സ്വകാര്യ വ്യക്തിയുടെ കടയില് നിന്നും വൈദ്യുതി കണക്ഷന് എടുത്ത് ഹൈമാസ്റ്റ് ലൈറ്റ് ഉദ്ഘാടനം; എട്ടരയ്ക്ക് കട അടച്ചതോടെ ലൈറ്റ് അണഞ്ഞു, തെരഞ്ഞെടുപ്പ് പ്രഖ്യാപനത്തിന് തൊട്ടുമുമ്പുള്ള ഉദ്ഘാടന പ്രഹസനങ്ങള്!
ചക്കിട്ടപാറയില് പേരാമ്പ്ര എംഎല്എയുടെ പ്രാദേശിക വികസന ഫണ്ടില് നിന്നു തുക വകയിരുത്തി സ്ഥാപിച്ച ഹൈമാസ്റ്റ് വിളക്കിന്റെ ഉദ്ഘാടനം ഇന്നലെ വൈകുന്നേരം നാലരയോടെ മന്ത്രി ടി.പി. രാമകൃഷ്ണന് നിര്വഹിച്ചു.
വൈകിട്ട് ആറിന് ഉദ്ഘാടനം നടത്താനായിരുന്നു നിശ്ചയിച്ചതെങ്കിലും ലോക്സഭ തെരഞ്ഞെടുപ്പ് പ്രഖ്യാപിക്കുന്നതിനാല് നേരത്തെയാക്കുകയായിരുന്നു.
ദിവസങ്ങള്ക്കു മുമ്പ് സ്ഥാപിച്ച ലൈറ്റ് ഇന്നലെ ഉച്ചയോടെ പ്രവര്ത്തിപ്പിച്ചു നോക്കിയെങ്കിലും കത്തിയില്ല.
കരാറുകാരന് ശ്രമിച്ചിട്ടും വിജയിക്കാതായപ്പോള് ചക്കിട്ടപാറയിലെ ഇലക്ട്രീഷന് കോയിക്കല് സജി രക്ഷയ്ക്കെത്തുകയായിരുന്നു.
സജി തകരാര് പരിഹരിച്ചതിനാല് മന്ത്രി സ്വിച്ചിട്ടപ്പോള് ഹൈമാസ്റ്റ് വിളക്കു പ്രകാശിച്ചു.
അതേസമയം 50 മീറ്റര് അകലെ കെഎസ്ഇബി സെക്ഷന് ഓഫീസ് ഉണ്ടെങ്കിലും ലൈറ്റിലേക്കുള്ള വൈദ്യുതി കണക്ഷന് എടുത്തത് സ്വകാര്യ കെട്ടിടത്തിലെ കടയുടെ മെയിന് സ്വിച്ചില് നിന്നായിരുന്നു.
രാത്രി എട്ടരയോടെ കടയടച്ചപ്പോള് ലൈറ്റണഞ്ഞു. വൈകുന്നേരം ആറു മുതല് രാവിലെ ആറ് വരെയാണു ലൈറ്റ് കത്തേണ്ടത്.
https://www.facebook.com/Malayalivartha
