സി.പി.എം തെരഞ്ഞെടുപ്പ് പരാജയം സമ്മതിച്ചെന്നും കോലീബി സഖ്യമെന്ന കോടിയേരിയുടെ ആരോപണം അത് ശരിവയ്ക്കുന്നതാണെന്നും എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടി ആരോപിച്ചു. കോടിയേരി ബാലകൃഷ്ണന്‍ നൂറ് നുണ പറഞ്ഞാലും കേരളത്തിലെ ജനങ്ങള്‍ അത് വിശ്വസിക്കില്ല. യുഡിഎഫിനെ സഹായിക്കാന്‍ ബിജെപി ദുര്‍ബല സ്ഥാനാര്‍ഥികളെ നിര്‍ത്തുന്നെന്ന ആരോപണത്തിന് മറുപടി പറയുകയായിരുന്നു അദ്ദേഹം. പൊതുതെരഞ്ഞെടുപ്പില്‍ പ്രധാനമത്സരം ബിജെപിയും കോണ്‍ഗ്രസും തമ്മിലാണ്. നരേന്ദ്ര മോദിയും രാഹുല്‍ ഗാന്ധിയും തമ്മിലാണ്. സിപിഎമ്മിന് ചെയ്യുന്ന ഓരോ വോട്ടും പരോക്ഷമായി പ്രയോജനം ചെയ്യുന്നത് ബിജെപിക്കാണെന്നും ഉമ്മന്‍ ചാണ്ടി ചൂണ്ടിക്കാട്ടി.

തെരഞ്ഞെടുപ്പില്‍ കോണ്‍ഗ്രസ് റെക്കോര്‍ഡ് വിജയം നേടുമെന്നും ഉമ്മന്‍ചാണ്ടി പറഞ്ഞു. സി.പി.എമ്മിന്റെ അക്രമ- കൊലപാതക രാഷ്ട്രീയത്തിനെതിരെ കോണ്‍ഗ്രസ് നടത്തുന്ന പ്രചാരണം അവരെ ഭയപ്പെടുത്തുന്നുണ്ട്. അതില്‍ നിന്ന് ശ്രദ്ധ തിരിക്കാനാണ് കോടിയേരി അടക്കമുള്ള നേതാക്കളുടെ ശ്രമം. ആദ്യ യുപിഎ സര്‍ക്കാരിനെ മറിച്ചിടാന്‍ ബിജെപിക്കൊപ്പം വോട്ടു ചെയ്തവരാണ് കോടിയേരിയും പാര്‍ട്ടിയും. എന്നിട്ട് കോണ്‍ഗ്രസ് ബി.ജെ.പിയുമായി രഹസ്യബന്ധം നടത്തുന്നെന്ന് അവര്‍ ആക്ഷേപിക്കുന്നു. വടകരയില്‍ മുരളീധരന്‍ സ്ഥാനാര്‍ത്ഥിയായതോടെ എന്ത് ചെയ്യുമെന്നറിയാനാകാത്ത അവസ്ഥയിലാണ് ഇടത്പക്ഷെന്നും അദ്ദേഹം പറഞ്ഞു.

കാര്‍ഷിക വായ്പകള്‍ക്ക് മൊറട്ടോറിയം ഏര്‍പ്പെടുത്തിയത് മന്ത്രിസഭ അംഗീകരിച്ചിട്ടും ഉത്തരവിറക്കുന്നതില്‍ സര്‍ക്കാര്‍ വീഴ്ച വരുത്തിയെന്നും ഉമ്മന്‍ചാണ്ടി കുറ്റപ്പെടുത്തി. ആചാരങ്ങളുടെ പേരിലുണ്ടായ പ്രശ്‌നങ്ങള്‍ ജനങ്ങളെ സ്വാധീനിക്കും. എന്നാല്‍ മതേതരത്വം വിട്ടൊരു കളിക്ക് കോണ്‍ഗ്രസില്ല. ലീഗ് - എസ്ഡിപിഐ ചര്‍ച്ച നടന്നെന്ന വാര്‍ത്ത അടിസ്ഥാനരഹിതമാണ്. എസ്.ഡി.പി.ഐയെ ആശ്രയിക്കേണ്ട ഗതികേട് ലീഗിനില്ല. കോണ്‍ഗ്രസ് വിട്ടവര്‍ തെറ്റ് തിരുത്തി തിരിച്ചുവരും. ബിജെപിക്കെതിരെ എല്ലാ മതേതര പാര്‍ട്ടികളുമായും കോണ്‍ഗ്രസ് സഹകരിക്കും. മാര്‍ക്‌സിസ്റ്റ് പാര്‍ട്ടി ആകെ അങ്കലാപ്പിലാണ്. അതില്‍ നിന്ന് ഉടലെടുത്താണ് കോലീബി സഖ്യമെന്നും ഉമ്മന്‍ചാണ്ടി ആരോപിച്ചു.

സ്ഥാനാര്‍ത്ഥികളെ ആദ്യം പ്രഖ്യാപിച്ച് തെരഞ്ഞെടുപ്പ് പ്രചരണവുമായി മുന്നോട്ട് പോയ എല്‍.ഡി.എഫ് വലിയ ആത്മവിശ്വാസത്തില്‍ മുന്നേറുമ്പോഴാണ് കെ.മുരളീധരന്‍ വടകരയില്‍ സ്ഥാനാര്‍ത്ഥിയായത്. അതോടെ എല്ലാ കണ്ണുകളും വടകരയിലേക്ക് തിരിഞ്ഞു. പി.ജയരാജന്‍ പോലും ആശങ്കയിലായി. കാരണം മുരളീധരനെതിരെ യാതൊരു ആരോപണവും സി.പി.എമ്മിന് ഉയര്‍ത്താനാകില്ല. അതോടെയാണ് അവര്‍ കോലീബി സഖ്യം പുറത്തെടുത്തത്. എന്നാലത് ഏശാന്‍ സാധ്യതയില്ലെന്നാണ് കോണ്‍ഗ്രസ് വിലയിരുത്തല്‍. എന്നാല്‍ വടകരയില്‍ മുരളീധരനെ ജയിപ്പിച്ച് വട്ടിയൂര്‍ക്കാവില്‍ ഉപതെരഞ്ഞെടുപ്പ് നടത്താന്‍ ബി.ജെ.പി ശ്രമിക്കുന്നെന്ന ആക്ഷേപവും ശക്തമാണ്.