.
മെഡിക്കല് കോളേജിലെ പൂര്വ വിദ്യാര്ത്ഥികളായ ഐ.എ.എസ് പ്രതിഭകളായ ഡോ. ഉഷ ടൈറ്റസ്, ഡോ. ജയതിലക്, ഡോ. അരുള് ആര്.ബി. കൃഷ്ണ എന്നിവര്ക്കും ഡോ. അംബികാത്മജന് നായര്, ഡോ. കെ. ലളിത, ഡോ. എന്.എസ്.ഡി. രാജു, ഡോ. ശ്രീജിത്ത് എന്. കുമാര്, ഡോ. പി.ജി. പോള്, ഡോ. സന്തോഷ് ജോണ്, ശ്രീ ചിത്ര ഡയറക്ടര് ഡോ. ആശ കിഷോര്, ആര്.സി.സി. ഡയറക്ടര് ഡോ. രേഖ നായര്, മെഡിക്കല് കോളേജ് പ്രിന്സിപ്പല് ഡോ. തോമസ് മാത്യു, അമേരിക്കയില് നിന്നുള്ള ഡോ. പിച്ചുമണി, ഡോ. ജേക്കബ് ഈപ്പന്, ഡോ. ഹരി പി, യു.കെ.യിലെ ഡോ. വേണുഗോപാല്, ഡോ. മുരളിക്കുട്ടന്, ഡോ. വിനോദ് മേനോന് എന്നിവര്ക്കും ഗവര്ണര് ഉപഹാരം സമ്മാനിച്ചു. ഇതിനോടനുബന്ധിച്ച് വൈദ്യശാസ്ത്ര രംഗത്തെ തുടര് വിദ്യാഭ്യാസ ക്ലാസുകള് രണ്ട് ദിവസങ്ങളിലായി നടക്കും.
https://www.facebook.com/Malayalivartha