എന്റെ വട്ടപ്പേര് കീരിക്കാടന് ജോസെന്നാ, സിനിമാക്കാരത് മോഷ്ടിച്ചതാ: ബിജുക്കുട്ടന്
തിരുവനന്തപുരം: ' ചേട്ടാ ചേട്ടനെ കൂട്ടുകാര് കളിയാക്കി വിളിക്കുന്ന പേരെന്താ? ' ' കീരിക്കാടന് ജോസ്, ആ പേര് സിനിമാക്കാര് മോഷ്ടിച്ചതാ' ഉരുളയ്ക്ക് ഉപ്പേരിപോലെ മറുപടി നല്കിക്കൊണ്ടാണ് നടന് ബിജുക്കുട്ടന് അന്താരാഷ്ട്ര ബാല ചലച്ചിത്രമേളയില് മീറ്റ് ദ ആര്ട്ടിസ്റ്റ് പരിപാടിയില് സംസാരിച്ച് തുടങ്ങിയത്. കുട്ടിക്കാലത്തേ സിനിമ ഇഷ്ടമായിരുന്നെങ്കിലും അന്നൊന്നും കാണാനുള്ള സാഹചര്യം ഉണ്ടായിരുന്നില്ല. അതിനാല് സിനിമയില് എത്തുമെന്ന് സ്വപ്നത്തില് പോലും വിചാരിച്ചിരുന്നില്ല. പക്ഷെ, ഞാനെത്തി. അപ്പോള് ഇത്ര ചെറുപ്പത്തിലേ നല്ല സിനിമകള് കാണാനുള്ള ഭാഗ്യം ലഭിച്ച നിങ്ങള്ക്കൊക്കെ എളുപ്പത്തില് സിനിമയെ കുറിച്ച് അറിയാനും പെട്ടെന്ന് സിനിമയില് കയറാനും കഴിയുമെന്നും ബിജുക്കുട്ടന് പറഞ്ഞു.
ഗോദ സിനിമയില് നായിക വാഗ്മിക ഗബ്ബി ബിജുക്കുട്ടനെ മലര്ത്തിയടിക്കുന്ന സീന് അഭിനയിച്ചപ്പോള് പരിക്ക് പറ്റിയോ എന്ന് ഒരു കൊച്ചുകൂട്ടുകാരിക്ക് സംശയം. ആ സീന് എടുത്തപ്പോള് റീ ടേക്ക് ഉണ്ടാകണേ എന്നാണ് പ്രാര്ത്ഥിച്ചത്. കാരണം നായികയാണല്ലോ മലര്ത്തിയടിക്കുന്നത്. പക്ഷെ, ആദ്യ ടേക്കില് തന്നെ ആ സീന് ഒകെയായി. പരിക്ക് പറ്റാതിരിക്കാനുള്ള സുരക്ഷാക്രമീകരണങ്ങളൊക്കെ ഒരുക്കിയിരുന്നെന്നും ബിജുകുട്ടന് പറഞ്ഞു. സിനിമയിലെ അഭിനയവും ജീവിതത്തിലെ അഭിനയവും തമ്മിലുള്ള വ്യത്യാസം എന്താണെന്ന് ഒരു കൊച്ചുകൂട്ടുകാരന് സംശയം, ' സിനിമയില് തന്നെ പാട് പെട്ടാണ് അഭിനയിക്കുന്നത്. അപ്പോ ജീവിതത്തില് എങ്ങനെ അഭിനയിക്കും. അച്ഛനും അമ്മയും ഭാര്യയും മക്കളും കൂട്ടുകാരും എന്നും നമ്മളോടൊപ്പമില്ലേ, അവരുടെ മുന്നില് എങ്ങനെ അഭിനയിക്കാനാകും'
ചടങ്ങില് ശിശുക്ഷേമസമിതി ജനറല് സെക്രട്ടറി എസ്.പി ദീപക് ബിജുകുട്ടന് ഉപഹാരം നല്കി. സമിതി വൈസ്പ്രസിഡന്റ് അഴീക്കോടന് ചന്ദ്രന്, എക്സിക്യൂട്ടിവ് അംഗം പശുപതി, ജോയിന്റ് സെക്രട്ടറി ഭാരതി എന്നിവര് പങ്കെടുത്തു.
https://www.facebook.com/Malayalivartha
