വോട്ടിന് ശേഷം കാണാം... തെരഞ്ഞെടുപ്പിന് മണിക്കൂറുകള് മാത്രം ശേഷിക്കേ ശുഭാപ്തി വിശ്വാസത്തോടെ പിണറായി വിജയന്; പുതിയ വോട്ടര്മാരായ യുവത കേരളത്തിന്റെ മഹദ് പാരമ്പര്യം സംരക്ഷിക്കാനുതകുംവിധം വിധിയെഴുത്തില് പങ്കെടുക്കും
ആവേശോജ്ജ്വലമായ തെരഞ്ഞെടുപ്പിന് ഇനി മണിക്കൂറുകള് മാത്രം. അതേസമയം നേതാക്കള് ഇപ്പോഴും വലിയ വിജയ പ്രതീക്ഷയിലാണ്. എല്ഡിഎഫ് പത്തില് കൂടുതല് സീറ്റ് നേടി മികച്ച വിജയം നേടുമെന്നാണ് മുഖ്യമന്ത്രി പിണറായി വിജയന് പറയുന്നത്. തിരഞ്ഞെടുപ്പ് പ്രചാരണത്തിന്റെ അവസാന ദിവസം കണ്ണൂര് പ്രസ് ക്ലബ്ബില് മീറ്റ് ദി പ്രസില് സംസാരിക്കുകയായിരുന്നു മുഖ്യമന്ത്രി.
ജാതിഭേദവും മതദ്വേഷവുമില്ലാതെ സാഹോദര്യത്തോടെ സര്വരും വാഴുന്ന നവോത്ഥാന കേരളത്തിന്റെ നിലനില്പ്പിനായാണ് കേരളജനത വോട്ടുപയോഗിക്കുകയെന്ന് പിണറായി വിജയന് പറഞ്ഞു. പുതിയ വോട്ടര്മാരായ യുവത കേരളത്തിന്റെ മഹദ്പാരമ്പര്യം സംരക്ഷിക്കാനുതകുംവിധം വിധിയെഴുത്തില് പങ്കെടുക്കും. തിരഞ്ഞെടുപ്പില് ഇടതുമുന്നണിക്ക് 10 സീറ്റ് കിട്ടുമോ എന്ന പത്ര പ്രവര്ത്തകരുടെ ചോദ്യത്തിന് അതുക്ക് മേലെ എന്നായിരുന്നു മറുപടി.
പ്രചാരണത്തില് സാധാരണയായി ഉന്നതനിലാവാരം പുലര്ത്തുന്ന കേരളത്തിലും അതിന് വിരുദ്ധമായ നീക്കം ഇത്തവണ ഉണ്ടായി. മതനിരപേക്ഷജനാധിപത്യമൂല്യങ്ങള് തകര്ക്കുന്ന തരത്തില് സംഘപരിവാര് പ്രചാരണം നടത്തി. ഉത്തരേന്ത്യയില് വംശഹത്യയ്ക്കും കലാപങ്ങള്ക്കും നേതൃത്വം നല്കിയവരുടെ വക്താക്കള് ഇവിടെ റോഡ്ഷോ നടത്തി. ആ സംസ്കാരം കേരളത്തിലും സ്ഥാപിക്കാനുള്ള ശ്രമമാണ് നടന്നത്. അവിടങ്ങളിലെ തെറ്റായ കാര്യങ്ങള് പകര്ത്താതിരിക്കാന് ജാഗ്രത പാലിക്കുന്നില്ലെങ്കില് മഹത്തായ നമ്മുടെ പാരമ്പര്യം നഷ്ടമാകുന്ന ആപത്കരമായ സാഹചര്യമാണുണ്ടാവുകപിണറായി പറഞ്ഞു.
ബി.ജെ.പി. ഇനിയൊരിക്കലും അധികാരത്തില് വരരുത്, കേന്ദ്രത്തില് മതനിരപേക്ഷ സര്ക്കാര് വരണം, അതിന് പാര്ലമെന്റില് ഇടതുപക്ഷത്തിന്റെ സാന്നിധ്യം നല്ലനിലയില് വേണം. ബി.ജെ.പി. പ്രലോഭിപ്പിക്കുമ്പോള് ഒപ്പം പോകാത്തവരെ വേണം ജയിപ്പിക്കാന് ഈ രാഷ്ട്രീയമാണ് എല്.ഡി.എഫ്. പ്രചാരണവേദികളില് നിരത്തിയത്.
വിശ്വാസികള്ക്കെതിരാണ് കേരള സര്ക്കാര് എന്ന പ്രധാനമന്ത്രിയുടെ പ്രസ്താവന സംഘപരിവാര് ആവര്ത്തിക്കുന്ന നുണയാണ്. പലവട്ടം അതാവര്ത്തിച്ചാല് സത്യമെന്ന് ആളുകള് കരുതിക്കൊള്ളുമെന്ന ആശയിലാണത്. വിശ്വാസികളെ തടയുകയും അക്രമിക്കുകയും ചെയ്തവര്ക്കെതിരേയാണ് പോലീസ് കേസെടുത്തത്.
സുപ്രീംകോടതി വിധി നടപ്പാക്കുന്നതിന് നിരോധനാജ്ഞ പ്രഖ്യാപിച്ചായാലും ഭക്തര്ക്ക് സൗകര്യമൊരുക്കണമെന്ന് നരേന്ദ്രമോദി സര്ക്കാരാണ് കേരള സര്ക്കാരിനോട് രേഖാമൂലം നിര്ദേശിച്ചത്. കേന്ദ്രത്തിന് അതേ ചെയ്യാനാവൂ, കേരളത്തിന് അതനുസരിക്കാനേ പറ്റൂ. ശബരിമലയില് സമാധാനം പാലിക്കുന്നതിന് നിരോധനമടക്കമുള്ള നടപടി ആവശ്യപ്പെട്ട് കേന്ദ്ര ആഭ്യന്തരവകുപ്പ് അയച്ച കത്തും മുഖ്യമന്ത്രി വായിച്ചുകേള്പ്പിച്ചു.
വിശ്വാസമനുസരിച്ച് ജീവിക്കാന് പൂര്ണസ്വാതന്ത്ര്യവും സൗകര്യവും നല്കുന്ന സംസ്ഥാനമാണ് കേരളം. സംഘപരിവാര് മേധാവിത്വമുള്ള സംസ്ഥാനങ്ങളിലാണ് വിശ്വാസസ്വാതന്ത്ര്യം തടയുന്നത്. എന്തെല്ലാം കുപ്രചരണം നടത്തിയാലും കേരളത്തില് ബി.ജെ.പി.ക്ക് നേട്ടമുണ്ടാക്കാനാവില്ല പിണറായി പറഞ്ഞു.
കേന്ദ്രത്തില് ബി.ജെ.പി.ക്ക് ഭരണത്തുടര്ച്ചയുണ്ടാകില്ലെന്ന് മാത്രമല്ലാതെ വരാനിരിക്കുന്ന സര്ക്കാരിന്റെ രൂപത്തെക്കുറിച്ച് ഇപ്പോള് പറയാനാവില്ല. ഏറ്റവുംവലിയ ഒറ്റക്കക്ഷിയുടെ നേതാവ് തന്നെ പ്രധാനമന്ത്രിയാകുമോ എന്നും പറയാനാവില്ല.
പാര്ലമെന്റ് തിരഞ്ഞെടുപ്പാണെങ്കിലും സംസ്ഥാന സര്ക്കാരിന്റെ പ്രവര്ത്തനങ്ങളും വിലയിരുത്തപ്പെടും. പൊതുമേഖലയുടെ വളര്ച്ച, ക്ഷേമപദ്ധതികള്, വികസനമുന്നേറ്റം തുടങ്ങി കേരളത്തില് വിജയിച്ച ബദല് തുടരുന്നതിന് ജനങ്ങള് വോട്ട് ചെയ്യും. സംസ്ഥാന സര്ക്കാരിന് അനുകൂലമാണ് ജനവികാരമെന്നും മുഖ്യമന്ത്രി പറഞ്ഞു.
https://www.facebook.com/Malayalivartha
