മുഖ്യമന്ത്രിയുടെ ഓഫീസിലെ വനിതാ പ്രിൻസിപ്പൽ സെക്രട്ടറിയുടെ രാജിക്കിടയാക്കിയ സംഭവം വെളിപ്പെടുത്തുന്നത് ഒരു വനിതയ്ക്ക് നിയമാനുസൃതം ജോലി ചെയ്യാനുള്ള അന്തരീക്ഷം ഉറപ്പാക്കാൻ മുഖ്യമന്ത്രിയുടെ ഓഫീസിന് കഴിയുന്നില്ലാ എന്നതാണെന്ന് ആർഎസ്പി സംസ്ഥാന സെക്രട്ടറി എ.എ.അസീസ് അഭിപ്രായപ്പെട്ടു.

സ്ത്രീ സ്വാതന്ത്ര്യത്തിനെതിരെ സി പി ഐ (എം) നടത്തുന്ന കടന്നാക്രമണത്തിനുള്ള തെളിവാണ് വനിതാ പ്രിൻസിപ്പൽ സെക്രട്ടറിയുടെ രാജിയിടയാക്കിയ സംഭവങ്ങൾ. സി പി ഐ ( എം) ന്റെ നിയമവിരുദ്ധ നിലപാടുകൾക്ക് ഒത്താശ ചെയ്യാത്ത വനിതാ ഉദ്യോഗസ്ഥരെ വളഞ്ഞിട്ടു വേട്ടയാടുന്ന സംഭവം ഇതാദ്യമല്ല.

അനുപമയും ചൈത്ര തെരേസയും രേണു രാജും ഉൾപ്പെടെ ഉന്നത സിവിൽ സർവ്വീസ് ഉദ്യോഗസ്ഥർ സർക്കാർ പീഡനത്തിന് വിധേയരായിട്ടുണ്ട്. മുഖ്യമന്ത്രിയുടെ ഓഫീസിലെ ഒരേയൊരു ഉന്നത വനിതാ ഉദ്യോഗസ്ഥയെ പുകച്ചു പുറത്തുചാടിക്കുന്നതാണോ സ്ത്രീ സമത്വം. സ്ത്രീ സമത്വത്തിനു വേണ്ടി വനിതാ മതിലും നവോത്ഥാന റാലിയും നടത്തിയ സർക്കാരും സി പി ഐ (എം) ഉം മുഖ്യമന്ത്രിയുടെ ഓഫീസിൽ പോലും അത് നടപ്പാക്കാത്തത് വിരോധാഭാസമാണ്. ഇത്തരം സാഹചര്യങ്ങൾ കേരളത്തെ നാണംക്കെടുത്തുന്നതാണെന്ന് എ.എ. അസീസ് പറഞ്ഞു.