സ്ത്രീ പീഡന വിവാദത്തില് പാര്ട്ടിയില് നിന്ന് പുറത്താക്കിയ ഷൊര്ണൂര് എം.എല്.എ പി.കെ ശശിയെ തെരഞ്ഞെടുപ്പ് പ്രചരണത്തില് ഒപ്പം കൂട്ടിയാല് തിരിച്ചടിയാകുമെന്ന് പാലക്കാട് ലോക്സഭാ മണ്ഡലം എല്.ഡി.എഫ് സ്ഥാനാര്ത്ഥി എം.ബി രാജേഷിന് ഭീതി
സ്ത്രീ പീഡന വിവാദത്തില് പാര്ട്ടിയില് നിന്ന് പുറത്താക്കിയ ഷൊര്ണൂര് എം.എല്.എ പി.കെ ശശിയെ തെരഞ്ഞെടുപ്പ് പ്രചരണത്തില് ഒപ്പം കൂട്ടിയാല് തിരിച്ചടിയാകുമെന്ന് പാലക്കാട് ലോക്സഭാ മണ്ഡലം എല്.ഡി.എഫ് സ്ഥാനാര്ത്ഥി എം.ബി രാജേഷിന് ഭീതി. ഷൊര്ണൂര് മേഖലയില് പലയിടത്തും ശശി ഒപ്പം വന്നെങ്കിലും ഫോട്ടോകളില് നിന്ന് രാജേഷ് അദ്ദേഹത്തെ വെ്ട്ടിമാറ്റി. എന്നാല് പാര്ട്ടി പത്രമായ ദേശാഭിമാനിയില് ഇരുവരും തമ്മിലുള്ള ചിത്രം അടിച്ചുവരുകയും ചെയ്തു.
കഴിഞ്ഞ ദിവസം ചെര്പ്പുളശ്ശേരി വെള്ളിനേഴിയില് പത്മഭൂഷന് കലാമണ്ഡലം രാമന്കുട്ടിയാശാന്റെ വീട് സന്ദര്ശിക്കുമ്പോള് എം.ബി രാജേഷിനൊപ്പം പി.കെ ശശി എം.എല്.എയും ഉണ്ടായിരുന്നു. പിറ്റേന്ന്് പാര്ട്ടി പത്രമായ ദേശാഭിമാനിയില് ഫോട്ടോ അതേപടി അച്ചടിച്ചുവന്നപ്പോള് മറ്റു പത്രങ്ങളിലെ ഫോട്ടോയില് ശശിയെ കാണാനില്ല. ഈ ഫോട്ടോഷോപ്പ് കളി എന്താണെന്ന് മാധ്യമ പ്രവര്ത്തകര് അന്വേഷിച്ചപ്പോഴാണ് പാര്ട്ടിയിലെ വെട്ടിക്കളി പുറത്തായത്.
എം.ബി രാജേഷിന്റെ ഓഫീസില് നിന്നും മറ്റു പത്രങ്ങള്ക്ക് ഫോട്ടോ നല്കിയപ്പോള് പി.കെ ശശിയുടെ ഫോട്ടോ ക്രോപ്പ് ചെയ്താണ് നല്കിയത്. കൂടാതെ രാജേഷിന്റെ മീഡിയാ വാട്സ്ആപ്പ് ഗ്രൂപ്പില് വന്ന ഫോട്ടോയിലും ശശി ഇല്ലായിരുന്നു. എന്നാല് ശശിയെ ഒതുക്കാന് പാര്ട്ടി പത്രം തയ്യാറായില്ല. സംഭവം അറിഞ്ഞ പി.കെ ശശി കട്ടക്കലിപ്പിലാണ്. വിവാദത്തിന് ശേഷം പി.കെ ശശി പങ്കെടുക്കുന്ന പരിപാടികളില് നിന്നും എം.ബി രാജേഷ് പലപ്പോഴും വിട്ടു നിന്നിരുന്നു. പരാജയ ഭീതിയെ തുടര്ന്നാണിതെന്നാണ് പറയുന്നത്. ജില്ലയില് മുമ്പെങ്ങുമില്ലാത്ത വിധം സി.പി.എം-സി.പി.ഐ പോര് രൂക്ഷമായതും ഇടതുമുന്നണിക്ക് തലവേദനയാകുന്നു. തെരഞ്ഞെടുപ്പിന് മുമ്പ് പ്രശ്നങ്ങള് പരിഹരിക്കാന് നേതാക്കള് ശ്രമിച്ചെങ്കിലും സി.പി.ഐ കേന്ദ്രങ്ങളായ അട്ടപ്പാടി, തച്ചമ്പാറ, കുമരംപുത്തൂര്, തെങ്കര, കാഞ്ഞിരപ്പുഴ പഞ്ചായത്തുകളില് ചേരിപ്പോര് രൂക്ഷമാണ്.
കഴിഞ്ഞ ദിവസം നടന്ന കുമരംപുത്തൂര് പഞ്ചായത്ത് എല്.ഡി.എഫ് കണ്വന്ഷന് സി.പി.ഐ ബഹിഷ്കരിച്ചിരുന്നു. രണ്ടുതവണ എം.പിയായ എ.ബി രാജേഷിന് ഇത്തവണയും സീറ്റുനല്കി മണ്ഡലം നിലനിര്ത്താനാകുമെന്നാണ് സി.പി.എം കണക്കൂകൂട്ടുന്നത്. എന്നാല് പാര്ട്ടിയിലെ ഗ്രൂപ്പിസവും മുന്നണിയിലെ അസ്വാരസ്യവും കീറാമുട്ടിയായി തുടരുകയാണ്. ശശിക്കെതിരായ പ്രശ്നം ഉയര്ന്ന് വന്നപ്പോള് തന്ത്രപരമായ നിലപാടാണ് രാജേഷ് എടുത്തത്. അതിനാല് പി.കെ ശശി 'പണി' തരുമെന്ന് രാജേഷിന് ആശങ്കയുണ്ട്. കഴിഞ്ഞ നിയമസഭാ തെരഞ്ഞെടുപ്പില് മണ്ണാര്ക്കാട്ട് സി.പി.ഐ സ്ഥാനാര്ത്ഥിയും ജില്ലാ സെക്രട്ടറിയുമായ കെ.പി സുരേഷ് രാജിനെ പരാജയപ്പെടുത്താന് സി.പി.എമ്മിലെ ജില്ലാ നേതാക്കളില് ചിലര് ശ്രമിച്ചെന്നാണ് ആരോപണം.
മാത്രമല്ല കുമരംപുത്തൂര് സഹകരണ ബാങ്ക് തെരഞ്ഞെടുപ്പില് സി.പി.ഐ ഒഴിവാക്കി ഹൗസിങ് സൊസൈറ്റി സി.പി.എം പിടിച്ചെടുത്തതും അവരെ പ്രകോപിതരാക്കി. അതോടെ എല്.ഡി.എഫ് ഭരിച്ചിരുന്ന തെങ്കര പഞ്ചായത്തിലെ സി.പി.ഐ അംഗം രാജിവെച്ചു. യു.ഡി.എഫ് പഞ്ചായത്ത് പിടിച്ചടക്കുകയും ചെയ്തു. കുമരംപുത്തൂരിലെ സി.പി.എമ്മിന്റെ കാലുവാരലിന് ലോക്സഭാ തെരഞ്ഞെടുപ്പില് സി.പി.ഐ തിരിച്ചടി നല്കുമോ എന്ന് കാത്തിരുന്ന് കാണാം. അതേസമയം യു.ഡി.എഫ് സ്ഥാനാര്ത്ഥി വി.കെ ശ്രീകണ്ഠന് പോപ്പുലറല്ലാത്തതും കെ.സി വേണുഗോപാലിന്റെ വലംകയ്യായതും കാരണം എ, ഐ ഗ്രൂപ്പുകള് പണി കൊടുക്കുമെന്ന പ്രതീക്ഷയിലാണ് സി.പി.എം.
https://www.facebook.com/Malayalivartha
