തിരുവനന്തപുരത്ത് ആരു ജയിക്കും? തരൂര്‍ മണ്ഡലം നിലനിര്‍ത്തുമോ, അതോ കുമ്മനത്തിലൂടെ ബിജെപി കേരളത്തില്‍ ആദ്യമായി ലോക്‌സഭയില്‍ അക്കൗണ്ട് തുറക്കുമോ, സിപിഎം മണ്ഡലം പിടിക്കുമോ- ചോദ്യങ്ങളും വാദപ്രതിവാദങ്ങളും കേന്ദ്രീകരിക്കുന്നത് തിരുവനന്തപുരം മണ്ഡലത്തിലാണ്. സ്വന്തം ജില്ലയിലെ തിരഞ്ഞെടുപ്പ് വിശേഷങ്ങള്‍ക്കൊപ്പം ഓരോ കേരളീയനും ഈ ചോദ്യങ്ങള്‍ ചോദിക്കുന്നതിന് കാരണം ഒന്നു മാത്രം. ബിജെപി ഏറ്റവും കൂടുതല്‍ പ്രതീക്ഷ പുലര്‍ത്തുന്ന മണ്ഡലമാണ് തിരുവനന്തപുരം. ശബരിമലയിലെ യുവതീപ്രവേശ വിഷയം വോട്ടര്‍മാരെ സ്വാധീനിക്കാന്‍ കഴിയുന്ന മണ്ഡലം. രാഷ്ട്രീയ ബോധ്യവും ജാതീയ ഘടകങ്ങളും സ്ഥാനാര്‍ഥി ആരെന്നതുമെല്ലാം മണ്ഡലത്തില്‍ ജയപരാജയ ഘടകങ്ങളാണ്. പ്രവചനങ്ങള്‍ക്കതീതമായ മണ്ഡലമായി തിരുവനന്തപുരത്തെ മാറ്റുന്നതും ഈ ഘടകങ്ങളാണ്.

മുന്നണികളുടെ സ്ഥാനാര്‍ഥികളെല്ലാം പ്രബലരാണ്. യുഡിഎഫിനുവേണ്ടി ശശി തരൂര്‍, എല്‍ഡിഎഫില്‍നിന്ന് സി.ദിവാകരന്‍, ബിജെപിക്കുവേണ്ടി കുമ്മനം രാജശേഖരന്‍. എതിര്‍പാര്‍ട്ടികളില്‍നിന്നുള്ള വോട്ടുചോര്‍ച്ച അനുകൂലമാകുമെന്ന് ഓരോ മുന്നണിയും പ്രതീക്ഷ പുലര്‍ത്തുന്ന മണ്ഡലം കൂടിയാണ് തിരുവനന്തപുരം.

ശശി തരൂരെന്ന സ്ഥാനാര്‍ഥിയാണ് കോണ്‍ഗ്രസിന്റെ ഏറ്റവും വലിയ വിജയ പ്രതീക്ഷ. കേന്ദ്രസര്‍ക്കാരിന്റെ നയങ്ങള്‍ക്കെതിരെ പ്രവര്‍ത്തിക്കാന്‍ ഏറ്റവും അനുയോജ്യനാണ് തരൂരെന്ന പാര്‍ട്ടി വികാരം ജനങ്ങളും ഏറ്റെടുക്കുമെന്നാണ് കണക്കുകൂട്ടല്‍. തുടക്കത്തിലെ ചില പോരായ്മകള്‍ പരിഹരിച്ച് പ്രചാരണ രംഗത്ത് മുന്നേറാന്‍ കഴിഞ്ഞതും പാര്‍ട്ടിയുടെ പ്രതീക്ഷകള്‍ വര്‍ധിപ്പിക്കുന്നു. അവസാന ദിവസത്തെ പ്രചാരണത്തിന് തരൂരിനായി എ.കെ. ആന്റണിയും രമേശ് ചെന്നിത്തലയും ഉമ്മന്‍ചാണ്ടിയുമെല്ലാം രംഗത്തെത്തിയത് പ്രവര്‍ത്തകരുടെ ആവേശം വര്‍ധിപ്പിച്ചിട്ടുണ്ട്. പ്രത്യേകിച്ചു തീരദേശമേഖലകളില്‍.

ബിജെപിയെ ഏറ്റവും ശക്തമായി എതിര്‍ക്കുന്ന ശശി തരൂര്‍ ലോക്‌സഭയിലെത്തണമെന്നു വിശ്വസിക്കുന്ന വലിയൊരു വിഭാഗത്തിലാണ് പാര്‍ട്ടിയുടെ പ്രതീക്ഷ. തീരദേശ മേഖലയിലെ ശക്തമായ വോട്ടു ബാങ്ക് കൂടിയാകുമ്പോള്‍ വിജയം ഉറപ്പാണെന്നു പാര്‍ട്ടി നേതൃത്വം വിശ്വസിക്കുന്നു. ശബരിമല വിഷയത്തില്‍ ബിജെപിയുടെ പൊള്ളയായ വാഗ്ദാനങ്ങളെ തുറന്നുകാട്ടുന്ന തരൂരിന്റെ ഇടപെടലുകള്‍ക്ക് വോട്ടര്‍മാര്‍ക്കിടയില്‍ വലിയ സ്വാധീനമുണ്ടാക്കാന്‍ കഴിഞ്ഞിട്ടുണ്ട്. സമദൂരനിലപാടാണ് എന്‍എസ്എസിന്റേതെങ്കിലും സമുദായ വോട്ടുകള്‍ ലഭിക്കുമെന്നും മുന്നണി കണക്കുകൂട്ടുന്നു.

പാറശാല, കോവളം, നെയ്യാറ്റിന്‍കര മണ്ഡലങ്ങളിലാണ് കഴിഞ്ഞ തവണ തരൂര്‍ ലീഡ് ചെയ്തത്. ഈ മണ്ഡലങ്ങളില്‍ ലീഡ് ഉയരുമെന്നും തിരുവനന്തപുരം നിയമസഭാ മണ്ഡലത്തില്‍ വലിയ മുന്നേറ്റം സാധ്യമാകുമെന്നും നേതാക്കള്‍ പറയുന്നു. കേന്ദ്രത്തിലെ രാഷ്ട്രീയ സാഹചര്യങ്ങളും തരൂരിന് അനുകൂലമാണ്. കഴിഞ്ഞ തവണത്തെ 15,470 എന്ന ഭൂരിപക്ഷം 30,000 കടക്കുമെന്നു പാര്‍ട്ടി നേതൃത്വം പറയുന്നു.

അഴിമതിയുടെ കളങ്കമില്ലാത്ത കുമ്മനം ജയിച്ചാല്‍ കേന്ദ്രമന്ത്രിയെ ലഭിക്കുമെന്നാണ് പ്രചാരണം. ആര്‍എസ്എസ് നേതൃത്വം പ്രചാരണം ഏറ്റെടുത്ത കേരളത്തിലെ ഒരേയൊരു മണ്ഡലവും തിരുവനന്തപുരമാണ്. 25,000 വോട്ടുകളുടെ ഭൂരിപക്ഷമാണ് പാര്‍ട്ടി നേതൃത്വം കണക്കുകൂട്ടുന്നത്.