തൃശ്ശൂര് കേരളവര്മ കോളേജ് വനിതാ ഹോസ്റ്റലിലെ വിദ്യാര്ഥിനികള്ക്ക് രാഷ്ട്രീയ പ്രവര്ത്തനത്തിനും സിനിമ കാണാനുമുള്ള നിയന്ത്രണ വ്യവസ്ഥ ഹൈക്കോടതി റദ്ദാക്കി
തൃശ്ശൂര് കേരളവര്മ കോളേജ് വനിതാ ഹോസ്റ്റലിലെ വിദ്യാര്ഥിനികള്ക്ക് രാഷ്ട്രീയ പ്രവര്ത്തനത്തിനും സിനിമ കാണാനുമുള്ള നിയന്ത്രണ വ്യവസ്ഥ ഹൈക്കോടതി റദ്ദാക്കി. ആണ്കുട്ടിക്കുള്ള അതേ അവകാശം പെണ്കുട്ടികള്ക്കുമുണ്ട്; ആണ്കുട്ടികളുടെ ഹോസ്റ്റലില് ഇത്തരം നിയന്ത്രണങ്ങളില്ലെന്ന് ജസ്റ്റിസ് എ. മുഹമ്മദ് മുസ്താഖ് ഓര്മിപ്പിച്ചു. ഫസ്റ്റ് ഷോയ്ക്കും സെക്കന്ഡ് ഷോയ്ക്കും പോകുന്നതിനുള്ള വിലക്ക് തുടങ്ങിയവ ചോദ്യംചെയ്ത് രണ്ട് വിദ്യാര്ഥിനികള് സമര്പ്പിച്ച ഹര്ജിയിലാണിത്.
അതേസമയം, പെണ്കുട്ടികള് വൈകീട്ട് ഹോസ്റ്റലില് തിരികെയെത്താനുള്ള ന്യായമായ സമയക്രമം കോളേജ് മാനേജ്മെന്റിന് തീരുമാനിക്കാമെന്നും കോടതി വ്യക്തമാക്കി. നിലവില് ആറരയെന്ന് നിശ്ചയിച്ചത് മാറ്റണമെന്ന ആവശ്യം ഹര്ജിക്കാര്ക്ക് പ്രിന്സിപ്പല് മുമ്പാകെ ഉന്നയിക്കാം.രാഷ്ട്രീയ പ്രവര്ത്തനവും സിനിമ കാണലും സംബന്ധിച്ച രണ്ട് വ്യവസ്ഥകളാണ് കോടതി റദ്ദാക്കിയത്. ഹര്ജിക്കാര് ചോദ്യംചെയ്ത മറ്റു രണ്ട് വ്യവസ്ഥകളില് കോടതി ഇടപെട്ടില്ല.
കോടതിയുടെ നിഗമനം
ഹോസ്റ്റല് വിദ്യാര്ഥിനികള് രാഷ്ട്രീയ യോഗം, പ്രകടനം, പ്രചാരണം തുടങ്ങിയവയില് പങ്കെടുക്കരുതെന്ന വ്യവസ്ഥ ഹോസ്റ്റലിലെ അച്ചടക്കത്തെ ബാധിക്കുന്നതല്ല. അതിനാല് മാനേജ്മെന്റിന്റെ അവകാശവുമായി ബന്ധപ്പെട്ടതുമല്ല. അത് വിദ്യാര്ഥിനികളുടെ മൗലികാവകാശം ലംഘിക്കുന്നതായതിനാല് റദ്ദാക്കുന്നു.
കോളേജിെല അധ്യയന സമയത്ത് ഹോസ്റ്റലിലിരിക്കാന് വാര്ഡന്റെ അനുമതി വേണമെന്ന വ്യവസ്ഥയില് തെറ്റില്ല.
കോളേജില് പ്രശ്നമുണ്ടാക്കല്, ക്ലാസില് ഹാജരാകാതിരിക്കല്, പഠനത്തില് ശ്രദ്ധിക്കാതിരിക്കല് തുടങ്ങിയവ കണ്ടെത്തിയാല് ഹോസ്റ്റലില്നിന്ന് സസ്പെന്ഡ് ചെയ്യുന്നതുള്പ്പെടെയുള്ള വ്യവസ്ഥയിലും തെറ്റില്ല.
ഹോസ്റ്റലിലെ നിയന്ത്രണങ്ങള് മാതാപിതാക്കള് സമ്മതിച്ച് ഒപ്പിട്ടതാണെന്ന മാനേജ്മെന്റിന്റെ വാദം സ്വീകാര്യമല്ല. വിദ്യാര്ഥിനികള് പ്രായപൂര്ത്തിയായവരാണ്. മാതാപിതാക്കള് അംഗീകരിച്ചതായാല്പ്പോലും അത് വിദ്യാര്ഥിനികളുടെ മൗലികാവകാശത്തെ ബാധിക്കുന്നതാകരുത്.
വാര്ഡന് സമ്മതിക്കുന്ന ദിവസമേ സിനിമയ്ക്കു പോകാവൂ, ഫസ്റ്റ് ഷോ, സെക്കന്ഡ് ഷോ എന്നിവയ്ക്ക് പോകരുത് എന്നീ നിയന്ത്രണങ്ങള് വനിതാ ഹോസ്റ്റലില് മാത്രമാണുള്ളത്. ആണ്കുട്ടികളുടെ ഹോസ്റ്റലില് ഇല്ല. മാനേജ്മെന്റിന്റെ സദാചാര ധാരണ വിദ്യാര്ഥിനികളില് അടിച്ചേല്പിക്കാനുള്ള ശ്രമമാണത്. അത് ഹോസ്റ്റലിലെ പ്രവര്ത്തനവുമായി ബന്ധപ്പെട്ടതല്ല.
ഹോസ്റ്റലില് തിരിച്ചെത്താന് ന്യായമായ സമയം നിശ്ചയിക്കാന് തടസ്സമില്ല. ഹോസ്റ്റലിലെ അച്ചടക്കത്തിനു വേണ്ടിയാണത്. വൈകിയെത്തുന്നത് ഹോസ്റ്റലിലെ അച്ചടക്കത്തെ ബാധിക്കുന്ന അവസ്ഥ ഉണ്ടാകരുത്.
https://www.facebook.com/Malayalivartha
