സംസ്ഥാനത്തെ ഒട്ടേറെ വിവാഹത്തട്ടിപ്പ് കേസുകളില്‍ പ്രതിയായ യുവതിയെ കായംകുളം പൊലീസ് അറസ്റ്റ് ചെയ്തു. സിഐ പി.കെ.സാബുവിന്റെ നേതൃത്വത്തിലുള്ള പൊലീസ് സംഘമാണ് മലപ്പുറം, കൊണ്ടോട്ടി ചീക്കോട് പുളിക്കലക്കണ്ടിവെട്ടുപാറ ദേശത്ത് കുളമ്പലത്ത് മണ്ണാറക്കല്‍ വീട്ടില്‍ വി.ശാലിനിയെ (33)ഇന്നലെ അറസ്റ്റ് ചെയ്തത്.

വിവാഹമോചിതനായ പുതുപ്പള്ളി സ്വദേശി സുധീഷ്ബാബു പത്രപ്പരസ്യത്തിലൂടെയാണ് ശാലിനിയെ പരിചയപ്പെട്ടത്. വാരണപ്പള്ളി ക്ഷേത്രത്തില്‍ വച്ച് ഇക്കഴിഞ്ഞ അഞ്ചിന് വിവാഹം കഴിച്ച ശേഷമാണ് തട്ടിപ്പ് തിരിച്ചറിയുന്നത്. ഈ വര്‍ഷം ആദ്യം മുതല്‍ യുവാവുമായി ഫോണിലൂടെ സംസാരിച്ചിരുന്ന ശാലിനി തിരുവനന്തപുരം മണ്ണന്തല സ്വദേശിയാണെന്നും ആദ്യ ഭര്‍ത്താവ് മരിച്ചു പോയതാണെന്നും പറഞ്ഞാണ് പരിചയപ്പെട്ടത്.

എല്‍എല്‍ബി, എല്‍എല്‍എം ബിരുദങ്ങളുള്ള താന്‍ മലപ്പുറം മഞ്ചേരി ഗവ.ഹയര്‍ സെക്കന്‍ഡറി സ്‌കൂള്‍ അധ്യാപികയായിരുന്നു എന്നും മജിസ്‌ട്രേറ്റ് ആയി ജോലി ലഭിച്ചതിനെ തുടര്‍ന്നു രാജി വച്ചെന്നും യുവാവിനോട് പറഞ്ഞിരുന്നു.

ഇതിനിടെ യുവാവിന്റെ കൈയ്യില്‍ നിന്നു 3 പവന്റെ സ്വര്‍ണമാല വാങ്ങിയ ശാലിനി തിരിച്ച് 5 പവന്റെ സ്വര്‍ണ മാല നല്‍കി വിശ്വാസം നേടി.തുടര്‍ന്ന് കഴിഞ്ഞ അഞ്ചിന് വാരണപ്പള്ളി ക്ഷേത്രത്തില്‍ വച്ച് വിവാഹം നടന്നു. ഒരുമിച്ചു താമസിച്ചു വന്ന ഈ കാലയളവില്‍ 6 പവന്റെ സ്വര്‍ണമാലയും ശാലിനി യുവാവിനെക്കൊണ്ട് വാങ്ങിപ്പിച്ചു സ്വന്തമാക്കി.

ഇരുവരും കഴിഞ്ഞ ദിവസം ഓച്ചിറ ക്ഷേത്രദര്‍ശനം കഴിഞ്ഞ് മടങ്ങുമ്പോള്‍ സുധീഷിന്റെ കൂട്ടുകാര്‍ കാണുകയും ശാലിനിയെ തിരിച്ചറിയുകയുമായിരുന്നു. ഇവര്‍ സുധീഷിനെ വിവരം ധരിപ്പിക്കുകയും മുന്‍പുള്ള തട്ടിപ്പുകളില്‍ പിടിക്കപ്പെട്ട ശാലിനിയുടെ ദൃശ്യങ്ങള്‍ കാണിക്കുകയും ചെയ്തു. തുടര്‍ന്ന് യുവാവ്, സ്വര്‍ണാഭരണങ്ങള്‍ പരിശോധിച്ചപ്പോള്‍ മുക്കുപണ്ടങ്ങളാണെന്നു തിരിച്ചറിഞ്ഞു ഇന്നലെ പൊലീസില്‍ പരാതി നല്‍കി.

ഇതിനിടെ സംശയം തോന്നിയ ശാലിനി രക്ഷപ്പെടാനായി വീട്ടില്‍ നിന്ന് ഇറങ്ങിയിരുന്നു. തുടര്‍ന്ന് കെഎസ്ആര്‍ടിസി സ്റ്റാന്‍ഡില്‍ നിന്ന് യുവതിയെ കയ്യോടെ പിടികൂടി. സമാനമായതും അല്ലാത്തതുമായ നിരവധി കേസുകള്‍ പത്തനംതിട്ട, ആലപ്പുഴ, കോട്ടയം ജില്ലകളില്‍ ശാലിനിക്ക് എതിരേയുണ്ടെന്ന് പൊലീസ് പറഞ്ഞു.