വ്യാജപരാതിയില്‍ കേസെടുത്ത് നിരപരാധിയെ ജയിലിലടച്ച എസ്.ഐയ്ക്കെതിരെ നടപടിയെടുക്കണമെന്ന മനുഷ്യാവകാശ കമ്മിഷന്‍ ഉത്തരവു ലംഘിച്ചെന്നു ചൂണ്ടിക്കാട്ടി ഒല്ലൂര്‍ സ്വദേശി പോലീസിനെതിരേ ഒറ്റയാള്‍ സമരവുമായി രംഗത്ത്.

ഈ ആവശ്യം പറഞ്ഞുകൊണ്ട് കഴിഞ്ഞ ഫെബ്രുവരി 26 മുതല്‍ ഒല്ലൂര്‍ പോലീസ് സ്റ്റേഷനു മുമ്പില്‍ സമരമിരിക്കുകയാണ് ഒല്ലൂര്‍ സ്വദേശി കോനിക്കര റപ്പായി.

വാഹനമോടിച്ച് ഒരാളെ വധിക്കാന്‍ ശ്രമിച്ചെന്ന പരാതിയില്‍ അന്നത്തെ ഒല്ലൂര്‍ എസ്.ഐ. പ്രശാന്ത് ക്ലിന്റ്, വാഹനം ഓടിക്കാനറിയാത്ത റപ്പായിയുടെ പേരില്‍ കേസെടുക്കുകയും ജയലില്‍ റിമാന്റ് ചെയ്യുകയും ചെയ്തു.

മുന്‍ വൈരാഗ്യപ്രകാരമാണ് തനിക്കെതിരെ എസ്.ഐ. കേസെടുത്തതെന്നും എസ്.ഐ യെക്കൂടാതെ എ.എസ്.ഐ. ടി.വി. ശിവദാസിനെതിരെയും നടപടിയെടുക്കണമെന്നും ആവശ്യപ്പെട്ടാണ് റപ്പായി മനുഷ്യാവകാശ കമ്മിഷന് പരാതി നല്‍കിയത്.

ഇവര്‍ അധികാര ദുര്‍വിനിയോഗം നടത്തിയെന്നും അന്വേഷണം പൂര്‍ത്തിയാക്കി നിയമാനുസൃത നടപടി സ്വീകരിക്കണമെന്ന് മനുഷ്യാവകാശ കമ്മിഷന്‍ 2018 മേയ് 31-ന് നല്‍കിയ ഉത്തരവ് ഇതുവരെ പാലിച്ചിട്ടില്ലെന്നും റപ്പായി പറയുന്നു.

ഇതിനെതിരെ മനുഷ്യാവകാശ കമ്മിഷന് വീണ്ടും പരാതി നല്‍കിയതായും പ്രതികളായ പോലീസുദ്യോഗസ്ഥര്‍ക്കെതിരെ ഉത്തരവനുസരിച്ച് മാനനഷ്ടക്കേസടക്കമുള്ള നടപടികള്‍ സ്വീകരിക്കുമെന്നും മതിയായ ശിക്ഷാ നടപടികള്‍ പോലീസ് ഉന്നതാധികാരികള്‍ സ്വീകരിക്കുന്നതുവരെ പോലീസ് സ്റ്റേഷനു മുമ്പിലെ സമരം തുടരുമെന്നുമുള്ള നിലപാടിലാണ് റപ്പായി.