കേരളത്തിലെ കോണ്‍ഗ്രസ് തന്റെ കയ്യിലാണെന്ന് ഉമ്മന്‍ചാണ്ടി വീണ്ടും തെളിയിച്ചിരിക്കുന്നു. കോണ്‍ഗ്രസ് അധ്യക്ഷന്‍ രാഹുല്‍ഗാന്ധി പോലും ഉമ്മന്‍ചാണ്ടിയുടെ സമ്മര്‍ദ്ദത്തിന് വഴങ്ങുന്നതാണ് കഴിഞ്ഞ ദിവസം ഡല്‍ഹിയില്‍ കണ്ടത്. ആവനാഴിയിലെ അവസാനത്തെ അമ്പും പ്രയോഗിച്ചിട്ടും അമ്പേ പരാജയപ്പെട്ട ചെന്നിത്തല ചര്‍ച്ചകള്‍ പൂര്‍ത്തിയാക്കും മുമ്പ് ഡല്‍ഹിയില്‍ നിന്ന് വിമാനം കയറേണ്ടിവന്നു. ഐ ഗ്രൂപ്പിന്റെ സിറ്റിംഗ് സീറ്റായ വയനാടിനെ ചൊല്ലിയായിരുന്നു തര്‍ക്കം. എം.ഐ ഷാനവാസ് മരിച്ചതോടെ ആ സീറ്റില്‍ കോഴിക്കോട് ഡി.സി.സി പ്രസിഡന്റ് ടി. സിദ്ധിഖിനെ നിര്‍ത്തണമെന്ന് ഉമ്മന്‍ചാണ്ടി വാശിപിടിച്ചു. വടകര സിദ്ധിഖിന് നല്‍കി ചെന്നിത്തല ഒത്തുതീര്‍പ്പിന് മുതിര്‍ന്നെങ്കിലും ചീറ്റിപ്പോയി.

വയനാട് സീറ്റിനെ ചൊല്ലിയുള്ള തര്‍ക്കം പ്രവര്‍ത്തകരിലും ജനങ്ങളിലും മോശമായ അഭിപ്രായമാണ് സൃഷ്ടിക്കുന്നതെന്ന ആശങ്ക ഹൈക്കമാന്‍ഡും പങ്കുവെച്ചു. അങ്ങനെ ജനപിന്തുണ ഏറ്റവും കൂടുതലുള്ള നേതാവെന്ന നിലയില്‍ ഉമ്മന്‍ചാണ്ടിയുടെ ആവശ്യത്തിന് ഹൈക്കമാന്‍ഡ് വഴങ്ങുകയായിരുന്നു. ചാലക്കുടിയില്‍ തന്റെ വലം കയ്യായ ബെന്നിബഹാന് സീറ്റ് വാങ്ങിക്കൊടുക്കുന്നതിലും ഉമ്മന്‍ചാണ്ടി വിജയിച്ചു. അതേസമയം എറണാകുളം മണ്ഡലം കെ.വി തോമസില്‍ നിന്ന് പിടിച്ചെടുത്ത് ഹൈബി ഈഡന് നല്‍കുകമാത്രമാണ് ചെന്നിത്തലയ്ക്ക് ആശ്വാസമായത്. അടൂര്‍ പ്രകാശും ഷാനിമോള്‍ ഉസ്മാനും വി.കെ ശ്രീകണ്ഠനും ഐ ഗ്രൂപ്പ് എന്ന നിലയിലാണ് സീറ്റ് ലഭിച്ചതെങ്കിലും അവരാരും ചെന്നിത്തലുമായി അത്ര അടുപ്പത്തിലല്ല. ശ്രീകണ്ഠന്‍ കെ.സിയുടെ അടുപ്പക്കാരനാണ്. സോളാര്‍ വിവാദത്തെ തുടര്‍ന്ന് അടൂര്‍ പ്രകാശിന് കഴിഞ്ഞ തവണ നിയമസഭാ സീറ്റ് നിഷേധിക്കുന്ന സാഹചര്യം ഉണ്ടായപ്പോള്‍ ചെന്നിത്തല കൈമലര്‍ത്തിയിരുന്നു.

അന്ന് ഉമ്മന്‍ചാണ്ടിയാണ് അടൂര്‍പ്രകാശിനെ മത്സരിപ്പിക്കണമെന്ന് വാശിപിടിച്ചത്. അതാണ് ഉമ്മന്‍ചാണ്ടിയുടെ ഏറ്റവും വലിയ ഗുണം. കെ.ബാബുവിന് സീറ്റ് കൊടുക്കില്ലെന്ന് പറഞ്ഞെങ്കിലും അദ്ദേഹം ഇടപട്ട് അത് തരപ്പെടുത്തി. കൂടെ നില്‍ക്കുന്നവരെ സംരക്ഷിക്കുകയും അവര്‍ക്ക് വേണ്ടി വാദിക്കുകയും സീറ്റ് വാങ്ങുക്കൊടുക്കുകയും ചെയ്യുന്നത് കൊണ്ടാണ് നേതാക്കളും പ്രവര്‍ത്തകരും അദ്ദേഹത്തിനൊപ്പം നില്‍ക്കുന്നത്. ചെന്നിത്തലയുടെ അടുപ്പക്കാരായ കെ.സുധാകരന്‍ എന്നേ അകന്നു. കൂടെ നില്‍ക്കുന്നവരെ സഹായിക്കില്ല എന്നൊരു ചീത്തപ്പേര് ചെന്നിത്തലയ്ക്ക് ഉണ്ട്. അതുകൊണ്ടാണ് പല നേതാക്കളും അദ്ദേഹത്തിനൊപ്പം കട്ടയ്ക്ക് നില്‍ക്കാത്തതെന്നും ആക്ഷേപമുണ്ട്.

കഴിഞ്ഞ നിയമസഭാ തെരഞ്ഞെടുപ്പില്‍ ഉമ്മന്‍ചാണ്ടിയുടെ വലം കയ്യായിരുന്ന ഡൊമനിക് പ്രസന്റേഷന്‍, ശിവദാസന്‍ നായര്‍, പി.സി വിഷ്ണുനാഥ്, കെ.ബാബു എന്നിവര്‍ പരാജയപ്പെട്ടത് കൊണ്ട് മാത്രമാണ് ചെന്നിത്തലയ്ക്ക് പ്രതിപക്ഷനേതാവാകാന്‍ പറ്റിയത്. ഈ നാല് പേരും ജയിക്കുകയും ബെന്നിബഹാന് സിറ്റ് നല്‍കുകയും ചെയ്തിരുന്നെങ്കില്‍ അഞ്ച് എം.എല്‍.എമാരെ എ ഗ്രൂപ്പിന് ലഭിക്കുമായിരുന്നു. അങ്ങനെ വരുമ്പോള്‍ പാര്‍ലമെന്ററി പാര്‍ട്ടിയില്‍ ഉമ്മന്‍ചാണ്ടിക്ക് ഭൂരിപക്ഷം കൂടിയേനെ. അത് മനസിലാക്കിയാണ് പ്രതിപക്ഷനേതൃസ്ഥാനത്തേക്ക് ഇല്ലെന്ന് ഉമ്മന്‍ചാണ്ടി ആദ്യമേ വ്യക്തമാക്കിയിരുന്നു.

ചെന്നിത്തല മറ്റൊരു തിരിച്ചടികൂടി നേരിടുന്നുണ്ട്. ഐ ഗ്രൂപ്പിലുള്ള പലരും ഇപ്പോള്‍ കെ.സി വേണുഗോപാലിനൊപ്പം ചുവടുറപ്പിക്കുകയാണ്. താഴേത്തട്ടിലാണിത് കൂടുതലും. എന്‍.എസ്.എസിന്റെ പിന്തുണ കൂടി കെ.സിക്ക് ഉള്ളത് കൊണ്ട് സമുദായപരമായും ചെന്നിത്തലയ്ക്ക് വലിയ തിരിച്ചടിയാണ്.