അന്തര്‍ സംസ്ഥാന ബസ് സര്‍വീസ് നടത്തുന്ന സുരേഷ് കല്ലട കമ്പനിയുടെ അതിക്രമത്തിന്റെ കൂടുതല്‍ ദൃശ്യങ്ങള്‍ പുറത്ത്. ബസിലെ യാത്രക്കാരായ യുവാക്കളെ കമ്പനിയുടെ ജീവനക്കാര്‍, വൈറ്റില ജംഗ്ഷന് സമീപം നടുറോഡില്‍ മൃഗീയമായി മര്‍ദ്ദിക്കുന്ന ദൃശ്യങ്ങള്‍ ആണ് പുറത്തുവന്നത്. കാലുപിടിച്ച് അപേക്ഷിച്ചിട്ടും അക്രമിസംഘം വെറുതെവിട്ടില്ല. കേടായ ബസിന് പകരം ബസ് ആവശ്യപ്പെട്ട യാത്രക്കാര്‍ക്ക് നേരെയായിരുന്നു ജീവനക്കാരുടെ അതിക്രമം.
കാശുകൊടുത്ത് യാത്രചെയ്യുന്ന മനുഷ്യരെ കൊല്ലാക്കൊല ചെയ്യുന്ന ഗുണ്ടകള്‍ നിയന്ത്രിക്കുന്ന ഈ വാഹനത്തെ മരണവണ്ടിയെന്ന് തന്നെ വിളിക്കേണ്ടിവരും. ഈ മരണവണ്ടിയില്‍ ഇനിയും യാത്രചെയ്യാന്‍ വിധിക്കപ്പെട്ട ഹതഭാഗ്യരുടെ അറിവിലേക്കാണ് ഈ റിപ്പോര്‍ട്ട്.
സ്വന്തം യാത്രക്കാരെ അടിച്ചൊതുക്കുന്ന സുരേഷ് കല്ലട ജീവനക്കാരുടെ ബസിനുള്ളിലെ കയ്യൂക്കിന്റെ ഈ കാഴ്ചകളാണ് ഇത്ര ദിവസവും കേരളം കണ്ടത്. എന്നാല്‍ ഈ ക്രൂരതയുടെ യഥാര്‍ത്ഥരൂപം വ്യക്തമാക്കുന്ന ബസിന് പുറമെ നിന്നുള്ള ദൃശ്യങ്ങളാണ് പുറത്തുവന്നത്. ഈ മര്‍ദനത്തിന് ഒടുവില്‍ എം.സച്ചിന്‍, മുഹമ്മദ് അഷ്‌കര്‍ എന്നീ യുവാക്കളെ ബസില്‍ നിന്ന് വലിച്ചിഴച്ച് പുറത്തിറക്കുന്നത് പുലര്‍ച്ചെ നാലേകാലോടെ. പിന്നെ മുക്കാല്‍ മണിക്കൂറോളം ബസ് ജീവനക്കാരും ഗുണ്ടകളും ചേര്‍ന്നുള്ള തേര്‍വാഴ്ച. സുരേഷ് കല്ലട ഓഫീസ് മുതല്‍ വൈറ്റില ജംഗ്ഷന്‍ വരെയുള്ള ഏതാണ്ട് 500 മീറ്ററോളം യുവാക്കളെ ഓടിച്ചിട്ടടിച്ചു. രക്ഷപെടാന്‍ രണ്ടുപേരും വഴിപിരിഞ്ഞോടി. പക്ഷെ വഴിയില്‍ കുഴഞ്ഞുവീണ സച്ചിനെ വീണ്ടും അക്രമിസംഘം തേടിപ്പിടിച്ചു. അതാണ് ഇക്കാണുന്നത്. തറയില്‍ കുത്തിയിരുന്ന് പലവട്ടം സച്ചിന്‍ കൈകൂപ്പുന്നത് കാണാം. പിന്നെ തല്ലരുതെന്ന് കാല്‍പിടിച്ച് അപേക്ഷിക്കുന്നു, എന്നാല്‍ കരുണയില്ലാതെ അക്രമിസംഘം നിലത്തിട്ട് ചവിട്ടുമ്പോള്‍ തലയിടിച്ച് സച്ചിന്‍ പിന്നിലേക്ക് മറിയുന്നു. ഈ സമയമെല്ലാം അടിക്കാന്‍ പാകത്തില്‍ ബിയര്‍ കുപ്പിയും കയ്യില്‍ തൂക്കിപ്പിടിച്ച് ഒരാള്‍ സ്ഥലത്ത് തന്നെയുണ്ട്.

അഞ്ചു മിനിറ്റോളം ഇങ്ങനെ തുടര്‍ന്ന ശേഷം സ്ഥലത്ത് ക്യാമറകളുണ്ടെന്ന് തിരിച്ചറിഞ്ഞ സംഘം സച്ചിനെ വലിച്ചിഴച്ച് മറ്റെവിടേക്കോ മാറ്റാന്‍ ശ്രമിക്കുന്നു. ഇതിനിടയില്‍ കുതറിയോടാന്‍ ശ്രമിക്കുന്ന സച്ചിനെ വീണ്ടും വരുതിയിലാക്കാന്‍ അക്രമികളിലൊരാള്‍ ശ്രമിക്കുന്നു. കഷ്ടിച്ച് രക്ഷപെട്ട സച്ചിന്‍ ജീവന്‍ കയ്യിലെടുത്ത് പിടിച്ചെന്ന മട്ടില്‍ ദേശീയപാത ഓടിക്കടക്കുന്ന രംഗം നെഞ്ചിടിപ്പോടെയേ കാണാന്‍ കഴിയൂ. ഇക്കഴിഞ്ഞ ദിവസങ്ങളില്‍ കേരളം ഞെട്ടലോടെ ചര്‍ച്ചചെയ്ത ഈ സംഭവങ്ങളുടെ പേരില്‍ ഇതുവരെ പൊലീസ് പിടിയിലായവര്‍ ഇവരാണ്. ആലപ്പുഴ മണ്ണഞ്ചേരിയില്‍ നിന്നുള്ള വിഷ്ണു, കൊല്ലം ശൂരനാടുകാരന്‍ രാജേഷ്, മണ്‍ട്രോതുരുത്തില്‍ നിന്നുള്ള ഗിരിലാല്‍, കോയമ്പത്തൂര്‍കാരന്‍ കുമാര്‍, കാരയ്ക്കല്‍ നിന്നുള്ള അന്‍വറുദീന്‍ തൃശൂര്‍ കൊടകരയില്‍ നിന്നുള്ള ജിതിന്‍, ആറ്റിങ്ങല്‍കാരന്‍ ജയേഷ്. ഇനിയും യാത്രകളില്‍ ഇവരെയെല്ലാം ബസില്‍ കണ്ടുമുട്ടേണ്ടി വരാനിടയുള്ള പ്രേക്ഷകര്‍ ഈ മുഖങ്ങള്‍ ഓര്‍ത്തുവയ്ക്കണം