എം.എല്‍.എയുടെ മകള്‍ മാനേജരായ ബാങ്കിന്റെ കിട്ടാക്കടം തിരികെ പിടിക്കാന്‍ തിരുവിതാംകൂര്‍ ദേവസ്വം ബോര്‍ഡിനെ കരുവാക്കുന്നു. ബോര്‍ഡിനു കീഴിലുള്ള പ്രധാന ക്ഷേത്രങ്ങളില്‍ ഒന്നായ കൊട്ടാരക്കര ഗണപതി ക്ഷേത്രത്തിന്റെ വികസനപ്രവര്‍ത്തനങ്ങളുടെ പേരിലാണ് ബാങ്കിന്റെ ഭീമമായ കിട്ടാക്കടം ദേവസ്വം ബോര്‍ഡിനെക്കൊണ്ട് ഏറ്റെടുപ്പിക്കാന്‍ അണിയറയില്‍ നീക്കം സജീവമായിരിക്കുന്നത്.

കൊട്ടാരക്കര ഗണപതി ക്ഷേത്ര വികസനത്തിന് മതിയായ സ്ഥല സൗകര്യങ്ങള്‍ ഇല്ലെന്നു വരുത്തി കൊട്ടാക്കര ഫെഡറല്‍ ബാങ്കിന്റെ ലേലത്തില്‍വെച്ച ലേല വസ്തുവിന് ഉയര്‍ന്ന ഫെയര്‍വാല്യൂ ഇട്ട് ദേവസ്വം ബോര്‍ഡിനെക്കൊണ്ട് ഏറ്റെടുപ്പിക്കാനാണ് ചില ദേവസ്വം ബോര്‍ഡ് ഉന്നതരെ മുന്‍നിര്‍ത്തി എം.എല്‍.എയും ബാങ്ക് മാനേജരായ മകളും ചരടുവലികള്‍ നടത്തിയത്. കൊട്ടാരക്കര പുലമണ്‍ ജംഗ്ഷനിനു സമീപത്തു നിന്നു തുടങ്ങുന്ന 89.5 സെന്റ് വസ്തു എട്ടരക്കോടിയുടെ ബാങ്ക് ബാധ്യത തീര്‍ത്ത് ലേലം പിടിക്കാന്‍ ആരും ഇല്ലാത്തതിനാല്‍ ഗണപതി ക്ഷേത്ത്രതിന്റെ കോടിക്കണക്കിനു രൂപാ വരുന്ന ഫണ്ട് ലക്ഷ്യംവെച്ച് വസ്തു മാഫിയാക്കാരുടെ ഇടനിലക്കാരും മറ്റുചില ഉന്നതരുടെയും ഒത്താശയോടെയാണ് കരുക്കള്‍ നീക്കുന്നത്.

കോടതിയുടെ അനുമതി ഇല്ലാതെ ദേവസ്വം ബോര്‍ഡിന് കോടികള്‍ മുടക്കി വസ്തുവാങ്ങാന്‍ കഴിയില്ലെന്നിരിക്കെയാണ് അണിയറയില്‍ ദേവസ്വം ഉന്നതരുടെ നേതൃത്വത്തില്‍ കരുക്കള്‍ നീക്കുന്നത്. കൊട്ടാരക്കര ക്ഷേത്രത്തിനു വടക്കു ഭാഗത്തുള്ള റോഡിനു കിഴക്കായാണ് ഈ സ്ഥലം. ഈ സ്ഥലം വാങ്ങിയാല്‍ ഇതിനോട് ചേര്‍ന്ന് കിടക്കുന്ന മറ്റൊരു സ്വകാര്യ വ്യക്തിയുടെ സ്ഥലം കൂടി വാങ്ങിയാലേ ദേവസ്വം ഓഫീസ് സ്ഥിതി ചെയ്യുന്ന സ്ഥലത്തെങ്കിലും എത്താനാകൂ. അന്യായവില നല്‍കി ഈ വസ്തുവും ബോര്‍ഡിനെക്കൊണ്ട് ഏറ്റെടുപ്പിക്കാനുള്ള നീക്കങ്ങള്‍ സജീവമാണ്. ലക്ഷങ്ങളുടെ കമ്മീഷന്‍ ലക്ഷ്യമിട്ടാണ് ഇതിനുള്ള കരുക്കള്‍ അണിയറയില്‍ ദേവസ്വം ഉന്നതര്‍ നീക്കുന്നത്.

കൊട്ടാരക്കര പി.ഡി മണികണ്‌ഠേശ്വരം ദേവസ്വത്തിന്റെ സമഗ്രവികസനം ലക്ഷ്യമിട്ട് മാസ്റ്റര്‍ പ്ലാന്‍ മുഖേന നടപ്പാക്കാനുള്ള ദേവസ്വം ബോര്‍ഡ് തീരുമാനത്തിന്റെ മറവിലാണ് ദേവസ്വം ഖജനാവ് കൊള്ളയടിക്കാന്‍ ഉദ്യോഗസ്ഥര്‍ ഗുഡാലോചന നടത്തുന്നത്. ക്ഷേത്രത്തിനു സമീപത്തുള്ള സ്വകാര്യ വ്യക്തികളുടെ റീസര്‍വ്വെ 67/8, 67/30, 68/14, 68/15, 68/17, 68/11, 68/1168/12,68/16, 68/13, 68/1(8 എന്നീ നമ്പരുകളില്‍പ്പെട്ട 89.5375 സ്ഥലവും മൂന്നു മുറി കടകളും ഏറ്റെടുത്താല്‍ ലാഭകരമാകുമെന്ന് ദേവസ്വം സെക്രട്ടറിയുടെ ആര്‍ഒസി നമ്പര്‍ 1710/19/എം ഉത്തരവിന്റെ മറപിടിച്ചാണ് ലക്ഷങ്ങളുടെ കുംഭകോണത്തിന് ദേവസ്വം ഉന്നതര്‍ കരുക്കള്‍ നീക്കുന്നത്.