അഞ്ച് ജില്ലകളില്‍ ഒട്ടേറെ വിവാഹ തട്ടിപ്പുകള്‍ നടത്തിയ കേസില്‍ തിരുവനന്തപുരം മണ്ണന്തല കൊട്ടാരത്തില്‍ ശാലിനിയെ (35) കായംകുളം പോലീസ് അറസ്റ്റ് ചെയ്തു. സമാന രീതിയിലെ കേസുകളില്‍ അകത്തായി ജാമ്യം കിട്ടി പുറത്തിറങ്ങി വീണ്ടും ഇവര്‍ തട്ടിപ്പ് നടത്തിയവരുകയായിരുന്നെന്ന് പോലീസ് കണ്ടെത്തി. കൂടുതലും പരസ്യങ്ങളിലൂടെയാണ് വിവാഹ തട്ടിപ്പ് നടത്തിയിരുന്നത്. കായംകുളം പുതുപ്പള്ളി സ്വദേശി സുധീഷ്ബാബു കായംകുളം പൊലീസിന് നല്‍കിയ പരാതിയിലാണ് ഇവര്‍ പിടിയിലായത് . വിവാഹ മോചിതനായ സുധീഷ്ബാബു നല്‍കിയ വിവാഹ പരസ്യത്തിലൂടെ പരിചയപ്പെട്ട ശാലിനിയെ കഴിഞ്ഞ അഞ്ചിന് വാരണപ്പള്ളി ക്ഷേത്രത്തില്‍ വിവാഹം കഴിച്ച ശേഷമാണ് ഇവരുടെ തട്ടിപ്പ് തിരിച്ചറിയുന്നത്. സംസ്ഥാനത്തെ നിരവധി സ്‌റ്റേഷനുകളില്‍ വിവാഹതട്ടിപ്പിന് ഇവര്‍ക്കെതിരെ കേസ് നിലവിലുണ്ട്.

ഓച്ചിറ ക്ഷേത്ര ദര്‍ശനത്തിനിടെ ശാലിനിയുടെ തട്ടിപ്പുകള്‍ അറിയാവുന്ന ഒരാള്‍ കണ്ടതാണ് പിടിയിലാകാന്‍ കാരണമായത്. ഇദ്ദേഹം നല്‍കിയ സൂചനകളാണ് കൂടുതല്‍ തട്ടിപ്പില്‍ നിന്നും സുധീഷ്ബാബു രക്ഷപ്പെടാനും കാരണമായത്. ഇയാളുടെ പേരിലുള്ള വസ്തുവായിരുന്നു ശാലിനി നോട്ടമിട്ടിരുന്നതെന്നു പറയുന്നു .

മഞ്ചേരി ഗവ. ഹയര്‍ സെക്കന്‍ഡറി സ്‌കൂള്‍ അധ്യാപിക എന്ന നിലയിലാണ് പരിചയപ്പെടുന്നത്. വിവാഹിതയാണെന്നും ഭര്‍ത്താവ് മരണപ്പെട്ടതായും പറഞ്ഞു. തുടര്‍ന്ന് എറണാകുളത്തുവച്ച് നേരില്‍ കണ്ട്. മാതാപിതാക്കള്‍ ചെറുപ്പത്തിലെ മരണപ്പെട്ടതിനാല്‍ മറ്റ് ബന്ധുക്കളില്ലെന്നും ഭര്‍ത്താവിന്റെ സഹോദരിയുടെ സംരക്ഷണയിലാണ് കഴിയുന്നതെന്നും അറിയിച്ചു. ഭര്‍തൃസഹോദരിയെന്ന പേരില്‍ ആരോ ഫോണിലും വിളിച്ചിരുന്നു.

വിവാഹാവശ്യത്തിന് ഉടനെ പണം സംഘടിപ്പിക്കാനുള്ള പ്രയാസം അറിയിച്ചപ്പോള്‍ രണ്ടര പവന്‍ ആഭരണം പണയം വെക്കാനായും നല്‍കി. ഇതിനിടെ വീടിന്റെ ബാധ്യത അറിഞ്ഞപ്പോള്‍ ഇത് തീര്‍ക്കാനായി 1,75,000 രൂപയുടെ ചെക്ക് നല്‍കിയെങ്കിലും തുകയില്ലാത്തതിനാല്‍ മടങ്ങി. ഇതിനിടെയാണ് തട്ടിപ്പുകാരിയാണെന്ന വിവരം ലഭിക്കുന്നത്. തുടര്‍ന്ന് സുധീഷ്ബാബുവിന്റെ വീട്ടിലെത്തിയ പോലീസ് തന്ത്രപരമായി ഇവരെപിടികൂടുകയായിരുന്നു.

മലപ്പുറം കൊണ്ടോട്ടി പുളിക്കലക്കണ്ടിവെട്ടുപാറ കുളന്പത്ത് മണ്ണാറക്കല്‍ എന്ന വിലാസവും ഇവര്‍ താമസിക്കുന്ന സ്ഥലമായി പൊലീസിന് നല്‍കിയിട്ടുണ്ട്. യുവാവില്‍ നിന്നും മൂന്നുപവന്റെ മാല വാങ്ങി പകരമായി യുവാവിന് സ്‌നേഹ സമ്മാനമെന്ന് പറഞ്ഞു അഞ്ചപവന്റെമാലയെന്ന് പറഞ്ഞു മറ്റൊരു മാല നല്‍കുകയും ചെയ്തു. കഴിഞ്ഞ ദിവസം യുവാവിന്റെ സുഹൃത്തുക്കള്‍ കണ്ട് ശാലിനിയെ തിരിച്ചറിയുകയും, തുടര്‍ന്ന് സുഹുത്തുക്കള്‍ യുവാവിനെ ഫോണില്‍ വിളിച്ചു വരുത്തി വിവരങ്ങള്‍ പറയുകയും ചെയ്തു.

മുന്പ് സമാനരീതിയില്‍ ഇവര്‍ തട്ടിപ്പ് നടത്തി ചാനലുകളില്‍ വന്ന ദൃശ്യങ്ങള്‍ സുഹൃത്തുക്കള്‍ യുവാവിനെ കാണിക്കുകയും ചെയ്തപ്പോഴാണ് യുവാവിന് തട്ടിപ്പ് മനസിലായത്. തനിക്ക് പറ്റിയ തട്ടിപ്പു മനസിലായതിനെ തുടര്‍ന്ന് യുവാവ് തനിക്ക് നല്‍കിയ മാലയും വിവാഹത്തിന് തന്റെ വീട്ടുകാര്‍ക്ക് നല്‍കിയ ആഭരണങ്ങളും പരിശോധിച്ചപ്പോഴാണ് തനിക്ക് നല്‍കിയത് മുക്കുപണ്ടങ്ങളാണെന്ന് മനസിലായത്.

തുടര്‍ന്ന് യുവാവ് കായംകുളം സ്‌റ്റേഷനിലെത്തി ശാലിനിക്ക് എതിരെ കേസ് നല്‍കുകയായിരുന്നു. തുടര്‍ന്ന് യുവാവിന്റെ പിന്നീടുള്ള പെരുമാറ്റത്തില്‍ സംശയം തോന്നിയ ശാലിനി രാവിലെ തന്നെ സ്ഥലം വിടുന്നതിനായി കായംകുളം കഐസ്ആര്‍ടിസി സ്റ്റാന്‍ഡില്‍ എത്തിയെങ്കിലും ബസ് കാത്തു നിലക്കുന്ന സമയം കായംകുളം സര്‍ക്കിള്‍ ഇന്‍സ്‌പെക്ടര്‍ വി.കെ.സാബുവിന്റെ നേതൃത്വത്തിലുള്ള സംഘം ബസ് സ്റ്റാന്‍ഡില്‍ നിന്നും ഇവരെ അറസ്റ്റ് ചെയ്യുകയായിരുന്നു.

സമാനരീതിയില്‍ ആലപ്പുഴ, കോട്ടയം, കൊല്ലം, പത്തനംതിട്ട, കായംകുളം എന്നിവിടങ്ങളില്‍ നിരവധി തട്ടിപ്പ് നടത്തിയതായി കണ്ടെത്തിയെന്നും പോലീസ് പറഞ്ഞു. കായംകുളം കോടതിയില്‍ ഹാജരാക്കിയതിനെ തുടര്‍ന്ന് ഇവരെ കോടതി റിമാന്റ് ചെയ്തു.