കോണ്‍ഗ്രസിന് കുത്തിയ വോട്ട് താമരക്ക് പോയതുകൊണ്ട് വീണ്ടും വോട്ട് ചെയ്യാന്‍ സൗകര്യമൊരുക്കണമെന്ന ആവശ്യവുമായി തിരുവനന്തപുരത്തെ വോട്ടര്‍. കോവളം ചൊവ്വ 151ാം ബൂത്തിലെ വോട്ടിങ് യന്ത്രത്തിലാണ് ഗുരുതര പിഴവ് സംഭവിച്ചത്. വീണ്ടും വോട്ട് ചെയ്യാന്‍ അനുവദിക്കണമെന്ന ആവശ്യവുമായി പരാതിക്കാരിയായ സ്ത്രീ രംഗത്തെത്തി.

'രാവിലെ വോട്ട് ചെയ്യാന്‍ പോയത് കോണ്‍ഗ്രസിനാണ്. ഒരുപാട് നേരം പ്രസ് ചെയ്തപ്പോള്‍ മെഷീന്‍ പ്രവര്‍ത്തിച്ചില്ല. അടുത്തിരുന്ന ഓഫീസറോട് പറഞ്ഞപ്പോള്‍ സഹായത്തിന് വന്നു. പ്രസ് ചെയ്തപ്പോള്‍ കോണ്‍ഗ്രസിന് കൊടുത്ത വോട്ട് താമരക്കാണ് പോയത്. വിവിപാറ്റിലും മെഷീനിലും താമരയാണ് തെളിഞ്ഞത്. അത് കൃത്യമായി കണ്ടു. ആദ്യം ഭര്‍ത്താവിനോടാണ് പറഞ്ഞത്. കണ്ട കാര്യമാണ്. എനിക്ക് താമരക്ക് വോട്ടു കൊടുക്കണ്ട. കോണ്‍ഗ്രസിനു തന്നെ കൊടുക്കണം. റീപോളിങ്ങ് വേണം'', യുവതി മനോരമ ന്യൂസിനോട് പറഞ്ഞു. മെഷീന് തകരാര്‍ ഇല്ലെന്നും നിങ്ങള്‍ക്ക് വോട്ടു ചെയ്യാന്‍ അറിയാത്തതു കൊണ്ടുള്ള പ്രശ്‌നമാണെന്നുമാണ് പരാതിപ്പെട്ടപ്പോള്‍ ഉദ്യോഗസ്ഥര്‍ പറഞ്ഞതെന്ന് പരാതിക്കാരുടെ ഭര്‍ത്താവ് മനോരമ ന്യൂസിനോട് പറഞ്ഞു.

വോട്ട് മാറിപ്പോയ 76 പേര്‍ക്കും വീണ്ടും റീപോളിങ്ങിന് അവസരം കൊടുക്കണമെന്ന ആവശ്യവുമായി എല്‍ഡിഎഫും യുഡിഎഫും രംഗത്തെത്തിയിട്ടുണ്ട്.

തിരുവനന്തപുരം പാല്‍കുളങ്ങര യുപി സ്‌കൂളിലെ 37ാം ബൂത്തില്‍ കള്ളവോട്ടെന്ന് ആരോപണം. പൊന്നമ്മാള്‍ ഭഗവതി എന്ന 78 കാരിയാണ് ആരോപണവുമായി എത്തിയിരിക്കുന്നത്. വോട്ടിന് കൈയില്‍ മഷി പുരട്ടിയതിന് ശേഷം വോട്ട് ചെയ്യുന്നത് നിഷേധിച്ചു. മറ്റൊരാള്‍ വോട്ട് ചെയ്‌തെന്ന് ബൂത്ത് ഏജന്‍ുമാര്‍ അറിയിച്ചതിനെ തുടര്‍ന്നാണ് വോട്ട് നിഷേധിച്ചത്.

അതേസമയം കൊല്ലം നഗരത്തിലെ പട്ടത്താനം എസ്എന്‍ഡിപി യുപി സ്‌കൂളില 50 ാം നമ്പര്‍ ബൂത്തില്‍ മഞ്ജു എന്ന യുവതിയുടെ വോട്ട് കള്ളവോട്ടു ചെയ്തു. 7.45 നാണു യുവതി വോട്ടു ചെയ്യാനെത്തിയത്. അതിനു മുന്‍പേ ആരോ വോട്ടു ചെയ്തു. വോട്ടു ചെയ്യണമെന്നു മഞ്ജു നി്ര്‍ബന്ധം പിടിച്ചതിനെതുടര്‍ന്നു ബാലറ്റ് പേപ്പറില്‍ വോട്ടു ചെയ്യാന്‍ സൗകര്യമൊരുക്കി.1ഈ ബൂത്തില്‍ രണ്ടാമതായി വോട്ടു ചെയ്ത യുവതിയാണു കള്ളവോട്ട് ചെയ്തതെന്നു സംശയം. ഇവരെക്കുറിച്ചു പോളിങ് ഏജന്റ് സംശയം പ്രകടിപ്പിച്ചെങ്കിലും ഉദ്യോഗസ്ഥര്‍ വോട്ടു ചെയ്യാന്‍ അനുവദിക്കുകയായിരുന്നു. സംഭവം ഗൗരവമായി കണ്ട് അന്വേഷണം നടത്തുമെന്നു ജില്ലാ കലക്ടര്‍ ഡോ. എസ്. കാര്‍ത്തികേയന്‍. കള്ളവോട്ടു ചെയ്ത യുവതിയെ പൊലീസ് അന്വേഷിക്കുന്നു.
സംസ്ഥാനത്ത് വോട്ടിങ് യന്ത്രങ്ങളെക്കുറിച്ച് വ്യാപകപരാതി. തിരുവനന്തപുരം ചൊവ്വരയില്‍ കൈപ്പത്തിയില്‍ വോട്ട് ചെയ്യുമ്പോള്‍ താമരചിഹ്നം തെളിയുന്നുവെന്ന് പരാതി ഉയര്‍ന്നു. ചേര്‍ത്തലയില്‍ മോക്ക് പോളില്‍ ചെയ്ത വോട്ടെല്ലാം താമരയില്‍ പതിഞ്ഞതും വന്‍ പ്രതിഷേധത്തിന് വഴിവച്ചു. ചൊവ്വരയിലെ പരാതി അടിസ്ഥാനരഹിതമാണെന്നും ബാലറ്റ് യൂണിറ്റ് ജാം ആയതാണെന്നും തിരഞ്ഞെടുപ്പ് കമ്മിഷന്‍ വിശദീകരിച്ചു.

ചൊവ്വര 151ാം ബൂത്തിലാണ് വോട്ട് മാറുന്നുവെന്ന പരാതി ആദ്യം ഉയര്‍ന്നത്. 76 പേര്‍ വോട്ടുചെയ്തശേഷമാണ് പ്രശ്‌നം ശ്രദ്ധയില്‍പ്പെട്ടത്. കൈപ്പത്തിയില്‍ ബട്ടണ്‍ അമര്‍ത്തുമ്പോള്‍ വിവിപാറ്റില്‍ താമര ചിഹ്നം കാണുന്നുവെന്നായിരുന്നു പരാതി. ഇതോടെ യുഡിഎഫ് വന്‍ പ്രതിഷേധമുയര്‍ത്തി.