ബ്രഹ്മപുരം മാലിന്യ സംസ്‌കരണ പ്ലാന്റിന്റെ സുരക്ഷ കര്‍ശനമാക്കുമെന്ന് ജില്ല കലക്ടര്‍ മുഹമ്മദ് വൈ സഫീറുള്ള. ജില്ലാ ഭരണകൂടവും കൊച്ചി കോര്‍പ്പറേഷനും ഇതിനുള്ള നടപടികള്‍ ആരംഭിച്ചു. പ്ലാന്റ് ശനിയാഴ്ച മുതല്‍ പ്രവര്‍ത്തനം തുടങ്ങുമെന്നും കളക്ടര്‍ അറിയിച്ചു.

പ്ലാന്റില്‍ ഉണ്ടായ തീപിടിത്തത്തെ തുടര്‍ന്ന് സുരക്ഷയ്ക്കായി ഒമ്ബത് അധിക സെക്യൂരിറ്റി ജീവനക്കാരെ നിയമിച്ചിട്ടുണ്ട്. പ്ലാന്റിന്റെ വിവിധ ഭാഗങ്ങളിലായി 10 സിസിടിവി ക്യാമറകള്‍ മാര്‍ച്ച് 5 ന് അകം സ്ഥാപിക്കും. ഇവയില്‍ രണ്ടെണ്ണം എച്ച് ഡി ക്യാമറകളാണ്. അപകട സാഹചര്യങ്ങളില്‍ പുഴയില്‍ നിന്നും പ്ലാന്റിലേക്ക് വെള്ളം പമ്ബ് ചെയ്യുന്നതിനായി മൂന്ന് മോട്ടോറുകള്‍ സ്ഥാപിക്കും. ഇതില്‍ ഒരെണ്ണം സ്ഥാപിച്ചു.

മാലിന്യത്തില്‍ നിന്നും ഊറി വരുന്ന മലിനജലം ലീച്ചേറ്റ് ചെയ്യുന്നതിന് ലീച്ചേറ്റ് ട്രീറ്റ്‌മെന്റ് പ്ലാന്റ് പ്രവര്‍ത്തനം പുനരാംഭിച്ചിട്ടുണ്ട്. മാലിന്യങ്ങള്‍ പ്രത്യേക കൂമ്ബാരമായി തിരിക്കുന്നതിനുള്ള നടപടികളും പുരോഗമിക്കുകയാണ്. മാലിന്യകൂമ്ബാരത്തിന് ഇടയിലൂടെ അപകട സന്ദര്‍ഭങ്ങളില്‍ ഫയര്‍ എഞ്ചിന്‍ പോകുന്നതിനുള്ള സൗകര്യമൊരുക്കുന്നതിനാണിത്. ഒരാഴ്ചയ്ക്കകം കൂടുതല്‍ ലൈറ്റുകള്‍ സ്ഥാപിക്കും.
മാലിന്യം കൊണ്ടുപോകുന്ന കവചിതമല്ലാത്ത വാഹനങ്ങളും ലീക്ക് ചെയ്യുന്ന വാഹനങ്ങളും പോലീസ് പിടിച്ചെടുത്ത് നടപടി സ്വീകരിക്കും. ടോയ്‌ലറ്റ് മാലിന്യ സംസ്‌കരണ പ്ലാന്റിലും ക്യാമറകള്‍ സ്ഥാപിക്കും. അടുത്ത ആഴ്ച വീണ്ടും അവലോകന യോഗം ചേരുമെന്നും പ്ലാന്റ് സന്ദര്‍ശിക്കുമെന്നും കലക്ടര്‍ അറിയിച്ചു. പ്രദേശത്ത് കഴിഞ്ഞ ദിവസം അക്രമം ഉണ്ടായ സാഹചര്യത്തില്‍ ഇത്തരം പ്രവര്‍ത്തികള്‍ക്കെതിരെ നിയമപരമായ നടപടി സ്വീകരിക്കും.

15 മാസത്തിനകം വേസ്റ്റ് ടു എനര്‍ജി പ്ലാന്റ് പ്രവര്‍ത്തനം ആരംഭിക്കാന്‍ കഴിയുമെന്നാണ് പ്രതീക്ഷിക്കുന്നത്. നിലവിലുള്ള പ്ലാന്റ് പ്രവര്‍ത്തിപ്പിക്കുന്നതിനുള്ള താത്കാലിക നടപടികളാണ് ഇപ്പോള്‍ സ്വീകരിക്കുന്നത്. പ്ലാസ്റ്റിക്കിന്റെ വരവ് കുറയ്ക്കുന്നതിനും കിറ്റുകള്‍ നിരോധിക്കുന്നതിനുമുള്ള നടപടികള്‍ സ്വീകരിക്കുമെന്ന് മേയര്‍ സൗമിനി ജെയിന്‍ പറഞ്ഞു.
കലക്ടറേറ്റ് സ്പാര്‍ക്ക് ഹാളില്‍ ചേര്‍ന്ന യോഗത്തില്‍ ദുരന്തനിവാരണ വിഭാഗം ഡെപ്യൂട്ടി കലക്ടര്‍ ഷീല ദേവി, വടവുകോട് പുത്തന്‍കുരിശ് ഗ്രാമപഞ്ചായത്ത് പ്രസിഡന്റ് പി കെ വേലായുധന്‍, പഞ്ചായത്ത് അംഗങ്ങള്‍, കൊച്ചി കോര്‍പ്പറേഷന്‍ കൗണ്‍സിലര്‍മാര്‍, ജനപ്രതിനിധികള്‍ തുടങ്ങിയവര്‍ യോഗത്തില്‍ പങ്കെടുത്തു.