പ്രധാനമന്ത്രി നരേന്ദ്രമോദി വഴിവിട്ട് റാഫേല് യുദ്ധവിമാനക്കരാര് നല്കിയ അനില് അംബാനിയുടെ കമ്പനിക്ക് തന്നെയാണ് പിണറായി സര്ക്കാര് സംസ്ഥാനത്തെ സര്ക്കാര് ജീവനക്കാരുടെയും പെന്ഷന് കാരുടെയും ആരോഗ്യ ഇന്ഷുറന്സ് പദ്ധതി നടത്തിപ്പ് ഏല്പ്പിച്ചെന്ന് പ്രതിപക്ഷനേതാവ്
പ്രധാനമന്ത്രി നരേന്ദ്രമോദി വഴിവിട്ട് റാഫേല് യുദ്ധവിമാനക്കരാര് നല്കിയ അനില് അംബാനിയുടെ കമ്പനിക്ക് തന്നെയാണ് പിണറായി സര്ക്കാര് സംസ്ഥാനത്തെ സര്ക്കാര് ജീവനക്കാരുടെയും പെന്ഷന് കാരുടെയും ആരോഗ്യ ഇന്ഷുറന്സ് പദ്ധതിയായ മെഡിസെപ്പിന്റെ നടത്തിപ്പ് ഏല്പ്പിച്ചെന്ന് പ്രതിപക്ഷനേതാവ് രമേശ് ചെന്നിത്തല ചൂണ്ടിക്കാട്ടി. ഇത് ജനങ്ങള് പ്രത്യേകം ശ്രദ്ധിക്കണമെന്നും അദ്ദേഹം പറഞ്ഞു. സ്വകാര്യ കുത്തകകള്ക്കെതിരെ ഘോരഘോരം പ്രസംഗിക്കുകയും തരംകിട്ടുമ്പോഴെല്ലാം അവയെ വാരിപ്പുണരുകയും ചെയ്യുന്ന കാപട്യമാണ് ആരോഗ്യ ഇന്ഷ്വറന്സ് കാര്യത്തിലും ഇടത്പക്ഷം കാട്ടിയിരിക്കുന്നത്. മെഡിസെപ്പിന്റെ നടത്തിപ്പ് സ്വകാര്യ കുത്തക കമ്പനിയായ റിലയന്സിനെ ഏല്പിച്ചതിലൂടെ സംസ്ഥാനത്തെ ഇടതു സര്ക്കാര് അതിന്റെ തനിനിറം വീണ്ടും പുറത്ത് കാട്ടിയിരിക്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു.
സംസ്ഥാന സര്ക്കാര് ജീവനക്കാരും പെന്ഷന്കാരുമായി പതിനൊന്നു ലക്ഷത്തോളം പേരാണ് ആരോഗ്യ ഇന്ഷ്വറന്സ് പദ്ധതിയായ മെഡിസെപ്പില് വരിക. ജീവനക്കാരുടെയും പെന്ഷന്കാരുടെയും കുടുംബങ്ങള്ക്ക് വര്ഷം രണ്ടു ലക്ഷം രൂപയുടെ ആരോഗ്യ ഇന്ഷ്വറന്സ് പരിരക്ഷയാണ് ലഭിക്കുക. ഇതിനായി സര്ക്കാര് ജീവനക്കാരും പെന്ഷന്കാരും 250 രൂപ വീതം നല്കണം. ഇത് വഴി വര്ഷം 300 കോടിയിലേറെ രൂപയാണ് റിലയന്സിന്റെ ഇന്ഷ്വറന്സ് കമ്പനിയായ റിലയന്സ് ജനറല് ഇന്ഷ്വറന്സിന്റെ പോക്കറ്റിലെത്തുക. ഏറിയാല് 20%ത്തിന് താഴെ ക്ളെയിം മാത്രമേ സാധാരണ ആരോഗ്യ ഇന്ഷ്വറന്സിലുണ്ടാവാറുള്ളൂ. അങ്ങനെയെങ്കില് കോടികളുടെ ലാഭമാണ് റിലയന്സിന് ലഭിക്കാന് പോകുന്നത്. പൊട്ടിപ്പൊളിഞ്ഞു നില്ക്കുന്ന അനില്അംബാനിയുടെ കമ്പനിയെ സഹായിക്കാന് നരേന്ദ്ര മോദി കാണിച്ച ഉത്സാഹം തന്നെയാണ് ഇത് വഴി സംസ്ഥാനത്തെ ഇടതു സര്ക്കാരും കാണിച്ചിരിക്കുന്നത്.
ഈ കരാര് സംബന്ധിച്ച വിശദാംശം സര്ക്കാര് ഇനിയും പുറത്തു വിടാത്തതും ഈ ഇടപാടിലെ ദുരൂഹത വര്ദ്ധിപ്പിക്കുന്നു. ടെണ്ടര് ക്ഷണിച്ചപ്പോള് ഏറ്റവും കുറഞ്ഞ പ്രീമിയം തുക ക്വാട്ട് ചെയ്തത് റിയയന്സ് ആണെന്നും അതിനാലണ് റിലയന്സിന് കരാര് നല്കിയതെന്നുമാണ് ഇത് സംബന്ധിച്ച ഉത്തരവില് കാണുന്നത്. തിരുവനന്തപുരം വിമാനത്താവള നടത്തിപ്പ് അദാനിക്ക് നല്കിയതും ഇതേ പോലുള്ള ടെണ്ടര് വിളിച്ച് തന്നെയാണ്. അതിനെ നഖശിഖാന്തം എതിര്ക്കുന്ന ഇടതു മുന്നണി സ്വന്തം ഭരണത്തിന് കീഴില് അത് തന്നെ ചെയ്യുന്നത് ഇരട്ടത്താപ്പാണെന്നും ചെന്നിത്തല ചൂണ്ടിക്കാട്ടി.
നേരത്തെ സര്ക്കാര് ജീവനക്കാരുടെ കയ്യില് നിന്ന് പണം വാങ്ങാതെ അവര്ക്ക് പരിധി ഇല്ലാത്ത ചികിത്സാ സഹായം നല്കിയിരുന്നു. ഇപ്പോള് അത് നിര്ത്തിയിട്ടാണ് ജീവനക്കാരില് നിന്ന് വിഹിതം വാങ്ങി അവരുടെ ആരോഗ്യ പരിരക്ഷ കുത്തക കമ്പനിയെ ഏല്പിച്ച് സര്ക്കാര് തടിയൂരുന്നത്. എന്നിട്ട് ഇത് വലിയ ക്ഷേമ പദ്ധതിയാണെന്ന് കൊട്ടിഘോഷിക്കുകയും ചെയ്യുന്നു. എന്തു തരം ക്ഷേമമാണ് സര്ക്കാര് ഇത് വഴി ലക്ഷ്യമാക്കുന്നതെന്ന് വിശദീകരിക്കണം. ഈ കരാറിന്റെ നിബന്ധനകളും വിശദാംശങ്ങളും പൂര്ണ്ണമായി വെളിപ്പെടുത്തണമെന്നും രമേശ് ചെന്നിത്തല ആവശ്യപ്പെട്ടു.
https://www.facebook.com/Malayalivartha
