70 ലക്ഷത്തില് കൂടുതല് ചെലവിടുന്ന സ്ഥാനാര്ത്ഥികള് ചട്ടീലാകും; ലോക്സഭാ തെരഞ്ഞെടുപ്പ് പ്രചാരണത്തിന്റെ ഭാഗമായി സ്ഥാനാര്ഥികള് നടത്തുന്ന ചെലവുകള്ക്ക് തെരഞ്ഞെടുപ്പ് കമ്മിഷന്റെ കര്ശന നിരീക്ഷണം
ലോക്സഭാ തെരഞ്ഞെടുപ്പ് പ്രചാരണത്തിന്റെ ഭാഗമായി സ്ഥാനാര്ഥികള് നടത്തുന്ന ചെലവുകള്ക്ക് തെരഞ്ഞെടുപ്പ് കമ്മിഷന്റെ കര്ശന നിരീക്ഷണം. പരമാവധി 70 ലക്ഷം രൂപയാണ് ഒരു സ്ഥാനാര്ഥിക്കു ചെലവഴിക്കാനാകുന്നത്. ചെലവ് നിരീക്ഷിക്കുന്നതിനായി തെരഞ്ഞെടുപ്പ് കമ്മിഷന് നിയോഗിച്ച നിരീക്ഷകര് ജില്ലയിലെത്തി.
ഐ.ആര്.എസ്. ഉദ്യോഗസ്ഥരായ ടി. അയ്യന് പെരുമാള്, ജഗദീഷ് പ്രസാദ് മീണ എന്നിവരാണ് യഥാക്രമം തിരുവനന്തപുരം, ആറ്റിങ്ങല് ലോക്സഭാ മണ്ഡലങ്ങലിലെ ചെലവ് നിരീക്ഷകന്. ചെലവ് നിരീക്ഷണത്തിനു പൊതുജനങ്ങളുടെ പൂര്ണ പിന്തുണയുണ്ടാകണമെന്നും പൊതുജനങ്ങള്ക്ക് നിരീക്ഷകരെ നേരിട്ടോ ജില്ലാ ഭരണകൂടം വഴിയോ പരാതികള് നല്കാമെന്ന് നിരീക്ഷകര് വാര്ത്താ സമ്മേളനത്തില് പറഞ്ഞു. നിരീക്ഷകരുടെ ഫോണ് നമ്പറുകള് ടി. അയ്യന് പെരുമാള് 9188521942, ജഗദീഷ് പ്രസാദ് മീണ 9530400915, 9188521941.
തെരഞ്ഞെടുപ്പ് ചെലവ് നിരീക്ഷിക്കുന്നതിന് ഫഌിങ് സ്ക്വാഡുകള് നിയമസഭാ മണ്ഡലാടിസ്ഥാനത്തില് പരിശോധന നടത്തുന്നുണ്ടെന്ന് ജില്ലാ കളക്ടര് ഡോ. കെ. വാസുകി വാര്ത്താ സമ്മേളനത്തില് പറഞ്ഞു. ജില്ലയിലെ 15 ചെക്പോസ്റ്റുകളിലും നഗര മേഖലകളിലും സ്റ്റാറ്റിക് സര്വെയ്ലന്സ് സ്ക്വാഡുകള് പ്രവര്ത്തിക്കുന്നുണ്ട്. വാഹനങ്ങളിലും പ്രത്യേക പരിശോധന നടക്കുന്നു.
തെരഞ്ഞെടുപ്പ് പ്രചാരണ യോഗങ്ങള്, റാലികള് തുടങ്ങിയവ നിരീക്ഷിക്കുന്നതിന് വിഡിയോ സര്വെയ്ലന്സ് സ്ക്വാഡുകളും രംഗത്തുണ്ട്. ഓരോ പരിപാടിയുടേയും ചെലവ് കണക്കാക്കി സ്ഥാനാര്ഥിയുടെ ചെലവിലേക്ക് ചേര്ക്കും. സ്ഥാനാര്ഥികളുടെ ചെലവ് സംബന്ധിച്ച പരാതികള് അറിയിക്കുന്നതിന് കളക്ടറേറ്റില് 24 മണിക്കൂര് കണ്ട്രോള് റൂം പ്രവര്ത്തിക്കുന്നുണ്ട്. 0471 23210013, 0471 23210016 എന്നിവയാണ് കണ്ട്രോള് റൂം നമ്പറുകള്. ആദായ നികുതി വകുപ്പിന്റെ ടോള് ഫ്രീ നമ്പറായ 1800 425 3173 എന്ന നമ്പറിലും പെരുമാറ്റച്ചട്ട ലംഘനങ്ങള് റിപ്പോര്ട്ട് ചെയ്യാന് തെരഞ്ഞെടുപ്പ് കമ്മിഷന് പുറത്തിറക്കിയ സിവിജില് ആപ്പ് വഴിയും പരാതികള് അറിയിക്കാമെന്നും നിരീക്ഷകര് പറഞ്ഞു.
തെരഞ്ഞെടുപ്പ് പ്രചാരണത്തിന്റെ ഭാഗമായി തെര്മോക്കോള് നിര്മിതമായ വസ്തുക്കള് ഉപയോഗിക്കുന്നതിനും വിലക്ക് ഏര്പ്പെടുത്തി. പ്രചാരണത്തിനോ പ്രചാരണത്തിന്റെ ഭാഗമായുള്ള യോഗങ്ങളില് ഭക്ഷണം വിതരണം ചെയ്യുന്നതിനോ തെര്മോക്കോള് വസ്തുക്കളോ പാത്രങ്ങളോ ഉപയോഗിക്കുന്നതില്നിന്നു വിട്ടുനില്ക്കണമെന്ന് ജില്ലാ കളക്ടര് അറിയിച്ചു. കത്തിക്കുമ്പോള് ക്യാന്സറിനു കാരണമാകുന്ന പി.വി.സി. ഫഌ്സ്, മറ്റു പ്ലാസ്റ്റിക് വസ്തുക്കള്, തെര്മോക്കോള് തുടങ്ങിയവ ഉപയോഗിക്കുന്നതിനെതിരേ നടപടി സ്വീകരിക്കാന് എം.സി.സി. സ്ക്വാഡുകള്ക്കു നിര്ദേശം നല്കിയിട്ടുണ്ട്.
https://www.facebook.com/Malayalivartha
