എസ്.എന്.ഡി.പി യോഗത്തിന് ഇനി ഒരു രാഷ്ട്രീയപ്പാര്ട്ടിയുമായും യാതൊരു ബന്ധവും ഉണ്ടായിരിക്കില്ല, യോഗം ഭാരവാഹികളാരും തെരഞ്ഞെടുപ്പില് മത്സരിക്കില്ല, വെള്ളാപ്പളളിയുടെ ന്യായീകരണങ്ങള് തള്ളായി മാറുന്നു
എസ്.എന്.ഡി.പി യോഗത്തിന് ഇനി ഒരു രാഷ്ട്രീയപ്പാര്ട്ടിയുമായും യാതൊരു ബന്ധവും ഉണ്ടായിരിക്കില്ല, യോഗം ഭാരവാഹികളാരും തെരഞ്ഞെടുപ്പില് മത്സരിക്കില്ല, യോഗം വൈസ്പ്രസിഡന്റായ തുഷാര് മത്സരിക്കണമെങ്കില് സ്ഥാനം രാജിവെയ്ക്കണം അങ്ങനെ എന്തെല്ലാം തള്ളാണ് ജനറല് സെക്രട്ടറി വെള്ളാപ്പള്ളി നടേശന് തള്ളിയത്. തള്ളിമറിച്ചതില് നിന്നെല്ലാം മലക്കം മറിഞ്ഞിരിക്കുകയാണ് വെള്ളാപ്പള്ളി. തുഷാര് അനുഭവസമ്പന്നനായ സംഘാടകനാണെന്നും മത്സരിച്ചാല് എതിര്ക്കില്ലെന്നും അദ്ദേഹം വ്യക്തമാക്കി. എന്നാല് വൈസ്പ്രസിഡന്റ് സ്ഥാനം രാജിവയ്ക്കണോ, വേണ്ടയോ എന്ന ചോദ്യത്തിന് മുന്നിലും വെള്ളാപ്പള്ളി മലക്കംമറിഞ്ഞു. തുഷാറുമായി സഹകരിക്കുമെന്ന് മാത്രമാണ് പറഞ്ഞത്.
എല്ലാ രാഷ്ട്രീയ പാര്ട്ടികളോടും ശരിദൂരം സ്വീകരിച്ച നിലപാട് തന്നെയായിരിക്കും ബിഡിജെഎസ് നേതാവ് തുഷാറിനോടുള്ളതെന്നും വെള്ളാപ്പള്ളി പറഞ്ഞു. യോഗത്തിന് ഒരു പാര്ട്ടിയോടും സ്നേഹമോ വിദ്വേഷമോ ഇല്ലെന്നും വ്യക്തമാക്കി. യോഗം ഭാരവാഹിയായി മത്സരിക്കരുതെന്ന് തുഷാറിനോട് പറഞ്ഞതായി മുമ്പ് വെള്ളാപ്പള്ളി പറഞ്ഞിരുന്നു. മത്സരിക്കുന്നെങ്കില് വൈസ്പ്രസിഡന്റ് സ്ഥാനം രാജിവെക്കണം. യോഗത്തിന് നാണക്കെടുണ്ടാകുന്ന അനുഭവങ്ങള് ഉണ്ടായതിനാലാണ് ഈ തീരുമാനമെന്നും വെള്ളാപ്പള്ളി നടേശന് പറഞ്ഞിരുന്നു. ബി.ഡി.ജെ.എസിനെ കുറിച്ചുള്ള ചോദ്യങ്ങള്ക്ക് വാര്ത്താസമ്മേളനത്തില് മറുപടി നല്കാന് പോലും അദ്ദേഹം പലപ്പോഴും തയ്യാറായിരുന്നില്ല. തുഷാര് തൃശൂരില് മത്സരിച്ചാല് തോറ്റുപോകുമെന്ന് വരെ ഒരു ഘട്ടത്തില് പറഞ്ഞിരുന്നു.
മൈക്രോഫൈനാന്സ് കേസില് നിന്നുള്പ്പെടെ രക്ഷപെടാന് വെള്ളാപ്പള്ളി എല്.ഡി.എഫിനൊപ്പവും ആദായനികുതി കേസ് ഉള്പ്പെടെ ഒഴിവാക്കി കിട്ടാന് മകന് തുഷാറിനെ ബി.ജെ.പി നേതൃത്വം നല്കുന്ന എന്.ഡി.എയ്ക്ക് ഒപ്പവും നിര്ത്തിയിരിക്കുകയാണ്. ഇത് യോഗം പ്രവര്ത്തകര്ക്കിടയില് കടുത്ത ആശയക്കുഴപ്പമാണ് സൃഷ്ടിച്ചിരിക്കുന്നത്. ശബരിമല യുവതീപ്രവേശനത്തെ യോഗം എതിര്ത്തെങ്കിലും സമരത്തെ അനുകൂലിച്ചിരുന്നില്ല. അതും ആശയക്കുഴപ്പം ഉണ്ടാക്കിയിരുന്നു. സ്ത്രീകള് ഉള്പ്പെടെയുള്ളവര് സര്ക്കാര് നിലപാടിന് എതിരായിരുന്നു. പക്ഷെ, അവരെയെല്ലാം അണിനിരത്തിയാണ് വനിതാ മതില് വെള്ളാപ്പള്ളി വിജയിപ്പിച്ചത്.
കഴിഞ്ഞ ലോക്സഭാ തെരഞ്ഞെടുപ്പിന് മുമ്പ് വെള്ളാപ്പള്ളിയുടെ നേതൃത്വത്തിലാണ് ബിഡിജെഎസ് രൂപീകരിച്ചത്. എന്നിട്ട് എന്.ഡി.എയ്ക്കൊപ്പം നിന്നു. ഉദ്ദേശിച്ച സ്ഥാനമാനങ്ങള് ലഭിക്കാതെ വന്നപ്പോള് പാര്ട്ടി മകന്റെ തലയിലാക്കി. എന്നിട്ട് ഇടതിനൊപ്പം നിന്നു. ചെങ്ങന്നൂര് ഉപതെരഞ്ഞെടുപ്പില് സി.പി.എം സ്ഥാനാര്ത്ഥിക്ക് വോട്ട് ചെയ്യണമെന്ന് വെള്ളാപ്പള്ളി പരസ്യമായി പ്രഖ്യപിച്ചിരുന്നു. ശബരിമല സമരകാലത്ത് മുഖ്യമന്ത്രി പിണറായിക്കും സര്ക്കാരിനും ഒപ്പം നിന്ന വെള്ളാപ്പള്ളി വനിതാ മതിലിന്റെ സംഘാടകസമിതി ചെയര്മാനുമായി.
തുഷാര് മത്സരിക്കണമെന്ന് ബി.ജെ.പി നേതൃത്വം പലതവണ ആവശ്യപ്പെട്ട കാര്യം മാധ്യമങ്ങള് ചൂണ്ടിക്കാണിച്ചപ്പോള്, തുഷാര് അച്ചടക്കമുള്ള യോഗം പ്രവര്ത്തകനാണെന്നാണ് വെള്ളാപ്പള്ളി പറഞ്ഞത്. തുഷാര് മത്സരിച്ചാലും യോഗം നിലപാട് മാറ്റില്ല. തുഷാറിനെ ജയിപ്പിക്കേണ്ട ബാധ്യത യോഗത്തിനില്ല. തുഷാര് ജയിക്കുമെന്നോ, തോല്ക്കുമെന്നോ പറയുന്നില്ല. പറഞ്ഞാല് മൊട്ടയടിക്കാന് തലയില് രോമമില്ലെന്നും അദ്ദേഹം പരിഹസിച്ചിരുന്നു. അതില് നിന്നൊക്കെ പെട്ടെന്നാണ് ഇന്നദ്ദേഹം മലക്കംമറിഞ്ഞത്.
https://www.facebook.com/Malayalivartha