കണ്ണൂരില് ബി.ജെ.പി ഓഫീസിന് സമീപം പൈപ്പ് ബോംബ് പൊട്ടിത്തെറിച്ച് മൂന്ന് പേര്ക്ക് ഗുരുതരപരിക്ക്, ഒരാളുടെ മൂക്കിന്റെ ഒരുഭാഗം അറ്റുപോയി, കേള്വിശക്തിയും നഷ്ടപ്പെട്ടു
ബി.ജെ.പി മണ്ഡലം കമ്മിറ്റി ഓഫീസിന് സമീപം പൈപ്പ് ബോംബ് പൊട്ടിത്തെറിച്ച് മൂന്ന് പേര്ക്ക് ഗുരുതരപരിക്ക്. കൊല്ലം പള്ളിമുക്ക് സ്വദേശി സക്കീര്(36), കോഴിക്കോട് കുറ്റ്യേടി കടയങ്ങാട് കരിക്കുളത്തില്വീട്ടില് പ്രവീണ്(33), വേളം കുളുക്കൂല് താഴെ പുളിയില്കണ്ടി റഫീക്ക്(34) എന്നിവരെയാണ് ഗുരുതരപരിക്കോടെ തലശേരി ജനറല്ആശുപത്രിയില് പ്രവേശിപ്പിച്ചത്. കണ്ണൂര് തലശ്ശേരി മണ്ഡലം കമ്മിറ്റി ഓഫീസിന് മുന്വശത്തെ കുറ്റിക്കാട് വൃത്തിയാക്കുന്നതിനിടെയാണ് ബോംബ് പൊട്ടിയത്. സ്ഫോടനത്തില് പ്രവീണിന്റെ മൂക്കിന്റെ ഒരുഭാഗം അറ്റുപോയി. കേള്വി ശക്തിയും നഷ്ടപ്പെട്ടു.
റഫീക്കിനും സക്കീറിനും കൈക്കും കാലിനും ഗുരുതര പരിക്കുകളുണ്ട്. തിരക്കേറിയ എംജി റോഡരികില് പട്ടാപ്പകലുണ്ടായ സ്ഫോടനം നഗരത്തെ നടുക്കി. പൂജാസ്റ്റോറിലേക്കാവശ്യമായ പച്ചിലമരുന്നുകള് ശേഖരിക്കാന് ചന്ദ്രവിലാസം ഹോട്ടലിന് സമീപമുള്ള ആളൊഴിഞ്ഞ പറമ്പിലെത്തിയതായിരുന്നു പരിക്കേറ്റ മൂന്ന് പേരും. കൂട്ടിയിട്ട കല്ലിന് മുകളില് കയറി മരുന്ന് ശേഖരിക്കവെ വന് ശബ്ദത്തോടെ ബോംബ് പൊട്ടത്തെറിക്കുകയായിരുന്നു. സ്ഫോടനത്തിന്റെ ആഘാതത്തില് മൂവരും തെറിച്ചുവീണു. ആര്എസ്എസ് - ബിജെപിക്കാര് സൂക്ഷിച്ച പൈപ്പ്ബോംബാണ് പൊട്ടിയതെന്ന് സംശയിക്കുന്നു. സ്ഫോടന ശബ്ദം കേട്ട് ഓടിക്കൂടിയ നാട്ടുകാരാണ് പരിക്കേറ്റവരെ ജനറല് ആശുപത്രിയില് എത്തിച്ചത്.
പരിക്കേറ്റവര്ക്ക് ഏതെങ്കിലും രാഷ്ട്രീയ പാര്ട്ടികളുമായി ബന്ധമുള്ളതായി അറിവില്ല. രാഷ്ട്രീയ സംഘര്ഷവുമായി ബന്ധപ്പെട്ട് സൂക്ഷിച്ചവയാണോ ബോംബുകള് എന്ന കാര്യം അന്വേഷിക്കുകയാണെന്ന് പൊലീസ് പറഞ്ഞു. കാസര്കോട്ടെ കൊലപാതകത്തിന്റെ പശ്ചാത്തലത്തിലും തെരഞ്ഞെടുപ്പ് അടുത്തതിനാലും വിശദമായ അന്വേഷണം വേണമെന്ന് ആവശ്യം ഉയര്ന്നിട്ടുണ്ട്. സംഭവത്തെ കുറിച്ച് പ്രതികരിക്കാന് ബി.ജെ.പി തയ്യാറായിട്ടില്ല. അതേസമയം ബിജെപി ഓഫീസും പരിസരങ്ങളും കേന്ദ്രീകരിച്ച് ബോംബും ആയുധങ്ങളും സംഭരിച്ച് വച്ചിട്ടുണ്ടെന്നതിന് തെളിവാണിതെന്ന് സി.പി.എം ആരോപിച്ചു.
അക്രമം അവസാനിപ്പിക്കാന് ബി.ജെ.പി തയ്യാറല്ല എന്നതിന്റെ തെളിവാണ് അവരുടെ മണ്ഡലം ഓഫീസിന് സമീപം നടന്ന വന് സ്ഫോടനമെന്ന് തലശ്ശേരി എം.എല്.എ എ എന് ഷംസീര് ആരോപിച്ചു. പരിക്കേറ്റവരെ ജനറല്ആശുപത്രിയില് സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. സംഭവത്തില് സമഗ്രാന്വേഷണം വേണം. തലശേരി നഗരസഭചെയര്മാന് സി കെ രമേശന്, സിപിഎം ലോക്കല്സെക്രട്ടറി കാത്താണ്ടി റസാഖ്, വൈസ് ചെയര്മാന് നജ്മ ഹാഷിം തുടങ്ങിയവര് പരിക്കേറ്റവരെ സന്ദര്ശിച്ചു. കണ്ണൂര്, തലശ്ശേരി മേഖലയില് സി.പി.എം- ആര്.എസ്.എസ് സംഘര്ഷത്തിന് അയവ് വന്നിരിക്കുന്ന ഘട്ടത്തിലാണ് സ്ഫോടനം നടന്നത്. അതിനാല് സി.പി.എം ഇതിനെ രാഷ്ട്രീയമായി ഉപയോഗിക്കുമെന്നുറപ്പാണ്.
https://www.facebook.com/Malayalivartha
