ലോക്‌സഭാ തിരഞ്ഞെടുപ്പില്‍ സംസ്ഥാനത്ത് ബി.ജെ.പി മൂന്ന് സീറ്റില്‍ വിജയം നേടുമെന്ന് സര്‍വേ ഫലം. തിരുവനന്തപുരം, പത്തനംതിട്ട, തൃശൂര്‍ മണ്ഡലങ്ങളിലാണ് സ്വകാര്യ ചാനല്‍ നടത്തിയ സര്‍വേയില്‍ സാദ്ധ്യത പ്രഖ്യാപിക്കുന്നത്.
തിരുവനന്തപുരത്ത് കുമ്മനം രാജശേഖരന് വ്യക്തമായ ആധിപത്യമാണ് സര്‍വേ പ്രവചിക്കുന്നത്. പത്തനംതിട്ടയില്‍ ഒരു ശതമാനത്തിന്റെ മാത്രം വ്യത്യാസവുമാണ് സുരേന്ദ്രന്‍ സിറ്റിംഗ് എം.പി ആന്റോ ആന്റണിയുമായി ഉള്ളത്. തൃശൂരില്‍ വൈകി വന്നിട്ടും വലിയ മുന്നേറ്റം സുരേഷ് ഗോപി ഉണ്ടാക്കിയതായും സര്‍വേ പറയുന്നു.

ബി.ജെ.പി കേന്ദ്രങ്ങളെ പോലും അത്ഭുതപ്പെടുത്തുകയും ഇടത് വലത് മുന്നണികളെ ഞെട്ടിക്കുകയും ചെയ്യുന്ന സര്‍വേ റിപ്പോര്‍ട്ടാണ് പുറത്ത് വന്നത്. ഇടതു പക്ഷത്തിന് മേല്‍ വ്യക്തമായ ആധിപത്യം ഉറപ്പിച്ച് 13 14 വരെ സീറ്റ് യു.ഡി.എഫ് നേടുമെന്നാണ് പ്രവചനം.
വയനാട്ടില്‍ രാഹുല്‍ ഗാന്ധിക്ക് മികച്ച ഭൂരിപക്ഷം ലഭിക്കുമെന്ന് സര്‍വേ പറയുന്നു. രാഹുല്‍ ജയിക്കുമെന്ന് 45 ശതമാനം പേരാണ് അഭിപ്രായപ്പെട്ടത്. ഇടത് സ്ഥാനാര്‍ത്ഥി സുനീറിന് 39 ശതമാനം പേരാണ് വിജയം പ്രവചിച്ചിരിക്കുന്നത്. തുഷാറിന് വെറും 16 ശതമാനം പേരുടെ പിന്തുണയാണ് ലഭിച്ചത്. അതേസമയം വടകര സീറ്റില്‍ യു.ഡി.എഫിന് കൂറ്റന്‍ ലീഡാണ് സര്‍വേ പ്രവചിക്കുന്നത്. 45 ശതമാനം പേര്‍ കെ മുരളീധരന്‍ ജയിക്കുമെന്ന് അഭിപ്രായപ്പെട്ടു. സി.പി.എമ്മിന്റെ പി. ജയരാജനെ 39 ശതമാനം പേരാണ് പിന്തുണച്ചത്.

കോഴിക്കോട് എംകെ രാഘവന്‍ തന്നെ മൂന്നാം തവണയും വിജയിക്കുമെന്ന് 44 ശതമാനം പേര്‍ അഭിപ്രായപ്പെട്ടു. എല്‍.ഡി.എഫിന്റെ എ. പ്രദീപ്കുമാറിനെ 36 ശതമാനം പേരാണ് പിന്തുണച്ചത്. കണ്ണൂര്‍ സീറ്റില്‍ യു.ഡി.എഫിന്റെ കെ.സുധാകരന്‍ വിജയിക്കുമെന്ന് 39 ശതമാനം പേര്‍ അഭിപ്രായപ്പെട്ടു. പി.കെ. ശ്രീമതി വിജയിക്കുമെന്ന് 38 ശതമാനം പേരാണ് അഭിപ്രായപ്പെട്ടത്.

കാസര്‍കോട് മണ്ഡലം സി.പി.എം തന്നെ നിലനിറുത്തുമെന്നാണ് സര്‍വേ വ്യക്തമാക്കുന്നത്. സി.പി.എം സ്ഥാനാര്‍ത്ഥിയെ 34 ശതമാനം പേര്‍ പിന്തുണച്ചു. യു.ഡി.എഫ് സ്ഥാനാര്‍ത്ഥിയെ 33 ശതമാനം പേരാണ് പിന്തുണച്ചത്. അതേസമയം രാഹുല്‍ ഗാന്ധി കേരളത്തില്‍ മത്സരിക്കുന്നത് തരംഗമുണ്ടാക്കില്ലെന്നാണ് നിലപാടാണ് സര്‍വേയില്‍ പങ്കെടുത്തവര്‍ക്ക് ഉള്ളത്. 64 ശതമാനം പേരും രാഹുലിന്റെ സ്ഥാനാര്‍ത്ഥിത്വം ഗതിമാറ്റില്ലെന്നാണ് അഭിപ്രായപ്പെട്ടത്.

മലപ്പുറവും പൊന്നാനിയും യു.ഡി.എഫ് തന്നെ പിടിക്കുമെന്നാണ് സര്‍വേ പറയുന്നത്. മലപ്പുറത്ത് കുഞ്ഞാലിക്കുട്ടിക്ക് പാതിയിലേറെ ജനപിന്തുണയാണ് ലഭിച്ചത്. 52 ശതമാനം അദ്ദേഹം വിജയിക്കുമെന്ന് പറഞ്ഞു. വിപി സാനുവിനെ 29 ശതമാനമാണ് പിന്തുണച്ചത്. അതേസമയം പൊന്നാനിയില്‍ ഇ.ടി. മുഹമ്മദ് ബഷീര്‍ പി.വി. അന്‍വറിനെ തോല്‍പ്പിക്കുമെന്ന് സര്‍വേ പറയുന്നു. ഇ.ടി. മുഹമ്മദ് ബഷീര്‍ വിജയിക്കുമെന്ന് 46 ശതമാനമാണ് അഭിപ്രായപ്പെട്ടത്. പാലക്കാട് എല്‍.ഡി,?എഫ് നിലനിറുത്തുമെന്നാണ് സര്‍വേയില്‍ പങ്കെടുത്ത 37 ശതമാനം അഭിപ്രായപ്പെട്ടത്