ലോകശ്രദ്ധ ആകര്‍ഷിക്കുന്ന വയനാട് ലോക്‌സഭാ മണ്ഡലത്തില്‍ ഇത്തവണ വോട്ടുചെയ്യാന്‍ ഇതരസംസ്ഥാനങ്ങളില്‍ പഠിക്കുന്ന ന്യൂജെന്‍ വോട്ടര്‍മാരും, പ്രവാസികളും നാട്ടിലേക്ക് ഒഴുകിയെത്തുന്നു. മുന്‍വര്‍ഷങ്ങളില്‍ കേരളത്തിനു പുറത്ത് താമസിച്ച് ജോലിചെയ്യുന്നവരും വിദ്യാര്‍ഥികളും ഒരു ചെറിയ ശതമാനം മാത്രമെ വോട്ടുചെയ്യാന്‍ എത്തിയിരുന്നുള്ളു. എന്നാല്‍ ഭാവി പ്രധാനമന്ത്രി സ്ഥാനാര്‍ഥിക്ക് വോട്ടുചെയ്യാനുള്ള അവസരം പരമാവധി വിനിയോഗിക്കാനായി നല്ലൊരുശതമാനം വോട്ടര്‍മാര്‍ ഇതിനകം നാട്ടിലെത്തി.

ഈസ്റ്റര്‍ അവധിയോടനുബന്ധിച്ച് രണ്ടുദിവസം അവധിയെടുത്താല്‍ മതിയെന്ന സൗകര്യം പ്രയോജനപ്പെടുത്തിയാണ് ഇവരുടെ വരവ്. മുന്‍ വര്‍ഷങ്ങളെ അപേക്ഷിച്ച് വോട്ടിങ്ങ് ശതമാനം വര്‍ധിക്കുന്നത് ചങ്കിടിപ്പോടെയാണ് ഇടതുപക്ഷം കാണുന്നത്. 2014-ല്‍ 73.26 ആയിരുന്നു വയനാട് മണ്ഡലത്തിലെ വോട്ടിങ്ങ് ശതമാനം. അത് ഇക്കുറി 90-നടുത്ത് എത്തുമെന്നാണ് മണ്ഡലത്തില്‍നിന്ന് ലഭിക്കുന്ന സൂചനകള്‍. മണ്ഡലത്തില്‍നിന്ന് മറ്റിടങ്ങളിലേക്ക് കഴിഞ്ഞ അഞ്ചുവര്‍ഷത്തിനകം വിവാഹം ചെയ്തയച്ച സ്ത്രീകളും ഇത്തവണ വോട്ടുചെയ്യാന്‍ പിതൃഭവനങ്ങളിലെത്തിയിട്ടുണ്ട്

രാഹുല്‍ ഗാന്ധിയെ മനസാ സ്വീകരിച്ചവരാണ് മണ്ഡലത്തിലെ നവ വോട്ടര്‍മാരില്‍ ഭൂരിപക്ഷവും. ഏഴ് നിയമസഭാ മണ്ഡലങ്ങളടങ്ങുന്ന വയനാട്ടില്‍ ഇത്തവണ ആകെയുള്ള 1357819 വോട്ടര്‍മാരില്‍ 110493 പേര്‍ നവ വോട്ടര്‍മാരാണ്. ഇത് ആകെയുള്ള വോട്ടര്‍മാരുടെ എട്ട് ശതമാനത്തിലധികം വരും.നവ വോട്ടര്‍മാരെ നാട്ടിലെത്തിക്കാന്‍ ഇരു മുന്നണികളും സജീവമായി രംഗത്തുണ്ട്. ഇരുകൂട്ടരും ആത്മവിശ്വാസത്തിലാണെങ്കിലും രാഹുല്‍-പ്രിയങ്ക തരംഗം പുതിയ വേട്ടര്‍മാരെയും സ്ത്രീകളേയും വന്‍തോതില്‍ സ്വാധീനിച്ചതായാണ് രാഷ്ട്രീയ നിരീക്ഷണം.