പ്രധാനമന്ത്രി നരേന്ദ്രമോദിയുടെ വലംകൈയ്യാണ് ബിജെപി അധ്യക്ഷന്‍ അമിത് ഷാ. ഇത്തവണ അമിത്ഷാ മത്സരിക്കുന്നുമുണ്ട്. അമിത്ഷാ വെറുതേയല്ല മത്സരിക്കുന്നതെന്നാണ് വിലയിരുത്തല്‍. ഇതിനിടെ ശക്തമായ തുറന്നു പറച്ചില്‍ നടത്തിയിരിക്കുകയാണ് ഡല്‍ഹി മുഖ്യമന്തി അരവിന്ദ് കേജ്‌രിവാള്‍.

മോദി വീണ്ടും അധികാരത്തിലെത്തിയാല്‍ അടുത്ത ആഭ്യന്തരമന്ത്രി അമിത് ഷാ ആയിരിക്കുമെന്ന് കേജ്‌രിവാള്‍ പറയുന്നത്. തിരഞ്ഞെടുപ്പിനു മുന്നോടിയായുള്ള ഗോവയിലെ പൊതുറാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. മുഴുവന്‍ ലോക്‌സഭാ സീറ്റുകളിലും മൂന്ന് നിയമസഭാ സീറ്റുകളിലും തിരഞ്ഞെടുപ്പില്‍ ഇത്തവണ ബി.ജെ.പി മത്സരിക്കും. ഇന്ത്യയെ സംരക്ഷിക്കാനുള്ള ശക്തമായ പോരാട്ടമാണ് ഇപ്പോള്‍ നടക്കുന്നതെന്നും അദ്ദേഹം പറഞ്ഞു.

മോദി വീണ്ടും പ്രധാനമന്ത്രി പദത്തിലെത്തിയാല്‍ പാര്‍ട്ടി അദ്ധ്യക്ഷന്‍ അമിത് ഷാ ആയിരിക്കും ആഭ്യന്തരമന്ത്രി. അമിത്ഷാ ഇതുവരെ ലോക്‌സഭാ തിരഞ്ഞെടുപ്പില്‍ മത്സരിച്ചിരുന്നില്ല. എല്‍.കെ അദ്വാനിയുടെ മണ്ഡലമായിരുന്ന ഗാന്ധി നഗറില്‍ നിന്നുമാണ് അമിത് ഷാ ഇത്തവണ മത്സരിക്കുന്നത്. അമിത് ഷാ അടുത്ത ആഭ്യന്തരമന്ത്രിയായാല്‍ രാജ്യത്ത് സംഭവിക്കുന്ന കാര്യം ഒന്ന് ചിന്തിച്ചു നോക്കൂവെന്നും കേജ്‌രിവാള്‍ ചോദിച്ചു.

അമിത് ഷാ ആഭ്യന്തരമന്ത്രി ആവുകയാണെങ്കില്‍ ഗോവയിലെ സാമ്ബത്തിക വ്യവസ്ഥിതി തകര്‍ന്നുപോകുമെന്നും അദ്ദേഹം കൂട്ടിച്ചേര്‍ത്തു. ഗോവയില്‍ ഇതുവരെ ആള്‍ക്കൂട്ട കൊലപാതകം നടന്നിട്ടില്ല. ബി.ജെ.പി തിരിച്ചധികാരത്തിലെത്തിയാല്‍ ഗോവയിലെ സ്ഥിതി മാറും. വിദേശികള്‍ ഏറെ എത്തുന്ന സ്ഥലമാണ് ഗോവ. ഇത്തരത്തിലുള്ള സംഭവങ്ങള്‍ ഗോവയില്‍ ഉണ്ടായാല്‍ വിദേശ സഞ്ചാരികള്‍ എത്തുന്നത് കുറയുമെന്നും അത് സമ്ബത്ത് വ്യവസ്ഥയെ ബാധിക്കുമെന്നും അദ്ദേഹം പറഞ്ഞു.

ഇന്ത്യയെയും ഭരണഘടനെയെയും സംരക്ഷിക്കുകയാണ് ആവശ്യം. ഹിറ്റ്‌ലര്‍ ജര്‍മനിയില്‍ ചാന്‍സിലറായി അധികാരത്തിലെത്തിയപ്പോള്‍ മൂന്ന് മാസം കൊണ്ട് അദ്ദേഹം തിരഞ്ഞെടുപ്പും ഭരണഘടനയെയും പാടെ മാറ്റി. ഈ മാതൃക തന്നെയാണ് ബി.ജെ.പിയും പിന്തുടരുന്നതെന്നും അദ്ദേഹം പറഞ്ഞു.

അടുത്തിടെ മോദി വീണ്ടും അധികാരത്തിലെത്തണമെന്നും അങ്ങനെയാണെങ്കില്‍ പാകിസ്ഥാനും ഇന്ത്യയും തമ്മിലുള്ള ബന്ധം കൂടുതല്‍ മെച്ചപ്പെടുമെന്നും പാകിസ്ഥാന്‍ പ്രാധാനമന്ത്രി ഇമ്രാന്‍ഖാന്‍ പറഞ്ഞിരുന്നു. എന്തുകൊണ്ടാണ് ഇമ്രാന്‍ ഇങ്ങനെ പറയുന്നതെന്നും, മോദി വിജയിക്കാന്‍ ഇമ്രാന്‍ ആഗ്രഹിക്കുന്നത് എന്തിനാണെന്നും അദ്ദേഹം ചോദിച്ചു.