കനാല്വെള്ളം പങ്കുവയ്ക്കുന്നതിനെ ചൊല്ലിയുള്ള തര്ക്കത്തെ തുടര്ന്ന് ഗ്രാമപഞ്ചായത്തംഗത്തെ വെട്ടി; പ്രതികള്ക്കായി അന്വേഷണം ഊര്ജിതമാക്കി
കനാലിലൂടെയുള്ള ജലം തടഞ്ഞതിനെ ഗ്രാമപഞ്ചായത്ത് അംഗം ചോദ്യം ചെയ്തതിനെ തുടര്ന്ന് അദ്ദേഹത്തെ വെട്ടിയ പ്രതികള്ക്കായി അന്വേഷണം ഊര്ജിതമാക്കി. സിപിഎം ചെന്നിത്തല തൃപ്പെരുന്തറ ലോക്കല് കമ്മറ്റിയംഗവും ഗ്രാമപഞ്ചായത്ത് മൂന്നാം വാര്ഡ് അംഗവുമായ ഇരമത്തൂര് കോട്ടയില് സജി ഭവനത്തില് ഗോപാലകൃഷ്ണനാ(53)ണ് വെട്ടേറ്റത്. മഴു,വടിവാള് എന്നിവ കൊണ്ട് നാലംഗ സംഘമാണ് അക്രമണം നടത്തിയെതെന്ന് നാട്ടുകാര് പറഞ്ഞു. കാലിന് ഗുരുതരമായി വെട്ടേറ്റ ഗോപാലകൃഷ്ണന് കോട്ടയം മെഡിക്കല് കോളേജ് ആശുപത്രിയില് ചികിത്സയിലാണ്.
സംഭവത്തെക്കുറിച്ച് പോലീസ് പറയുന്നത്: ചെന്നിത്തല,മാന്നാര് പാടശേഖരങ്ങളിലേക്ക് വെള്ളം എത്തിക്കുന്ന ഇറിഗേഷന് കനാല് അറ്റകുറ്റ പണികള് നടത്തി ഉപയോഗപ്രദമാക്കിയത് രണ്ട് ദിവസം മുമ്പാണ്. ചെന്നിത്തല ആറാം ബ്ലോക്കിലേക്കും ചെന്നിത്തല പുഞ്ചയുടെ വടക്കന് ഭാഗങ്ങളിലേക്കും മാന്നാറിലെ ഇരമത്തൂര്, മുണ്ടുവേലി, കോട്ടക്കുഴി ഭാഗത്തേക്കുമാണ് ഈ വെള്ളം ഉപയോഗിച്ചിരുന്നത്.
വടക്കേ പാടശേഖരത്തിലേക്ക് പോകേണ്ട വെള്ളം ചിലര് മുട്ടിട്ട് തടസ്സപ്പെടുത്തിയതാണ് പ്രശ്നങ്ങള്ക്ക് തുടക്കമായത്. എല്ലായിടങ്ങളിലേക്കും വെള്ളം എത്തിക്കുവാന് വേണ്ടി കൃഷി ഓഫീസറും മാന്നാര് ഗ്രാമപഞ്ചായത്ത് പ്രസിഡന്റും സ്ഥലത്തെത്തി മുട്ടുകള് മാറ്റി. ഇവര് പോയികഴിഞ്ഞപ്പോള് വീണ്ടും മുട്ടിട്ടുവെങ്കിലും അധികൃതര് തുറന്നുവിട്ടു. ഇത് പല തവണ ആവര്ത്തിക്കുകയും ചെയ്തു.
ഇതിനിടയിലാണ് ചെന്നിത്തല വടക്കേ പുഞ്ചയിലേക്ക് വെള്ളം എത്താത്തത് ചോദ്യം ചെയ്യാന് ഗ്രാമപഞ്ചായത്തംഗം എത്തിയത്. വാക്ക് തര്ക്കത്തിനൊടുവില് നാലംഗ സംഘം മാരകായുധങ്ങളുമായി അക്രമിക്കുകയായിരുന്നു. കേസെടുത്ത് അന്വേഷണം ശക്തമാക്കിയതായി മാന്നാര് സ്റ്റേഷന് ഹൗസ് ആഫീസര് ജോസ്മാത്യു പറഞ്ഞു.
https://www.facebook.com/Malayalivartha