മന്ത്രിമാര് അടക്കമുള്ളവര്ക്കെതിരെയുള്ള വിജിലന്സ് കേസുകള് അട്ടിമറിക്കാന് മുഖ്യമന്ത്രി പിണറായി വിജയന് തുഗ്ളക്ക് പരിഷ്ക്കാരം നടപ്പാക്കിയെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു
മന്ത്രിമാര് അടക്കമുള്ളവര്ക്കെതിരെയുള്ള വിജിലന്സ് കേസുകള് അട്ടിമറിക്കാന് മുഖ്യമന്ത്രി പിണറായി വിജയന് തുഗ്ളക്ക് പരിഷ്ക്കാരം നടപ്പാക്കിയെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു. വിജിലന്സ് ഡയറക്ടറായി ജൂനിയറായ അനില്കാന്തിനെ നിയമിച്ചതിനെതിരെയാണ് പ്രതിപക്ഷനേതാവ് രംഗത്തെത്തിയത്. ഇതു വഴി പിണറായി സര്ക്കാര് വിജിലന്സ് സംവിധാനത്തിന്റെ വിശ്വാസ്യത കര്ത്തിരിക്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല കുറ്റപ്പെടുത്തി. പൊലീസ് സേനക്കുള്ളില് സര്ക്കാര് കൊണ്ടുവന്നിരിക്കുന്ന മാറ്റങ്ങള് ഗുണത്തേക്കാളേറെ ദോഷം ചെയ്യുന്ന നടപടിയാണെന്നും പ്രതിപക്ഷ നേതാവ് ആരോപിച്ചു.
യു ഡി എഫ് ഭരണകാലത്ത് താന് ആഭ്യന്തരമന്ത്രിയായിരുന്നപ്പോള് മുതിര്ന്ന ഐ.പി.എസ് ഉദ്യോഗസ്ഥനും എ ഡി ജി പിയുമായിരുന്ന ശങ്കര് റെഡ്ഡിയെ വിജിലന്സ് ഡയറക്ടര് ആയി നിയമിച്ചതിനെതിരെ കലിതുള്ളിയ പിണറായി വിജയന് അടക്കമുള്ളവരാണ് ഇപ്പോള് ഏറ്റവും ജൂനിയര് എ ഡി ജി പിക്ക് വിജിലന്സിന്റെ ചുമതല നല്കിയിരിക്കുന്നത്. ഇത് വിജിലന്സിലെ കേസുകള് അട്ടമിറിക്കാനും, സര്ക്കാരിന്റെ ആജ്ഞാനുവര്ത്തിയായി വിജിലന്സ് വകുപ്പിനെ മാറ്റാനുമാണെന്ന് ആരെങ്കിലും സംശയിച്ചാല് അവരെ കുറ്റം പറയാന് കഴിയില്ലന്നും രമേശ് ചെന്നിത്തല പറഞ്ഞു. വിജിലന്സ് ഡയറക്ടറായിരുന്ന ബി.എസ് മുഹമ്മദ് യാസിന് വിരമിച്ച ഒഴിവിലാണ് പുതിയനിയമനം.
ക്രമസമാധാന ചുമതലയുള്ള ഡി ജി പി ഉള്ളപ്പോള് അദ്ദേഹത്തിന് താഴെ ഒരു എ ഡി ജി പിക്ക് ക്രമസമാധാന ചുമതല എന്ത് അടിസ്ഥാനത്തിലാണെന്ന് മനസിലാകുന്നില്ല. നേരത്തെ സോണല് തലങ്ങളില് എ ഡി ജി പിമാരുടെ സാന്നിധ്യം മൂലം ക്രമസമാധാന പാലനം കൂടുതല് കാര്യക്ഷമമാക്കാന് കഴിഞ്ഞിരുന്നു. എന്തെങ്കിലും പ്രശ്നങ്ങള് ഉണ്ടായാല് ഇവര് നേരിട്ടു കൈകാര്യം ചെയ്യുന്ന സാഹചര്യമാണ് ഈ തിരുമാനം മൂലം ഇല്ലാതായിരിക്കുന്നത്. സോണല് തലത്തിലെ ഗൗരവതരമായ പ്രശ്നങ്ങള് പരിഹരിക്കാന് എ ഡി ജി പി യെ ഹെഡ് ക്വാര്ട്ടേഴ്സില് വന്നു കാണേണ്ട സാഹചര്യമാണ് ഉണ്ടായിരിക്കുന്നത്. ഇത് പൊലീസ് സേനക്ക് ഒരിക്കലും ഗുണം ചെയ്യില്ലന്നും രമേശ് ചെന്നിത്തല പറഞ്ഞു. മാത്രമല്ല ഐ ജി മാരുടെ എണ്ണം കുറച്ചതും അംഗീകരിക്കാന് കഴിയുന്ന നടപടി അല്ല. ഇതെല്ലാം ക്രമസമാധാന നില വഷളാക്കാനേ ഉപകരിക്കൂ എന്നത് കൊണ്ട് ഇത്തരം തുഗഌ് പരിഷ്കാരങ്ങള് അടിയന്തിരമായി പിന്വലിക്കണമെന്നും രമേശ് ചെന്നിത്തല ആവശ്യപ്പെട്ടു.
വടക്കന്, തെക്കന് മേഖലാ എ.ഡി.ജി.പി തസ്തികകള് സര്ക്കാര് വേണ്ടെന്ന് വെച്ചു. ആംഡ് ബെറ്റാലിയന് എ.ഡി.ജി.പി മനോജ് എബ്രഹാമിന് ഓപ്പറേഷന് എ.ഡി.ജി.പിയുടെ ചുമതല നല്കിയേക്കും. പൊലീസ് കമ്മീഷണറേറ്റ് സ്ഥാപിക്കണമെന്ന ഡി.ജി.പി ലോക്നാഥ് ബഹ്റയുടെ ആവശ്യത്തെ തുടര്ന്നാണ് മന്ത്രിസഭ പുതിയതീരുമാനം എടുത്തത്. റേഞ്ച് ഐ.ജിമാരുടെ നാല് തസ്തികകളും സൃഷ്ടിക്കും. കമ്മീഷണറേറ്റ് നിലവില് വരുന്നതോടെ ഐ.ജി റാങ്കിലുള്ള ഉദ്യോഗസ്ഥനായിരിക്കും തിരുവനന്തപുരം, കൊച്ചി, കോഴിക്കോട് അടക്കമുള്ള നഗരങ്ങളില് കമ്മീഷണര്മാരായി ചുമതലയേല്ക്കുക. പൊലീസ് ഘടനയില് സര്ക്കാര് വരുത്തിയ മാറ്റങ്ങള്ക്കെതിരെ സമിശ്രപ്രതികരണമാണ് ഉയരുന്നത്. എന്നാല് പ്രതിപക്ഷം കടുത്ത വിയോജിപ്പാണ് രേഖപ്പെടുത്തിയത്.
https://www.facebook.com/Malayalivartha
