പത്തനംതിട്ട ലോക്‌സഭാ മണ്ഡലത്തില്‍ മുമ്പെങ്ങും കാണാത്ത രീതിയിലുള്ള കനത്ത പോളിംഗ്. ഉച്ചയ്ക്ക് മൂന്ന് മണിയായപ്പോഴേക്കും ഏഴ് നിയമസഭാ മണ്ഡലങ്ങളിലും പോളിംഗ് ഒരു ലക്ഷം വീതം കവിഞ്ഞു. അതോടെ മൂന്ന് മുന്നണികളും വിശ്വാസികളും ആവേശത്തിലായി. മൂന്ന് മുന്നണികളും വിജയം അവകാശപ്പെടുന്നു. അതോടൊപ്പം ഇവരെല്ലാം മുള്‍മുന്നയിലാണ് എന്നതാണ് യാഥാര്‍ത്ഥ്യം. ശബരിമല യുവതീപ്രവേശന വിധിയും അതേ തുടര്‍ന്നുണ്ടായ സമരവുമാണ് മണ്ഡലത്തില്‍ പോളിംഗ് ശതമാനം ഉയര്‍ത്താന്‍ കാരണം. വിശ്വാസികള്‍ക്ക് വേണ്ടി സമരത്തിനിറങ്ങിയ കെ.സുരേന്ദ്രനാണ് ബി.ജെ.പി സ്ഥാനാര്‍ത്ഥി. കൃസ്ത്യന്‍ വോട്ട് 38 ശതമാനവും മുസ്്‌ലിംവോട്ട് 9 ശതമാനവും ബാക്കി ഹിന്ദു വോട്ടുമുള്ള പത്തനംതിട്ടയില്‍ ഇടത് വലത് മുന്നണികള്‍ കൈസ്തവ സ്ഥാനാര്‍ത്ഥികളെയാണ് രംഗത്തിറക്കിയിരിക്കുന്നത്. എന്‍.എസ്.എസിനും കെ.പി.എം.എസിനും നല്ല വോട്ടുണ്ട്. 

നാല് മണിയടുക്കുമ്പോള്‍ പത്തനംതിട്ടയിലെ പോളിംഗ് 70 ശതമാനം കടന്നു. 80 വരെ പോയാലും അതിശയപ്പെടാനില്ല. 2014ല്‍ 65 ശതമാനം പേരാണ് പത്തനംതിട്ട മണ്ഡലത്തില്‍ രേഖപ്പെടുത്തിയത്. അത് സംസ്ഥാനത്തെ തന്നെ ഏറ്റവും കുറഞ്ഞ വോട്ടിംഗ് ശതമാനമായിരുന്നു ഇത്. യു.ഡി.എഫിലെ ആന്റോ ആന്റണിയാണ് കഴിഞ്ഞ തവണ വിജയിച്ചത്. എല്‍.ഡി.എഫ് സ്വതന്ത്രന്‍ ഫീലിപ്പോസ് തോമസ് രണ്ടാംസ്ഥാനത്തെത്തി. ബി.ജെ.പിയിലെ എംടി രമേശ് 1,38,000ത്തോളം വോട്ട് പിടിച്ചു. ഇത്തവണ അതിന്റെ ഇരട്ടി പിടിക്കുമെന്ന് മാത്രമല്ല വിജയിക്കുമെന്ന കണക്കുകൂട്ടലിലാണ് ബി.ജെ.പി. എന്നാല്‍ സിറ്റിംഗ് എം.എല്‍.എ വീണാ ജോര്‍ജ്ജിനെ കളത്തിലിറക്കി ക്രൈസ്തവ വോട്ടുകളും പാര്‍ട്ടി വോട്ടുകളും സമാഹരിച്ച് സീറ്റ് തിരിച്ചെടുക്കാനുള്ള ആത്മവിശ്വാസത്തിലാണ് എല്‍ഡി.എഫ്. എങ്ങനെ കണക്ക് കൂട്ടിയാലും ആയാരം വോട്ടിന്റെയെങ്കിലും ഭൂരിപക്ഷത്തില്‍ ജയിച്ച് കയറാമെന്ന വിശ്വാസത്തിലാണ് യു.ഡി.എഫ്. കാരണം പത്തനംതിട്ട കോണ്‍ഗ്രസിന് ഏറെ വളക്കൂറുള്ള മണ്ണാണ്. 

ശബരിമല വിഷയം തന്നെയാണ് പത്തനംതിട്ടയിലെ പ്രധാന തെരഞ്ഞെടുപ്പ് വിഷയം. ജയപരാജയങ്ങളെ നിര്‍ണയിക്കുന്നതും അത് തന്നെയാണ്. തുടക്കത്തില്‍ ബി.ജെ.പിക്കൊപ്പമെന്ന സൂചന നല്‍കിയ എന്‍.എസ്.എസ് അവസാന നിമിഷം സമദൂരത്തിലേക്ക് പിന്‍മാറി. ക്രൈസ്തവ സഭകളാകട്ടെ ഒന്നും വിട്ട് പറഞ്ഞിട്ടില്ല. പള്ളിക്കേസുകളിലെ കോടതിവിധി നടപ്പാക്കാത്തതിനാല്‍ ഓര്‍ത്തഡോക്‌സ് സഭ സര്‍ക്കാരിനെതിരാണ്. പക്ഷെ, വീണാ ജോര്‍ജ്ജിന് വോട്ട് ചെയ്യരുതെന്ന് അവര്‍ വ്യക്തമാക്കിയിട്ടില്ല. വീണയെ സഭയുടെ മകളായാണ് അവര്‍ കാണുന്നത്. മധ്യതിരുവിതാംകൂറില്‍ ഓര്‍ത്തഡോക്‌സ് സഭയ്ക്ക് ഒന്നരലക്ഷത്തോളം വോട്ടുണ്ട്. അത് പത്തനംതിട്ട, മാവേലിക്കര, കോട്ടയം മണ്ഡലങ്ങളിലായി വ്യാപിച്ച് കിടക്കുന്നു. 

വൈകിട്ട് മൂന്ന് മണിക്ക് പത്തനംതിട്ട മണ്ഡലത്തിലെ വിവിധ മണ്ഡലങ്ങളില്‍ വോട്ടു ചെയ്തവരുടെ എണ്ണം
കാഞ്ഞിരപ്പള്ളി 1,08,800
പൂഞ്ഞാര്‍ 1,07,224 
തിരുവല്ല 1,07,421
റാന്നി 1,07,096
ആറന്മുള 1,25,895
കോന്നി 1,12,040
അടൂര്‍ 1,14,709