മൂന്ന് പതിറ്റാണ്ടായി സി.പി.എമ്മിന്റെ ചുവപ്പ് കോട്ടയാണ് ബേക്കല്‍ ഫോര്‍ട്ട് ഉള്‍പ്പെടുന്ന കാസര്‍കോട് ലോക്‌സഭാ മണ്ഡലം. ഇത്തവണ ചരിത്രം ആവര്‍ത്തിക്കാന്‍ സതീഷ് ചന്ദ്രന്‍ ഗോദയില്‍ ഇറങ്ങിയപ്പോള്‍ ചരിത്രം തിരുത്താന്‍ തെക്ക്‌നിന്ന് രാജ്‌മോഹന്‍ ഉണ്ണിത്താന്‍ യു.ഡി.എഫ് സ്ഥാനാര്‍ത്ഥിയായി കളത്തിലിറങ്ങി. ചോരക്കറ വീണ കാസര്‍കോടിന്റെ മണ്ണും മനസ്സും ഇക്കുറി ആര്‍ക്കൊപ്പമെന്ന് ചോദിച്ചാല്‍ പെട്ടെന്നൊരു ഉത്തരം പറയാനാകാത്ത അവസ്ഥായിലാണിപ്പോള്‍. മഞ്ചേശ്വരം, കാസര്‍കോഡ്, ഉദുമ, കാഞ്ഞങ്ങാട്, തൃക്കരിപ്പൂര്‍, പയ്യന്നൂര്‍, കല്ല്യാശേരി എന്നീ ഏഴ് നിയമസഭാ നിയോജകമണ്ഡലങ്ങള്‍ അടങ്ങുന്നതാണ് കാസര്‍കോഡ് ലോക്‌സഭാ മണ്ഡലം. ഇതില്‍ അഞ്ച് നിയമസഭാ മണ്ഡലങ്ങള്‍ കാസര്‍കോഡ് ജില്ലയിലാണ്. ബാക്കി കണ്ണൂര്‍രിലും.

കാസര്‍കോഡ് മണ്ഡലത്തിലെ മൊത്തം ജനസംഖ്യ 17,89,285 ആണ്. ഇതില്‍ 2014ലെ തെരഞ്ഞെടുപ്പില്‍ മൊത്തം 12,43,730 പേര്‍ക്കാണ് സമ്മതിദാനാവകാശമുണ്ടായിരുന്നത്. ഇതില്‍ 5,95,047 പുരുഷവോട്ടര്‍മാരും 6,48,683 സ്ത്രീ വോട്ടര്‍മാരുമായിരുന്നു. ഇതില്‍ 901 പ്രവാസി വോട്ടര്‍മാരും 3,267 സര്‍വീസ് വോട്ടര്‍മാരും ഉള്‍പ്പെടും. ഏറ്റവും കൂടുതല്‍ വോട്ടര്‍മാരുണ്ടായിരുന്നത് കാഞ്ഞങ്ങാട് നിയമസഭാ മണ്ഡലത്തിലായിരുന്നു. അവിടെ 2014ലെ തെരഞ്ഞെടുപ്പ് കണക്ക് പ്രകാരം 1,90,014 വോട്ടര്‍മാരാണുണ്ടായിരുന്നത്. ഇതില്‍ 90,185 പുരുഷ വോട്ടര്‍മാരും 99,829 സ്ത്രീ വോട്ടര്‍മാരുമായിരുന്നു. കാസര്‍കോഡ് മണ്ഡലത്തില്‍ ഏറ്റവും കൂടുതല്‍ പ്രവാസി, വോട്ടര്‍മാരുള്ളതും കാഞ്ഞങ്ങാടാണ്. 302 പ്രവാസി വോട്ടര്‍മാരാണ് ഇവിടെ ഉണ്ടായിരുന്നത്. 377 സര്‍വീസ് വോട്ടര്‍മാരും ഈ മണ്ഡലത്തിലുണ്ട്. ലിംഗാനുപാതത്തില്‍ സംസ്ഥാനത്തെ ലോക്‌സഭാ മണ്ഡലങ്ങളില്‍ എട്ടാം സ്ഥാനമാണ് കാസര്‍കോഡിനുള്ളത്.

901 പ്രവാസി വോട്ടുകളാണ് ഉണ്ടായിരുന്നത്. ഇതില്‍ 868 പേര്‍ പുരുഷന്‍മാരും 33 പേര്‍ സ്ത്രീവോട്ടര്‍മാരുമായിരുന്നു. 2014 ല്‍ ഇവിടെ 3,267 സര്‍വീസ് വോട്ടര്‍മാര്‍മാരാണുണ്ടായിരുന്നത്. ഇതില്‍ 2,389 വോട്ടുകള്‍ പുരുഷന്‍മാരുടേതും 878 എണ്ണം വനിതകളുടേതുമായിരുന്നു. മണ്ഡലത്തിലെ സ്ത്രീപുരുഷാനുപാതം 1090 ആണ്. വോട്ടര്‍മാരുടെ എണ്ണത്തില്‍ തൊട്ടുപിന്നിലുള്ളത് മഞ്ചേശ്വരമാണ്. ഇവിടെ 1,89,640 വോട്ടര്‍മാരാണുള്ളത്. ഇതില്‍ 95,127 പുരുഷ വോട്ടര്‍മാരും 94,513 സ്ത്രീ വോട്ടര്‍മാരുമാണ്. പ്രവാസി-സര്‍വീസ് വോട്ടുകള്‍ ഏറ്റവും കുറവുള്ള മണ്ഡലം കൂടിയാണിത്. 42 പ്രവാസി വോട്ടര്‍മാരും 21 സര്‍വീസ് വോട്ടര്‍മാരുമാണ് മണ്ഡലത്തിലുള്ളത്. അതേസമയം സര്‍വീസ് വോട്ടര്‍മാര്‍ ഏറ്റവും കൂടുതലുളളത് പയ്യന്നൂര്‍ നിയമസഭാ മണ്ഡലത്തിലാണ്. ഇവിടെ മൊത്തം 1,154 സര്‍വീസ് വോട്ടര്‍മാരാണുള്ളത്. എന്നാല്‍ ഏറ്റവും കുറച്ച് സമ്മതിദായകരുള്ളതും ഈ മണ്ഡലത്തിലാണ്. മൊത്തം 1,64,983 വോട്ടര്‍മാരാണ് മണ്ഡലത്തില്‍ ആകെയുള്ളത്.

2014ലെ തെരഞ്ഞെടുപ്പില്‍ കാസര്‍കോഡ് മണ്ഡലത്തില്‍ മൊത്തത്തില്‍ 9,73,613 വോട്ടുകളാണ് പോള്‍ ചെയ്തത്. 4,59,280 പുരുഷന്‍മാരും 5,14,333 സ്ത്രീകളും വോട്ടു രേഖപ്പെടുത്തിയിരുന്നു. ഇതിന് പുറമെ 1582 പോസ്റ്റല്‍ വോട്ടുകളും ലഭിച്ചിരുന്നു.ഇതില്‍ നോട്ടയ്ക്ക് ലഭിച്ച 6103 വോട്ടുകളും വോട്ടിംഗ് യന്ത്രത്തില്‍ നിന്നും എടുക്കാന്‍കഴിയാതിരുന്ന 822 വോട്ടുകളും, 158 അസാധുവായ വോട്ടും കഴിച്ചാല്‍ മൊത്തം വോട്ടുകള്‍ 9,68,112 ആയിരുന്നു. 78.47 ആയിരുന്നു പോളിംഗ് ശതമാനം. കഴിഞ്ഞതവണ ഇടതുമുന്നണി സ്ഥാനാര്‍ത്ഥിയായി മത്സരിച്ച പി. കരുണാകരനാണ് വിജയിച്ചത്. അദ്ദേഹത്തിന് 3,84,964 വോട്ടാണ് ലഭിച്ചത്. 6,921 വോട്ടുകള്‍ക്കായിരുന്നു വിജയം. കോണ്‍ഗ്രസിലെ(യു.ഡി.എഫ്) ടി. സിദ്ദിഖായിരുന്നു എതിര്‍സ്ഥാനാര്‍ത്ഥി. ബി.ജെ.പിയിലെ കെ. സുരേന്ദ്രനും മത്സരരംഗത്തുണ്ടായിരുന്നു.

പ്രധാനപ്പെട്ട സ്ഥാനാര്‍ത്ഥികള്‍ക്ക് ലഭിച്ച വോട്ടും സാധുവായ വോട്ടിന്റെ
ശതമാനവും
പി. കരുണാകരന്‍(എല്‍.ഡി.എഫ്)- 3,84,964(39.76%) 
ടി. സിദ്ദിഖ് (യു.ഡി.എഫ്)- 3,78,043(39.05%) 
കെ. സുരേന്ദ്രന്‍ (ബി.ജെ.പി)- 1,72,826(17.85%)

2009-കാസര്‍കോഡ്- (76.15%)
പി. കരുണാകരന്‍-(എല്‍.ഡി.എഫ്)(45.51%)
ഷാഹിദാ കമാല്‍-യു.ഡി.എഫ്(37.91%)

മണ്ഡലത്തിലെ വിജയചരിത്രം

1977-രാമചന്ദ്രന്‍ കടന്നപ്പള്ളി (കോണ്‍ഗ്രസ്)
1980-എം. രാമണ്ണറേ (സി.പി.എം)
1984-ഐ. രാമറേ (കോണ്‍ഗ്രസ്)
1989-എം. രാമണ്ണറേ (സി.പി.എം)
1991-എം. രാമണ്ണറേ (സി.പി.എം)
1996-ടി. ഗോവിന്ദന്‍ (സി.പി.എം)
1998-ടി. ഗോവിന്ദന്‍ (സി.പി.എം)
1999-ടി. ഗോവിന്ദന്‍ (സി.പി.എം)
2004-പി. കരുണാകരന്‍(സി.പി.എം)