ശബരിമലയുടെ പേരില് തിരുവനന്തപുരത്ത് കുമ്മനം രാജശേഖരന് വോട്ടുപിടിക്കാന് ആര്എസ്എസ് നേതാവ് വല്സന് തില്ലങ്കേരി... തിരഞ്ഞെടുപ്പ് കമ്മീഷന്റെ വിലക്ക് മറികടക്കാന് ശബരിമല കര്മസമിതിയുടെ പേരിലാണ് വോട്ടുചോദിക്കല്
ശബരിമലയുടെ പേരില് തിരുവനന്തപുരത്ത് കുമ്മനം രാജശേഖരന് വോട്ടുപിടിക്കാന് ആര്എസ്എസ് നേതാവ് വല്സന് തില്ലങ്കേരി. തിരഞ്ഞെടുപ്പ് കമ്മീഷന്റെ വിലക്ക് മറികടക്കാന് ശബരിമല കര്മസമിതിയുടെ പേരിലാണ് വോട്ടുചോദിക്കല്. വല്സന് തില്ലങ്കേരിയെ രംഗത്തിറക്കിയതിലൂടെ ശബരിമലയുടെ പേരില് പരമാവധി വോട്ടുപിടിക്കാനുള്ള ശ്രമമാണ് ബിജെപി നടത്തുന്നത്.
തിരഞ്ഞെടുപ്പ് പ്രചാരണം അവസാന ലാപ്പിലേക്ക് കടന്നതോടെ തിരുവനന്തപുരത്ത് ബിജെപിയുടെ മുഖ്യആയുധമായി മാറിയിരിക്കുകയാണ് ശബരിമല. സെക്രട്ടേറിയറ്റ് പടിക്കല് നടത്തിയ ധര്ണയുടെ തൊട്ടടുത്തദിവസമാണ് കഴക്കൂട്ടം മണ്ഡലത്തില് ശബരിമല കര്മസമിതി മാതൃസംഗമം നടത്തിയത്. ശബരിമലയുടെ കാര്യത്തില് തെരുവിലിറങ്ങിയ സ്ത്രീകളുടെ നിലപാട് വോട്ടാക്കി മാറ്റുകയെന്ന ലക്ഷ്യത്തോടെയാണ് സന്നിധാനത്തെ സംഘപരിവാര് സമരങ്ങള്ക്ക് നേതൃത്വം നല്കിയ വല്സന് തില്ലങ്കേരിയെ എത്തിച്ചത്. അയ്യപ്പന്റെ പേരില് പ്രചാരണം പാടില്ലെന്ന തിരഞ്ഞെടുപ്പ് കമ്മീഷന് വിലക്കിനെ വല്സന് തില്ലങ്കേരി രൂക്ഷമായി വിമര്ശിച്ചു.
മണ്ഡലമേതായാലും മണ്ഡലകാലം മറക്കരുത് എന്നാണ് ശബരിമല കര്മസമിതിയുടെ മുദ്രാവാക്യം. അത് വൈകാരികമായി ഓര്മിപ്പിക്കുന്നതിനാണ് ഇത്തരം കൂട്ടായ്മകള്. വരും ദിവസങ്ങളില് ശബരിമല കര്മസമിതിയുടെ കൂട്ടായ്മകള് മറ്റ് ലോക്സഭാ മണ്ഡലങ്ങളിലും സംഘടിപ്പിക്കും. വോട്ടെടുപ്പ് തീയതി അടുക്കുമ്പോഴേക്കും ശബരിമല യുവതീപ്രവേശം സജീവചര്ച്ചയാക്കി നിലനിര്ത്താനുള്ള ശ്രമത്തിന്റെ ഭാഗമാണിത്.
ഇരുമുടിക്കെട്ടില്ലാതെ പതിനെട്ടാംപടി കയറിയ വിവാദത്തില് തിരുവിതാംകൂര് ദേവസ്വം ബോര്ഡ് അംഗവും കുടുങ്ങി. ആര്എസ്എസ് നേതാവ് വല്സന് തില്ലങ്കേരി ഇരുമുടിക്കെട്ടില്ലാതെ പതിനെട്ടാംപടി കയറി ആചാരലംഘനം നടത്തിയ സംഭവം അന്വേഷിക്കുമെന്നു പ്രഖ്യാപിച്ചതിനു പിന്നാലെയാണു ദേവസ്വംബോര്ഡ് അംഗം കെ.പി.ശങ്കരദാസും വിവാദത്തില്പ്പെട്ടത്. ഇദ്ദേഹവും ആചാരലംഘനം നടത്തി പതിനെട്ടാം പടി കയറുകയും ഇറങ്ങുകയും ചെയ്യുന്നതിന്റെ ദൃശ്യങ്ങള് പുറത്തുവന്നു.
സന്നിധാനത്ത് ആഴിപൂജയ്ക്കു വേണ്ടി തന്ത്രിയും മേല്ശാന്തിയുമടങ്ങുന്ന സംഘത്തിനൊപ്പം ഇരുമുടിക്കെട്ടില്ലാതെ പതിനെട്ടാംപടി കയറുകയും ഇറങ്ങുകയും ചെയ്തതാണ് ശങ്കരദാസിനു കുരുക്കായത്. തിങ്കളാഴ്ച നട തുറന്ന സമയത്തായിരുന്നു സംഭവം. ആഴിപൂജയ്ക്ക് തന്ത്രിയുടെ നേതൃത്വത്തില് പടിയിറങ്ങിയായിരുന്നു എത്തിയിരുന്നത്. പൂജയ്ക്കു ശേഷം തിരികെ പതിനെട്ടാംപടി കയറുകയും ചെയ്യും. ഈ സംഘത്തിനൊപ്പമാണ് ഇരുമുടിക്കെട്ടില്ലാതെ ശങ്കരദാസും പോയത്.
ഇദ്ദേഹത്തിനെതിരെ നടപടി വേണമെന്നു വല്സന് തില്ലങ്കേരി ആവശ്യപ്പെട്ടു. ചൊവ്വാഴ്ച ശബരിമല ദര്ശനത്തിനെത്തിയ സ്ത്രീയുടെ പ്രായം സംബന്ധിച്ച് ആശയക്കുഴപ്പമുണ്ടായതിനെ തുടര്ന്നുള്ള ബഹളത്തിനിടയിലായിരുന്നു വല്സന് പതിനെട്ടാംപടി കയറിയത്. പ്രത്യേക സാഹചര്യത്തിലാണു താന് പടി കയറിയതെന്നും അല്ലെങ്കില് അവിടെ വലിയ പ്രശ്നമുണ്ടാകുമായിരുന്നെന്നും വല്സന് പറഞ്ഞു.
https://www.facebook.com/Malayalivartha
