ലോക്‌സഭാ തെരഞ്ഞെടുപ്പ് പടിവാതിക്കല്‍ നില്‍ക്കെ കനത്ത പരാമര്‍ശമാണ് ഹൈക്കോടതിയില്‍ നിന്നും ഇന്നലെ സര്‍ക്കാര്‍ നേരിട്ടത്. ശബരിമലയില്‍ അതിക്രമം കാണിച്ച മൂന്ന് പോലീസുകാരെ ചോദ്യം ചെയ്തതായി സര്‍ക്കാര്‍ തന്നെ ചൂണ്ടിക്കാട്ടിയിട്ടുണ്ട്. ശബരിമലയിലെ പോലീസ് അതിക്രമത്തെ കുറിച്ചുള്ള അന്വേഷണത്തിലെ ഉദാസീനത അപലപനീയമാണെന്നാണ് ഹൈക്കോടതിയുടെ വിമര്‍ശനം.

ഇങ്ങനെ ശബരിമല ചര്‍ച്ചകള്‍ മുറുകവേ ലോക്‌സഭാ പ്രചരണയോഗങ്ങള്‍ക്കിടയില്‍ ശബരിമല വിഷയം പ്രസംഗത്തില്‍ നിന്ന് ഒഴിവാക്കാന്‍ നേതാക്കള്‍ക്ക് സിപിഎമ്മിന്റെ നിര്‍ദ്ദേശം.നിയമസഭാ മണ്ഡലം തലത്തില്‍ പ്രചരണ യോഗങ്ങളില്‍ പ്രസംഗിക്കാന്‍ പരിശീലനം നല്‍കുന്നവര്‍ക്കാണ് പാര്‍ട്ടിയുടെ നിര്‍ദ്ദേശം. തെരഞ്ഞെടുപ്പ് പ്രചരണവേദികളില്‍ ശബരിമല വിഷയം ചര്‍ച്ചയായാല്‍ യുവതീപ്രവേശനം സംബന്ധിച്ച കോടതി വിധി എന്തായിരുന്നുവെന്നും അത് നടപ്പാക്കാതിരുന്നാല്‍ സര്‍ക്കാരിന് നേരിടേണ്ടി വരുമായിരുന്ന നിയമപ്രശ്‌നങ്ങള്‍ എന്താണെന്നും കുറഞ്ഞ വാക്കുകളില്‍ വ്യക്തമാക്കാനാണ് നിര്‍ദ്ദേശം നല്‍കിയിരിക്കുന്നത്.

വിഷയത്തില്‍ വിവാദങ്ങള്‍ ഉണ്ടാക്കരുതെന്നും പാര്‍ട്ടി നിര്‍ദ്ദേശം നല്‍കിയിട്ടുണ്ട്. പരിശീലനം കിട്ടിയവര്‍ മാത്രമേ പ്രചരണ യോഗങ്ങളില്‍ പ്രസംഗിക്കാവൂ എന്നാണ് പാര്‍ട്ടി നിര്‍ദ്ദേശിച്ചിരിക്കുന്നത്. 2 ദിവസത്തെ പരിശീലനമാണ് സിപിഎം പ്രാസംഗികര്‍ക്കായി ഒരുക്കുന്നത്. ഒരോ നിയമസഭാ മണ്ഡലത്തിലും 100 പേര്‍ക്ക് വീതമാണ് പരിശീലനം നല്‍കുന്നത്. ഇവര്‍ക്ക് മാര്‍ഗനിര്‍ദേശങ്ങള്‍ അടങ്ങിയ ലഘുലേഖയും വിതരണം ചെയ്യും. ജില്ലാതലം വരെയുള്ള നേതാക്കള്‍ക്കും ഇതുസംബന്ധിച്ച് നിര്‍ദ്ദേശം നല്‍കിയിട്ടുണ്ട്.

പ്രസംഗത്തില്‍ ഓരോ പ്രദേശത്തെയും പ്രാധാന്യമര്‍ഹിക്കുന്ന വിഷയങ്ങള്‍ക്ക് മുന്‍ഗണന നല്‍കണം. കേന്ദ്രസര്‍ക്കാരിന്റെ ജനവിരുദ്ധ പ്രവര്‍ത്തനങ്ങളും എല്‍ഡിഎഫ് സര്‍ക്കാര്‍ നടത്തിയ വികസന പ്രവര്‍ത്തനങ്ങളും ഉള്‍ക്കൊള്ളിച്ചാണ് പ്രസംഗിക്കേണ്ടതെന്നും നേതാക്കള്‍ക്ക് നിര്‍ദ്ദേശം നല്‍കിയിട്ടുണ്ട്. ഓരോ പ്രദേശത്തെയും പ്രാധാന്യമര്‍ഹിക്കുന്ന വിഷയങ്ങള്‍ക്കു മുന്‍ഗണന നല്‍കിയായിരിക്കണം പ്രസംഗിക്കേണ്ടത്.

ഏറ്റവും പുതിയ തെരഞ്ഞെടുപ്പ് സര്‍വേ കണ്ടും സിപിഎം ഞെട്ടിയിരിക്കുകയാണ്. ഇത്രയും പ്രബല സ്ഥാനാര്‍ത്ഥികളെ നിര്‍ത്തിയിട്ടും സിപിഎമ്മിന് വെറും 3 സീറ്റാണ് സര്‍വേ നല്‍കുന്നത്. ശബരിമല വിഷയമാണ് കോണ്‍ഗ്രസിന് 16 സീറ്റ് നേടിക്കൊടുക്കുന്നത്. ഒരു സീറ്റ് ബിജെപി നേടുമെന്നും പറയുന്നു.

ദേശീയ തലത്തില്‍ ബിജെപിയുടെ കൂറ്റന്‍ വിജയം വീണ്ടും ഉണ്ടാകുമെന്നും സര്‍വേ പറയുന്നു .ഈ ലോക്‌സഭാ തിരഞ്ഞെടുപ്പില്‍ ബിജെപിക്ക് ഒറ്റയ്ക്ക് 250 സീറ്റുകള്‍ ലഭിക്കും എന്നാണ് ഇവിടുത്തെ പ്രവചനം. എന്‍ഡിഎ ഭരണം നിലനിര്‍ത്തുമെന്നും എന്‍ഡിഎയ്ക്ക് ഇത്തവണ 300 മുതല്‍ 310 വരെ സീറ്റുകളില്‍ വിജയം ഉറപ്പാണെന്നുമാണ് സട്ടാ മാര്‍ക്കറ്റിലെ പ്രവചനം.പുല്‍വാമ ഭീകരാക്രമണവും ഇന്ത്യ നല്‍കിയ ശക്തമായ തിരിച്ചടിയുമാണ് ബിജെപിയുടെ കൂറ്റന്‍ വിജയത്തിന് കാരണമാവുക എന്നും ഇവര്‍ പ്രവചിക്കുന്നു.

അതേസമയം വിവിധ സീറ്റുകളെ ചൊല്ലി കോണ്‍ഗ്രസിലും ബിജെപിയിലും ഇപ്പോഴും തര്‍ക്കം തുടരുകയാണ്. കോണ്‍ഗ്രസില്‍ വടകര സീറ്റില്‍ ഇതുവരേയും പറ്റിയ സ്ഥാനാര്‍ത്ഥിയെ കണ്ടെത്താനായില്ല. ബിജെപിയിലാകട്ടെ കൂട്ട അടിയാണ്. സുരേന്ദ്രന് പറ്റിയ സീറ്റ് കിട്ടാത്തതാണ് തര്‍ക്കം. കണ്ണന്താനം ഉള്‍പ്പെടെ എല്ലാവര്‍ക്കും പത്തനംതിട്ടയോടാണ് നോട്ടം. എന്നാല്‍ ഈ തര്‍ക്കം ഇന്നത്തോടെ തീരാനാണ് സാധ്യത. അതു കഴിഞ്ഞ് സ്ഥാനാര്‍ത്ഥിയെ പ്രഖ്യാപിച്ചാല്‍ തെരഞ്ഞെടുപ്പ് ഗോദയില്‍ കോണ്‍ഗ്രസും ബിജെപിയും സിപിഎമ്മിനെതിരെ ആഞ്ഞടിക്കും. അതും സിപിഎം മറക്കാന്‍ ശ്രമിക്കുന്ന ശബരിമലയുടെ പേരില്‍ തന്നെ...