കട്ടച്ചിറയില് പള്ളിയുടെ നിയന്ത്രണം ജില്ലാ ഭരണകൂടം ഏറ്റെടുത്തു, യാക്കോബായ വിഭാഗത്തിന്റെ പ്രതിഷേധ സമരം മൂന്നാം ദിവസത്തിലേക്ക്
കായംകുളത്ത് തര്ക്കം നിലനില്ക്കുന്ന കറ്റാനം കട്ടച്ചിറ സെന്റ് മേരീസ് പള്ളിയുടെ വാതില് തകര്ത്ത് ഓര്ത്തഡോക്സ് വിഭാഗം പള്ളിക്കുള്ളില് കയറി പ്രാര്ത്ഥന നടത്തിയ സംഭവത്തില് യാക്കോബായ വിഭാഗം വൈദികരും വിശ്വാസികളും നടത്തുന്ന പ്രതിഷേധ സമരം മൂന്നാം ദിവസത്തിലേക്ക് കടന്നു. ബുധനാഴ്ച രാവിലെ പത്തിന് ആരംഭിച്ച പ്രതിഷേധം ഇപ്പോഴും തുടരുകയാണ്.
യാക്കോബായ ഇടവക വിശ്വാസികള്ക്കും ട്രസ്റ്റി ഉള്പ്പെടുന്ന ഭരണസമിതിക്കും കോടതി ഉത്തരവിലൂടെ പള്ളിയില് നല്കിയ അവകാശം നടപ്പിലായി കിട്ടുംവരെയും കഴിഞ്ഞദിവസം പള്ളിയില് അതിക്രമിച്ചു കയറി പ്രശ്നം സൃഷ്ടിച്ച ഓര്ത്തഡോക്സ് വിഭാഗത്തിനെതിരെ നിയമനടപടി സ്വീകരിക്കും വരെയും പ്രതിഷേധ സമരവും പ്രാര്ത്ഥനായജ്ഞവും തുടരുമെന്ന് യാക്കോബായ വിഭാഗം വൈദിക സെക്രട്ടറി സ്ലീബാ വട്ടവേലില് കോര് എപ്പിസ്ക്കോപ്പ വ്യക്തമാക്കി.
സ്ത്രീകള് അടക്കമുള്ള വിശ്വാസികളും വിവിധ ഇടങ്ങളില് നിന്നെത്തിയ ബിഷപുമാരും വൈദികരും പള്ളിക്ക് സമീപം പ്രാര്ത്ഥനാ യജ്ഞവുമായി നിലയുറപ്പിച്ചിച്ചിരിക്കുകയാണ്. ഇതിനിടയില് കട്ടച്ചിറ സെന്റ് മേരീസ് പള്ളിയുടെ നിയന്ത്രണം രണ്ട് മാസത്തേക്ക് താത്ക്കാലികമായി ജില്ലാഭരണകൂടം ഏറ്റെടുത്തതായി ജില്ലാ കളക്ടര് എസ് സുഹാസ് ഉത്തരവിട്ടു. ഇരുവിഭാഗവുമായി ഇന്നലെ ഉച്ചയോടെ ആലപ്പുഴ കളക്ട്രേറ്റില് ചര്ച്ച നടത്തിയശേഷമാണ് പള്ളിയുടെ നിയന്ത്രണം ഏറ്റെടുത്ത് കളക്ടര് ഉത്തരവിട്ടത്.
ഈ കാലയളവില് ഇരു വിഭാഗത്തിനും പള്ളിയില് കയറി ആരാധന നടത്താന് അവകാശമില്ല. ഇടവക അംഗങ്ങളില് ആരെങ്കിലും മരണപ്പെട്ടാല് സംസ്ക്കാരത്തിന് പള്ളി തുറന്ന് നല്കും. അടുത്ത ബന്ധുക്കളായ 20 പേര്ക്ക് പള്ളിയില് പ്രവേശിച്ച് സംസ്ക്കാര ശുശ്രൂഷയില് പങ്കെടുക്കാന് അനുവാദം നല്കും. പ്രദേശത്ത് ഏര്പ്പെടുത്തിയിരിക്കുന്ന നിരോധനാജ്ഞ തുടരും.
കളക്ടര് നടത്തിയ ചര്ച്ചയില് ഇരു വിഭാഗവും നിലപാടില് വിട്ടുവീഴ്ചയില്ലാതെ ഉറച്ച് നിന്നതോടെയാണ് തെരഞ്ഞടുപ്പ് കാലമായതിനാല് സംഘര്ഷ സാധ്യത ഒഴിവാക്കാന് ജില്ലാ കളക്ടര് നടപടി കൈക്കൊണ്ടത്.
നിരോധനാജ്ഞ നിലനില്ക്കവേ 150 ഓളം വരുന്ന ഓര്ത്തഡോക്സ് സംഘം പള്ളിയുടെ വാതില് തകര്ത്ത് അകത്തുകയറി യാക്കോബായ വിഭാഗം സ്ഥാപിച്ച വിശുദ്ധരുടെ ചിത്രങ്ങള് തകര്ക്കുകയും കൊടികളും ചിത്രങ്ങളും തീയിട്ട് നശിപ്പിച്ച് അക്രമം കാണിക്കുകയും ചെയ്തത് അംഗീകരിക്കാന് കഴിയില്ല. അതിനാല് അതിക്രമം കാട്ടിയവര്ക്കെതിരെ ശക്തമായ നടപടി സ്വീകരിക്കണമെന്നും യാക്കോബായ വിഭാഗം ആവശ്യപ്പെട്ടു.
ഇന്നലെ യു കെ ഭദ്രാസനാധിപന് ബിഷപ്പ് മാത്യുസ് മാര് അന്തിമോസ്, ബിഷപ്പ് ഗീവര്ഗീസ് മാര് ദിവന്നാസിയോസ് സഭാ വര്ക്കിംഗ് കമ്മിറ്റി അംഗം കെ ഏലിയാസ് എന്നിവരും പ്രാര്ഥനായജ്ഞത്തില് പങ്കെടുത്തു. ചെങ്ങന്നൂര് ഡിവൈഎസ്പി അനീഷ് വി കോര, കായംകുളം ഡിവൈഎസ്പി ആര് ബിനു എന്നിവരുടെ നേതൃത്വത്തില് സ്ഥലത്ത് ഇപ്പോഴും വന് പോലീസ് ക്യാമ്പ് ചെയ്യുന്നുണ്ട് .
https://www.facebook.com/Malayalivartha
