കേരളത്തെ നടുക്കി ഇന്നലെ രാവിലെ തിരുവല്ലയില്‍ പെണ്‍കുട്ടിയെ പെട്രോളൊഴിച്ച് തീകൊളുത്തിയ പ്രതിയെ നാട്ടുകാര്‍ പിടിച്ച് പൊലീസിനെ ഏല്‍പിക്കുന്ന ദൃശ്യങ്ങള്‍ പുറത്തുവന്നതില്‍, 'നീ എന്തിനാടാ ആ കൊച്ചിനോട് ഇങ്ങനെ ചെയ്‌തേ..നീ എന്തിനാടാ ജീവിക്കുന്നേ..' രോഷം അണപൊട്ടി, സ്ത്രീകള്‍ അടക്കമുള്ളവര്‍ ചോദിക്കുന്നത് കാണാമായിരുന്നു. പ്രതിയെ കീഴ്‌പ്പെടുത്തിയ ശേഷം അയാളുടെ തന്നെ ഷര്‍ട്ടുപയോഗിച്ച് നാട്ടുകാര്‍ ഇയാളെ കെട്ടിയിടുകയായിരുന്നു.

സ്ത്രീകളടക്കമുള്ളവരുടെ രോഷവും ശാപവും ചേര്‍ന്ന വാക്കുകളും വിഡിയോയില്‍ കേള്‍ക്കാം. രോഷത്തോടെയാണ് ഇയാളോട് നാട്ടുകാര്‍ പ്രതികരിച്ചത്. യുവതിയെ കുത്താന്‍ ഉപയോഗിച്ച കത്തിയും പാന്റ്‌സിന്റെ പോക്കറ്റിലുണ്ടായിരുന്നു. തിരുവല്ല കുമ്പനാട് സ്വദേശി അജിന്‍ റെജി മാത്യുവിനെയാണ് നാട്ടുകാര്‍ പിടികൂടി പൊലീസിലേല്‍പ്പിച്ചത്.

ഇന്നലെ രാവിലെയാണ് സംഭവം നടന്നത്. പട്ടാപ്പകല്‍ പൊതുജനം നോക്കിനില്‍ക്കെയാണ് പ്രണയം നിരസിച്ച പെണ്‍കുട്ടിയെ യുവാവ് തീകൊളുത്തി കൊലപ്പെടുത്താന്‍ ശ്രമിച്ചത്. ഗുരുതരമായി പരുക്കേറ്റ പെണ്‍കുട്ടി തീവ്രപരിചരണ വിഭാഗത്തില്‍ ചികില്‍സയിലാണ്. പന്ത്രണ്ടാം ക്ലസുമുതല്‍ ഇയാള്‍ക്ക് പെണ്‍കുട്ടിയോട് പ്രണയമുണ്ടായിരുന്നു. എന്നാല്‍ പെണ്‍കുട്ടിക്ക് താല്‍പര്യമില്ലായിരുന്നു.

എന്നാല്‍ വീണ്ടും ഇയാള്‍ പെണ്‍കുട്ടിയെ ശല്യം ചെയ്ത് വരികയായിരുന്നു. ഒടുവില്‍ പെണ്‍കുട്ടിയുടെ വീട്ടിലെത്തി വിവാഹം കഴിക്കാന്‍ താല്‍പര്യമുണ്ടെന്ന് ഇയാള്‍ അറിയിച്ചിരുന്നതായും പറയുന്നു. എന്നാല്‍ പെണ്‍കുട്ടിയുടെ വീട്ടുകാരും ഈ ആവശ്യം നിരസിച്ചു. ഇതോടെയാണ് ഇയാള്‍ പെണ്‍കുട്ടിയോട് പക വീട്ടാന്‍ തയാറെടുത്തത്. നഗരത്തിലെ ഒരു സ്വകാര്യ വിദ്യാഭ്യാസ സ്ഥാപനത്തില്‍ വിദ്യാര്‍ത്ഥിനിയായ പെണ്‍കുട്ടിയെ ക്ലാസ്സിലേക്ക് പോകും വഴിയാണ് യുവാവ് ആക്രമിച്ചത്. കത്തി കൊണ്ട് പെണ്‍കുട്ടിയെ കുത്തി വീഴ്ത്തിയ ശേഷം ഇയാള്‍ പെട്രോളൊഴിച്ച് തീകൊളുത്തുകയായിരുന്നു.