ശബരിമലയില്‍ യുവതികളെ പ്രവേശിപ്പിക്കണമെന്നും ആര്‍ത്തവ രക്തം അശുദ്ധിയല്ലെന്നും ഘോരമായി വാദിച്ചവര്‍ അരുംകൊലയ്ക്ക് വിധേയരായ യുവാക്കളോട് മുഖം തിരിക്കുന്നു. ശബരിമല ആചാരലംഘനത്തില്‍ വിശ്വാസികള്‍ക്കെതിരെ രംഗത്തു വന്ന സാംസ്‌കാരിക ബുദ്ധിജീവികളില്‍ ഭൂരിഭാഗവും കാസര്‍കോട്ടെ ഇരട്ടക്കൊലപാതകത്തില്‍ പ്രതിഷേധിച്ചില്ല. പേരിനെന്തെങ്കിലും പറഞ്ഞവര്‍ തന്നെ സിപിഎം എന്നു പരാമര്‍ശിച്ചതുപോലുമില്ല.

സിനിമാ നടിയും ആക്റ്റിവിസ്റ്റുമായ റീമാ കല്ലിങ്കല്‍, യുവജന കമ്മീഷന്‍ ചെയര്‍പേഴ്‌സണ്‍ ചിന്താ ജെറോം, സാമൂഹിക പ്രവര്‍ത്തക പാര്‍വ്വതി പവനന്‍ തുടങ്ങിയവര്‍ കൊലപാതകത്തിനെതിരെ ഒന്നും പ്രതികരിച്ചില്ല. ഹിന്ദു സംഘടനകള്‍ക്കെതിരെ ഉറഞ്ഞുതുള്ളാറുള്ള എഴുത്തുകാരി ശാരദക്കുട്ടി സിപിഎമ്മിന്റെ പേരു പോലും പരാമര്‍ശിക്കാതെയാണ് പ്രതികരിച്ചത്. നീതിയും ധാര്‍മികതയും ജനാധിപത്യ ബോധവും കശാപ്പു ചെയ്യുന്നവര്‍ക്കൊപ്പമില്ലെന്നു മാത്രമാണ് ശാരദക്കുട്ടി കുറിച്ചത്.

സംസ്ഥാനത്താകെ സിപിഎമ്മിന്റെ കഠാരരാഷ്ട്രീയത്തിന് ഇരയാകേണ്ടിവന്നവരുടെ എണ്ണം നൂറുകണക്കിനാണ്. വീടുകളും വാഹനങ്ങളും പോലീസ് സ്‌റ്റേഷനും തകര്‍ത്തതിന്റെ കണക്ക് വേറെയുമുണ്ട്. കൊന്നും കൊലവിളിച്ചും ഓരോ ദിവസവും അവര്‍ ഭരണത്തില്‍ തുടരുന്നു. പിണറായി വിജയന്‍ മുഖ്യമന്ത്രിയായി ഭരണം തുടങ്ങിയതിനുശേഷം 20 രാഷ്ട്രീയ കൊലപാതകങ്ങളാണ് ഉണ്ടായത്. 2016 മേയ്ക്ക് ശേഷം മാത്രം ഒന്‍പത് കൊലപാതകങ്ങളുണ്ടായി. 2017ല്‍ അഞ്ച് കൊലപാതകങ്ങളുണ്ടായതില്‍ ഒന്ന് മുഖ്യമന്ത്രി പിണറായി വിജയന്റെ മണ്ഡലമായ ധര്‍മ്മടത്താണ്. 2018 ല്‍ നാലുപേരെയാണ് കൊന്നത്. 2019 ഫെബ്രുവരിയിലേതാണ് നിഷ്ഠൂരമായ രണ്ടു കൊലപാതകങ്ങള്‍. കാസര്‍കോട് ജില്ലയിലെ പെരിയയില്‍ ഞായറാഴ്ച രണ്ട് യൂത്ത് കോണ്‍ഗ്രസുകാരെ കൊന്നുകൊണ്ടാണ് ഈ വര്ഷം തുടങ്ങുന്നത്. പെരിയയില്‍ രണ്ട് യൂത്ത് കോണ്‍ഗ്രസുകാരെ കൊലപ്പെടുത്തിയതില്‍ സിപിഎമ്മിന് പങ്കുണ്ടെന്ന് വ്യക്തമാക്കി എഫ്‌ഐആര്‍ എടുത്തിട്ടുണ്ട്. ശരത്തിനോടും കൃപേഷിനോടും സിപിഎമ്മുകാര്‍ക്ക് വൈരാഗ്യമുണ്ടായിരുന്നു. പ്രാദേശിക നേതാക്കള്‍ക്ക് ആക്രമണത്തെക്കുറിച്ച് അറിയാമായിരുന്നുവെന്നും എഫ്‌ഐആറില്‍ പറഞ്ഞു. രണ്ടു സി പി എം പ്രവര്‍ത്തകര്‍ അറസ്റ്റിലുമായി.

ആയുധപരിശീലനം ലഭിച്ചവരോ മുന്‍പ് ഇത്തരം കുറ്റകൃത്യങ്ങളില്‍ ഏര്‍പ്പെട്ടിട്ടുള്ളവരോ ആണ് കൊലപാതകം നടത്തിയെന്നാണ് പോലീസിന്റെ നിഗമനം. ഇത്രത്തോളം മുറിവേല്‍പ്പിച്ച് കൊല്ലാന്‍ കണ്ണൂര്‍ സി പി എം ഗുണ്ടകള്‍ക്കല്ലാതെ മറ്റാര്‍ക്കും സാധ്യമല്ല. അവരുടെ ക്രൂരതയുടെ മുഖമാണ് ടി.പി.ചന്ദ്രശേഖരന്‍ വധത്തിലും കതിരൂര്‍ മനോജ് വധത്തിലും സുഹൈബിന്റെ കൊലയിലും കണ്ടത്. ഇവരുടെ ചരമവാര്‍ഷികത്തില്‍ സ്തൂപം തകര്‍ത്തും മരണപ്പെട്ടസ്ഥലത്ത് പട്ടിയുടെ തലവെട്ടിയിട്ടും ബോംബെറിഞ്ഞുമാണവര്‍ ആഘോഷിച്ചത്. ഈ അക്രമം മൃഗീയമെന്ന് പറഞ്ഞാല്‍ മൃഗങ്ങള്‍ പ്രതിഷേധിക്കും. മൃഗങ്ങള്‍ക്ക് പോലും ഇങ്ങനെ പൈശാചികമായി പെരുമാറാനറിയില്ല.

ഭീകരര്‍ പോലും അക്രമങ്ങളുടെ ഉത്തരവാദിത്തം ഏറ്റെടുക്കാറുണ്ട്. ആദ്യം തള്ളിപ്പറയുന്ന സിപിഎം പിന്നീട് പ്രതികളെ സംരക്ഷിക്കുന്ന കാഴ്ചയാണുണ്ടാകാറ്. വക്കീലിനെ നിയോഗിക്കുന്നതും ജയിലിലെത്തിയാല്‍ സംരക്ഷണം ഏര്‍പ്പെടുത്തുന്നതും പാര്‍ട്ടിയായിരിക്കും.