പള്ളിത്തർക്കകേസുകളിൽ ഹൈക്കോടതി വിധി ഇന്ന് . എറണാകുളം വരിക്കോലി പള്ളി, കായംകുളം കട്ടച്ചിറ സെൻറ് മേരീസ് പള്ളി എന്നിവിടങ്ങളിലെ ആരാധനയുമായി സംബന്ധിച്ച്‌ ഓർത്തഡോക്സ് യാക്കോബായ വിഭാഗങ്ങൾ തമ്മിലുള്ള തർക്കത്തിലാണ് ഹൈക്കോടതി ഇന്ന് വിധി പറയുന്നത് .

സുപ്രീംകോടതി വിധിഅനുസരിച്ച് പള്ളികളുടെ ഉടമസ്ഥാവകാശം തങ്ങൾക്കാണെന്നാണ് ഓർത്തഡോക്സ് വിഭാഗം അവകാശപ്പെടുന്നത്. എന്നാൽ , കോടതി ഉത്തരവനുസരിച്ച് പള്ളിയിൽ പ്രവേശിക്കാനെത്തിയപ്പോൾ യാക്കോബായ വിഭാഗം തങ്ങളെ തടഞ്ഞെന്നും ആരാധന നടത്താൻ പൊലീസ് സുരക്ഷ വേണമെന്നുമാണ് ഓർത്തഡോക്സ് വിഭാഗത്തിന്‍റെ ആവശ്യം.

അതേസമയം , കോടതി ഉത്തരവിനെ ഓർത്തഡോക്സ് വിഭാഗം ദുർവ്യാഖ്യാനം ചെയ്യുകയാണെന്നാണ് യാക്കോബായ വിഭാഗത്തിന്‍റെ നിലപാട്. സുരക്ഷ നൽകുന്നതിൽ എതിർപ്പില്ലെന്ന് സംസ്ഥാന സർക്കാരും കോടതിയെ അറിയിച്ചിട്ടുണ്ട്.