ലോക്‌സഭാ തെരഞ്ഞെടുപ്പ് പടിവാതിക്കലെത്തിക്കഴിഞ്ഞു. സര്‍വേ ഫലങ്ങളില്‍ ബിജെപി മികച്ച വിജയം കൈവരിക്കുമെന്ന് ആയതോടെ ശബരിമല വീണ്ടും ഏറ്റെടുക്കാന്‍ ബിജെപി തീരുമാനം. സുരേഷ് ഗോപി തുടങ്ങിവച്ച ശബരിമല പ്രസംഗം ബിജെപിക്ക് വലിയ നേട്ടമാണ് ഉണ്ടാക്കിയത്. ശബരിമല ഏറ്റെടുത്ത പ്രേമചന്ദ്രനും രാജ്‌മോഹന്‍ ഉണ്ണിത്താനും വലിയ പിന്തുണയാണ് നല്‍കിയത്. അതിനാല്‍ തന്നെ ശബരിമല വിഷയം വീണ്ടും തെരഞ്ഞെടുപ്പില്‍ മുഖ്യ വിഷയമാക്കാന്‍ ബിജെപി ഒരുങ്ങുന്നു. ശബരിമല പ്രചരണത്തില്‍ ഉപയോഗിക്കേണ്ടെന്ന മുന്‍ നിലപാടില്‍ നിന്നും കളംമാറ്റാനുള്ള തീരുമാനം എടുത്തത് കഴിഞ്ഞ ദിവസം ദേശീയ നേതാക്കള്‍ പങ്കെടുത്ത യോഗങ്ങള്‍ക്ക് പിന്നാലെയാണ്. കേസെടുക്കുന്നെങ്കില്‍ മോഡിയ്‌ക്കെതിരേയും കേസെടുക്കട്ടെ എന്നാണ് നേതാക്കള്‍ പറയുന്നത്. 

പരമാവധി വിശ്വാസികളുടെ വോട്ട് ഉറപ്പിക്കുക എന്ന ലക്ഷ്യം മുന്നില്‍ വെച്ച് തന്നെയാണ് ബിജെപി ഈ തെരഞ്ഞെടുപ്പിനെ സമീപിക്കുക. വരും ദിവസങ്ങളില്‍ പ്രചരണത്തില്‍ ശബരിമല പ്രധാന വിഷയമാകുമെന്നാണ് സൂചന. ഇക്കാര്യത്തില്‍ തെരഞ്ഞെടുപ്പ് കമ്മീഷന്റെ നിര്‍ദേശം അവഗണിക്കാനാണ് തീരുമാനം. ഇന്നലെ പ്രധാനമന്ത്രി പങ്കെടുത്ത യോഗത്തില്‍ അദ്ദേഹത്തെ വേദിയില്‍ ഇരുത്തിക്കൊണ്ട് ബിജെപി സംസ്ഥാന പ്രസിഡന്റ് ശ്രീധരന്‍ പിള്ള ഇക്കാര്യം പറഞ്ഞിരുന്നു.

നിങ്ങളുടെ വിശ്വാസം സംരക്ഷിച്ചത് ഞങ്ങളാണ്. ഞങ്ങള്‍ക്ക് വോട്ടു ചെയ്യണമെന്ന പരസ്യമായി പറയാനാണ് ബിജെപി ഒരുങ്ങുന്നത്. കേരളത്തില്‍ ഇത് ഒന്നാമത്തെ വിഷയമാണ് എന്ന സൂചിപ്പിച്ച് ജനപിന്തുണ പിടിച്ചെടുക്കുകയാണ് ലക്ഷ്യം. ശബരിമല വിഷയം പറയുന്നിടത്ത് പിന്തുണയേറുന്നു എന്ന കണ്ടെത്തലാണ് നിലപാട് മാറ്റാന്‍ സംസ്ഥാന ഘടകം തീരുമാനം എടുത്തതിന് പിന്നില്‍. 

പത്തനംതിട്ടയില്‍ സുരേന്ദ്രന് കിട്ടുന്ന പിന്തുണയും തൃശൂരില്‍ സുരേഷ്‌ഗോപി ഇക്കാര്യം പറഞ്ഞപ്പോള്‍ കിട്ടിയ പിന്തുണയും ബിജെപി നേതൃത്വം വിലയിരുത്തി. വരുന്ന ദിവസം ശോഭാ സുരേന്ദ്രന്‍ ഉള്‍പ്പെടെയുള്ളവര്‍ മത്സരിക്കുന്നിടത്ത് ഈ വിഷയം ചര്‍ച്ച ചെയ്യാനാണ് തീരുമാനം. നേരത്തേ ശബരിമല വിഷയം ഗോപ്യമായി പ്രചരണങ്ങളില്‍ ഉപയോഗിച്ചതിന് സുരേഷ്‌ഗോപിക്കെതിരേ മുഖ്യ തെരഞ്ഞെടുപ്പ് ഉദ്യോഗസ്ഥര്‍ രംഗത്തു വന്നിരുന്നു. എന്നാല്‍ ശബരിമല വിഷയം പറഞ്ഞാല്‍ തടയാന്‍ ആരുണ്ടെന്ന് നോക്കാമെന്നാണ് ഇന്നലെ ശ്രീധരന്‍ പിള്ള പറഞ്ഞത്.

പ്രധാനമന്ത്രി നരേന്ദ്ര മോഡി ഇന്നലെ കോഴിക്കോട് നടത്തിയ പ്രസംഗത്തിലും ശബരിമലയായിരുന്നു മുഖ്യമായും സംസാരിച്ചത്. കേരളത്തിന്റെ സംസ്‌കാരം ഇടത്, വലത് മുന്നണികളില്‍ നിന്നു ഭീഷണിനേരിടുന്നുവെന്നാണ് നരേന്ദ്ര മോദി പറഞ്ഞത്. ബിജെപി കേരളത്തിലെ ജനങ്ങളുടെ വിശ്വാസത്തിനൊപ്പം നില്‍ക്കുന്നു. സുപ്രീംകോടതി ഉത്തരവിന്റെ പേര് പറഞ്ഞ് ചിലര്‍ സംസ്‌കാരത്തെ തകര്‍ക്കാന്‍ നോക്കുന്നു. വിശ്വാസപ്രമാണങ്ങള്‍ക്ക് മേലെയുള്ള അക്രമങ്ങള്‍ അംഗീകരിക്കാനാവില്ലെന്നു മോദി പറഞ്ഞു. സ്ത്രീശാക്തീകരണത്തില്‍ ഇരുകൂട്ടര്‍ക്കും ഇരട്ടത്താപ്പാണ്. ഇവര്‍ മുത്തലാഖിനെ ന്യായീകരിക്കുന്നു. കമ്യൂണിസ്റ്റുകള്‍ കേരളത്തെ രാഷ്ട്രീയ കൊലപാതകത്തിന്റ നാടാക്കി. ദേശവിരുദ്ധ ശക്തികള്‍ അവരുടെ പരീക്ഷണശാലയാക്കി കേരളത്തെ മാറ്റുന്നുവെന്നും മോദി പറഞ്ഞു. 

എല്‍ഡിഎഫും യുഡിഎഫും അഴിമതിക്കാരും ഭൂമികയ്യേറ്റക്കാരുമാണ്. എല്‍ഡിഎഫും യുഡിഎഫും തമ്മില്‍ പേരില്‍ മാത്രമേ വ്യത്യാസമുള്ളൂ. അഴിമതിയില്‍ ഏര്‍പ്പെടാനുള്ള ലൈസന്‍സായിരിക്കും ഇരുമുന്നണികള്‍ക്കുമുള്ള ജയം. ഇരു മുന്നണികളും കേരളത്തെ കൊള്ളയടിച്ചു. ബിജെപി മുന്നോട്ടുവയ്ക്കുന്നത് ബദല്‍ രാഷ്ട്രീയമാണ്. സംസ്ഥാനം ഭരിക്കുന്നത് കാഴ്ചപ്പാടില്ലാത്ത മുന്നണിയാണ്. ഇവിടെ നടക്കുന്നത് പിന്‍വാതില്‍ വികസനമാണെന്നും പ്രധാനമന്ത്രി പറഞ്ഞു.