മോദിയെ വിമര്‍ശിച്ചാല്‍ രാജ്യദ്രോഹമാകുമോ? എങ്കില്‍ ഞാന്‍ രാജ്യദ്രോഹിയാണ്, ജയിലിലടയ്ക്കൂ എന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ വെല്ലുവിളിച്ചു. ഞാന്‍ രാജ്യദ്രോഹപ്രസംഗം നടത്തിയെന്ന് പ്രചരണം നടത്തുന്നവര്‍ ആ പ്രസംഗം പുറത്തുവിടണമെന്നും കോടിയേരി ആവശ്യപ്പെട്ടു. രാജ്യദ്രോഹ പ്രസ്താവനകള്‍ നടത്തിയിട്ടില്ല. ഇടുക്കി നെടുങ്കണ്ടത്ത് പ്രസംഗിച്ചപ്പോള്‍ ചാനലുകള്‍ ഉണ്ടായിരുന്നു. രാജ്യദ്രോഹം പ്രസംഗിച്ചിരുന്നെങ്കില്‍ ചാനലുകള്‍ അന്നേരെ പുറത്തുവിടുമായിരുന്നില്ലേ- കോടിയേരി ചോദിച്ചു. ബി.ജെ.പിയുടെയും പ്രധാനമന്ത്രി നരേന്ദ്രമോദിയുടെയും നിലപാടുകളെയും നയങ്ങളെയുമാണ് വിമര്‍ശിച്ചത്. അത്തരത്തിലുള്ള പ്രസംഗങ്ങള്‍ ഇനിയും നടത്തുമെന്നും കോടിയേരി വ്യക്തമാക്കി. 

പ്രധാനമന്ത്രിയേയും ബി.ജെ.പി അധ്യക്ഷന്‍ അമിത് ഷായെയും വിമര്‍ശിക്കുന്നവരെ രാജ്യദ്രോഹികളാക്കി മുദ്രകുത്തുകയാണ് ബിജെപിക്കാര്‍. അതിനാല്‍ പ്രസംഗത്തില്‍ രാജ്യദ്രോഹമുണ്ടെങ്കില്‍ ബിജെപിക്കാര്‍ വീഡിയോയും ശബ്ദരേഖയും പുറത്തുവിടട്ടെ എന്നും കോടിയേരി ആവശ്യപ്പെട്ടു. 
പാക്കിസ്ഥാനെതിരെ ഇന്ത്യന്‍ വ്യോമസേന തിരിച്ചടിച്ചത് ബിജെപി രാഷ്ട്രീയനേട്ടത്തിന് ഉപയോഗിക്കുന്നു എന്നതിന്റെ തെളിവാണ് കര്‍ണാടക മുന്‍ മുഖ്യമന്ത്രി യെദ്യൂരപ്പയുടെ പ്രസ്താവന. ഇത് ബിജെപിയുടെ നേട്ടമല്ല. സൈനികരുടെയും രാജ്യത്തിന്റെയും കരുത്താണ്. ആ കരുത്തിനെ രാഷ്ട്രീയ നേട്ടത്തിനായി ഉപയോഗിക്കുന്നതിനെയാണ് എതിര്‍ക്കുന്നതെന്നും കോടിയേരി വ്യക്തമാക്കി.

രാജ്യം ഒരു വ്യക്തിയുടെ കൈയ്യിലല്ല. ലക്ഷക്കണക്കിന് വരുന്ന സൈനികരുടെ കൈകളിലാണെന്നും കോടിയേരി പറഞ്ഞു. കാര്‍ഗില്‍ യുദ്ധത്തിന് ശേഷവും ബിജെപി ഇതേപോലെ രാഷ്ട്ട്രീയപ്രചരണം നടത്തിയിരുന്നു. സൈന്യത്തിന്റെ കൂടെയാണ് രാജ്യമാകെ നില്‍ക്കുന്നത്. സൈനികരുടെ ത്യാഗത്തെ ബഹുമാനിക്കുന്നു. എന്നാല്‍ ഇന്ത്യന്‍ സൈന്യത്തെ ഏറ്റവും അപഹസിച്ചത് ആര്‍എസ്എസ് നേതാവ് മോഹന്‍ ഭഗവതാണ്. യുദ്ധത്തിനോ ആക്രമണത്തിനോ തയ്യാറാകാന്‍ സൈന്യത്തിന് ആറേഴ് മാസമെങ്കിലും വേണ്ടിവരുമെന്നാണ് മോഹന്‍ ഭഗവത് ആര്‍എസ്എസ് പരിപാടിയില്‍ പരിഹസിച്ചത്. രാജ്യത്തെ മറ്റൊരു പാര്‍ടിയും സൈന്യത്തെ വിലകുറച്ച് കാണുന്നില്ലെന്നും കോടിയേരി കൊച്ചിയില്‍ വാര്‍ത്താസമ്മേളനത്തില്‍ പറഞ്ഞു.

പുല്‍വാമാ ആക്രമണത്തിന് തിരിച്ചടിയായി ഇന്ത്യ പാകിസ്ഥാനിലെ ഭീകരക്യാമ്പുകള്‍ തകര്‍ത്തതിന് പിന്നില്‍ പൊതുതെരഞ്ഞെടുപ്പ് അട്ടിമറിക്കാനുള്ള നീക്കമുണ്ടെന്നാണ് കോടിയേരി ബാലകൃഷ്ണന്‍ ആരോപിച്ചത്. കാശ്മീരിനെ രാജ്യത്തിന്റെ ഭാഗമാക്കാന്‍ സര്‍ക്കാര്‍ ശ്രമിക്കുന്നില്ല. തെരഞ്ഞെടുപ്പ് പരാജയം ഉറപ്പായപ്പോള്‍ അടിയന്തര സാഹചര്യം സൃഷ്ടിച്ച് തെരഞ്ഞെടുപ്പ് അട്ടിമറിക്കാനാണ് മോദി സര്‍ക്കാര്‍ ശ്രമിക്കുന്നത്. തെരഞ്ഞെടുപ്പു പ്രഖ്യാപിക്കുന്നതിന് മുന്‍പു യുദ്ധമുണ്ടാക്കി തെരഞ്ഞെടുപ്പു പ്രക്രിയ അട്ടിമറിക്കാന്‍ ബിജെപിയും ആര്‍എസ്എസും ശ്രമിക്കുകയാണ്. കാശ്മീരികളെ അംഗീകരിക്കാന്‍ ബിജെപിയും ആര്‍എസ്എസും ശ്രമിക്കണം. പുല്‍വാലയിലെ ഭീകരാക്രമണത്തെ തുടര്‍ന്ന് സര്‍വ്വകക്ഷി യോഗം നടക്കുമ്പോള്‍ യുദ്ധസാഹചര്യം ഉണ്ടാക്കാനാണ് കേന്ദ്ര സര്‍ക്കാര്‍ ശ്രമിക്കുന്നത്- എന്നായിരുന്നു കോടിയേരിയുടെ വിമര്‍ശനം.