ഗജരാജന്‍ തെച്ചിക്കോട്ടുകാവ് രാമചന്ദ്രനെ തൃശൂര്‍പൂരത്തിന് എഴുന്നള്ളിക്കണമെന്ന് നടനും എം.പിയുമായ സുരേഷ് ഗോപി. സുരക്ഷാ പ്രശ്‌നം മുന്‍നിറുത്തി തെച്ചിക്കോട്ടുകാവ് രാമചന്ദ്രന് വിലക്കോര്‍പ്പെടുത്തിയ സര്‍ക്കാര്‍ നടപടിക്കെതിരെ ആനപ്രേമികളും ഉടമകളും പ്രക്ഷോഭം തുടരുന്നതിനിടെയാണ് തൃശൂര്‍ മണ്ഡലത്തില്‍ ജനവിധി തേടുന്ന സുരേഷ് ഗോപിയുടെ പ്രതികരണം. തെക്കോട്ടിറക്കത്തിന് തെച്ചിക്കോട്ടു രാമചന്ദ്രനെ കൊണ്ടുവരണമെന്നും, അസംഭവ്യങ്ങളിലേക്ക് കടക്കുമെന്ന് എന്തെങ്കിലും വ്യാകുലതകള്‍ ഉണ്ടെങ്കില്‍ അതിനെല്ലാം വേണ്ട മാര്‍ഗങ്ങള്‍ വേറെ ഒരുപാടുണ്ടെന്നും സുരേഷ് വ്യക്തമാക്കി. ഒരു സ്വകാര്യ ചാനലിന് നല്‍കിയ അഭിമുഖത്തിലായിരുന്നു അദ്ദേഹത്തിന്റെ പ്രതികരണം.

'എന്നോട് ചോദിച്ചാല്‍ ഞാന്‍ പറയും തെക്കോട്ടിറക്കത്തിന് തെച്ചിക്കോട്ടു രാമചന്ദ്രനെ കൊണ്ടുവരണം. അതൊരു വരവാണ് ഒരുരാജാവ് വരുന്നതുപോലെ തന്നെ. ആ കാഴ്‌ച സാധ്യമാക്കണം. വൈകാരികതയ്‌ക്ക് കഠാര വയ്‌ക്കരുത്. രാഷ്‌ട്രീയക്കാര്‍ വച്ചോട്ടെ, ഉദ്യോഗസ്ഥര്‍ അതിന് ചുക്കാന്‍ പിടിക്കരുത്. ഇല്ലെങ്കില്‍ അതിന് ആ താളത്തില്‍ തുള്ളരുത്. വന്നോട്ടെ ഫുള്‍ സെക്യൂരിറ്റി കൊടുക്ക്. മയക്കുവെടി, അതുപോലെ തന്നെ ആനയ്‌ക്ക് അങ്ങനെ എന്തെങ്കിലും വ്യാകുലപ്പെടുന്ന അസംഭവ്യങ്ങളിലേക്ക് കടക്കുമെന്ന് തോന്നിയാല്‍ ആനയെ തളയ്‌ക്കുന്നതിന് ഒരുപാട് മാര്‍ഗങ്ങളുണ്ട്. മൂന്ന് പേരില്‍ കൂടുതല്‍ കൊല്ലാനും ഡൂഡാലോചന നടത്താനും നിന്നവര്‍ നിയമസഭയിലും ലോക്‌സഭയിലുമൊക്കെയുണ്ടെന്ന് സുരേഷ് ഗോപി കൂട്ടിച്ചേര്‍ത്തു'.

അതേസമയം തെച്ചിക്കോട്ടുകാവ് രാമചന്ദ്രന്‍ ആനയുടെ കാര്യത്തില്‍ ഇടപെടില്ലെന്ന് ഹൈക്കോടതി. തീരുമാനമെടുക്കേണ്ടത് കലക്ടര്‍ അധ്യക്ഷനായ സമിതിയാണെന്നും കോടതി വ്യക്തമാക്കി. ഉചിതമായ അധികാരകേന്ദ്രങ്ങളാണ് തീരുമാനമെടുക്കേണ്ടത്. ആനയെ വിലക്കിയ കലക്ടറുടെ തീരുമാനം ചോദ്യംചെയ്തായിരുന്നു ഹര്‍ജി.

കൊമ്പന്‍ തെച്ചിക്കോട്ടുക്കാവ് രാമചന്ദ്രന് വനംവകുപ്പും, ജില്ലാ മോണിറ്ററി കമ്മിറ്റിയും ഏര്‍പ്പെടുത്തിയ നിയന്ത്രണം നിലനില്‍ക്കുന്നുണ്ട്. ഇതു നീക്കണമെന്ന് ആവശ്യപ്പെട്ട് തെച്ചിക്കോട്ടുക്കാവ് ദേവസ്വം ഹൈക്കോടതിയില്‍ നല്‍കിയ ഹര്‍ജിയാണ് പരിഗണിച്ചത്. തെച്ചിക്കോട്ടുകാവ് രാമചന്ദ്രന്‍റെ കാര്യത്തില്‍ അന്തിമതീരുമാനം ഇന്ന് ഉണ്ടാകും എന്നാണ് വിവരം. കലക്ടര്‍ അധ്യക്ഷനായ ജില്ലാതല നിരീക്ഷകസമിതി തീരുമാനമെടുക്കും. ഉച്ചയോടെ സമതിക്ക് നിയമോപദേശം ലഭിക്കുമെന്ന് മന്ത്രി വി.എസ്.സുനില്‍ കുമാര്‍ പറ​ഞ്ഞു.

തൃശൂര്‍ പൂരം ഉള്‍പ്പെടെ ഒരു ഉല്‍സവത്തിനും ആനകളെ നല്‍കില്ലെന്ന കടുത്ത തീരുമാനത്തില്‍ നിന്ന് ആന ഉടമകള്‍ പിന്‍മാറാന്‍ സാധ്യതയുണ്ട്. കാരണം, വനംവകുപ്പ് ഉദ്യോഗസ്ഥരുടെ നിരന്തര പീഢനത്തിന് അറുതി വരുത്താന്‍ ശ്രമിക്കാമെന്ന് സര്‍ക്കാര്‍ ഉറപ്പു നല്‍കിയിട്ടുണ്ട്. മുഖ്യമന്ത്രി പിണറായി വിജയന്‍ തിരിച്ചെത്തിയാല്‍ ഉടന്‍ സമഗ്രമായ ചര്‍ച്ച നടത്താമെന്നാണ് ഉറപ്പ്. ഇതു വിശ്വാസത്തിലെടുത്ത് മുന്നോട്ടു പോകാനാണ് ആന ഉടമകളുടെ നീക്കം.