കരിമ്പിന്‍ തോട്ടത്തിനു സമീപം കിടന്നുറങ്ങിയ ഒന്നര വയസ്സുകാരന്‍ മകനെ പിടിക്കാനുള്ള പുള്ളിപ്പുലിയുടെ ശ്രമം ദമ്പതികള്‍ പരാജയപ്പെടുത്തി. പുണെ ജില്ലയിലെ ജുന്നാറില്‍ കരിമ്പുപാടത്തിനു സമീപം വെള്ളിയാഴ്ച രാത്രിയാണ് സംഭവം.ശബ്ദംകേട്ട് കണ്ണുതുറന്ന് നോക്കിയപ്പോള്‍ തന്റെ തൊട്ടരികില്‍ കിടന്നുറങ്ങിയ മകനെ പുലി വലിച്ചിഴക്കുന്ന കാഴ്ചയാണ് അമ്മ ദീപാലി കണ്ടത്. പെട്ടെന്നുതന്നെ അവര്‍ കൈകൊണ്ട് പുലിയെ തൊഴിച്ചു. കുട്ടിയുടെ തലയുടെ ഒരു ഭാഗം വായിലാക്കിയ പുലി കടി വിട്ട് അമ്മയുടെ കൈയില്‍ കടിച്ചു.

തൊട്ടടുത്ത് കിടക്കുകയായിരുന്ന ഭര്‍ത്താവ് ഉണര്‍ന്ന് അലമുറയിട്ടപ്പോള്‍ പുലി പിന്തിരിഞ്ഞ് ഓടുകയായിരുന്നു. കരിമ്പിന്‍ തോട്ടത്തിലെ തൊഴിലാളികളായ ദമ്പതികള്‍ മകനുമൊത്ത് പുറത്താണ് കിടന്നിരുന്നത്. കുട്ടിയുടെ കഴുത്തിന്റെയും ഇടതുകണ്ണിന്റെയും ഭാഗത്തായി പുലിയുടെ പല്ലുകള്‍ പതിഞ്ഞിട്ടുണ്ട്.

പരിക്കേറ്റ കുട്ടിയെ ആശുപത്രിയില്‍ പ്രവേശിപ്പിച്ചു. കരിമ്പുപാടത്തില്‍ തൊഴിലെടുക്കുന്ന നിരവധി കുടുംബങ്ങള്‍ നദിയുടെ കരയില്‍ താല്‍ക്കാലികമായി നിര്‍മിച്ച കുടിലിനു പുറത്താണ് രാത്രി കിടന്നുറങ്ങുന്നത്. ഈ വര്‍ഷം ജുന്നാര്‍ താലൂക്കില്‍ പുലിയുടെ രണ്ടാമത്തെ ആക്രമണമാണിത്. ജനുവരിയില്‍ അഞ്ച് മാസം മാത്രം പ്രായമുള്ള പെണ്‍കുഞ്ഞിനെ ആക്രമിച്ച് കൊലപ്പെടുത്തിയിരുന്നു.