കെ. മുരളീധരന്‍ മത്സരിച്ച് ജയിച്ച വട്ടിയൂര്‍ക്കാവ് മണ്ഡലത്തില്‍ വരുന്ന നിയമസഭാ തെരഞ്ഞെടുപ്പില്‍ സുരേഷ്‌ഗോപി ബിജെപി സ്ഥാനാര്‍ത്ഥിയാവും. തിരുവനന്തപുരം എം.പി ശശിതരൂരിനെ ലോകസഭയില്‍ നിന്നും രാജി വയ്പിച്ച് നേമത്ത് സ്ഥാനാര്‍ത്ഥിയാക്കാന്‍ കോണ്‍ഗ്രസും ആലോചിക്കുന്നു. സമൂലമായ രാഷ്ട്രീയമാറ്റങ്ങളാണ് കോണ്‍ഗ്രസും ബിജെപിയും സംസ്ഥാനത്ത് ലക്ഷ്യമിടുന്നത്.
സുരേഷ്‌ഗോപി ബിജെപി സ്ഥാനാര്‍ത്ഥിയാവുമെന്ന കാര്യം മാസങ്ങള്‍ക്കുമുമ്പേ ഉറപ്പായിരുന്നു. നിങ്ങള്‍ക്കുമാകാം കോടീശ്വരന്‍ എന്ന പരമ്പര വീണ്ടും ആരംഭിച്ചത് സുരേഷിന്റെ ഇമേജ് വര്‍ദ്ധിപ്പിക്കാന്‍ വേണ്ടിയാണ്. ഏഷ്യാനെറ്റിന്റെ ഉന്നതതലങ്ങളില്‍ നിന്നും തീരുമാനമായിരുന്നു ഇത്. ഏഷ്യാനെറ്റ് ഉടമ രാജീവ് ചന്ദ്രശേഖര്‍ നരേന്ദ്രമോഡിയുമായി അടുത്ത ബന്ധം പുലര്‍ത്തുന്ന നേതാവാണ്.
മുരളിക്കെതിരെ സുരേഷ്‌ഗോപിയെ രംഗത്തിറക്കാന്‍ ബിജെപി തയ്യാറാകുന്നത് നായര്‍ വോട്ടുകളുടെ കേന്ദ്രീകരണം ലക്ഷ്യമിട്ടാണ്. കൊല്ലത്തുകാരനായ സുരേഷ്‌ഗോപിക്ക് എന്‍എസ്എസ്സുമായി അടുത്ത ബന്ധമുണ്ട്. മണ്ഡലത്തിലെ നായര്‍ വോട്ടുകള്‍ തനിക്ക് അനുകൂലമാകുമെന്ന് താരം പ്രതീക്ഷിക്കുന്നു. മാത്രവുമല്ല കോടീശ്വരന്‍ പരിപാടിയിലൂടെ യുവതലമുറയ്ക്ക് തന്നോട് താത്പര്യം വര്‍ധിക്കുന്നുണ്ടെന്നും സുരേഷിനറിയാം. ഗണേഷ്‌കുമാര്‍ ജയിക്കുകയും മന്ത്രിയാവുകയും ചെയ്ത സംസ്ഥാനത്ത് സുരേഷിന്റെ തോല്‍വി നമുക്ക് പ്രവചിക്കാനാവില്ല.

എന്നാല്‍ വട്ടിയൂര്‍ക്കാവ് മണ്ഡലത്തില്‍ തന്നെ വേണോ എന്നു ചോദിക്കുന്നവരുണ്ട്.
വിഴിഞ്ഞം തുറമുഖത്തിനുവേണ്ടി സുരേഷ്‌ഗോപി നടത്തുന്ന പ്രസ്താവനകള്‍ വിവാദമുണ്ടാക്കിയെങ്കിലും രാഷ്ട്രീയത്തിലേക്കുള്ള ലോഞ്ചിംഗിന് അതേറെ സഹായിച്ചിട്ടുണ്ട്. വിഴിഞ്ഞം തുറമുഖത്തിനുവേണ്ടി ഹിന്ദുക്കള്‍ ഒരുമിക്കണമെന്നാണ് സുരേഷ് പറഞ്ഞത്. പ്രസ്താവന കേട്ട പലരും വികടത്തരം എന്നു പ്രതികരിച്ചെങ്കിലും കേരളത്തില്‍ രൂഢമൂലമായി മാറി കൊണ്ടിരിക്കുന്ന ഹിന്ദു വോട്ട് ബാങ്കിനെ ഉണര്‍ത്താന്‍ ഇതു സഹായകമാകും. ശാസ്തമംഗലത്താണ് സുരേഷിന്റെ വീട്. ഇത് വട്ടിയൂര്‍ക്കാവ് മണ്ഡലത്തിലാണ്.

അതേസമയം ശശിതരൂരിനെ ശിവന്‍കുട്ടിക്കെതിരെ രംഗത്തിറക്കിയാല്‍ വിജയം നേടാനാവുമെന്നാണ് കോണ്‍ഗ്രസിന്റെ പ്രസ്താവന. സുനന്ദ കേസില്‍ പ്രതിയാകും മുമ്പ് തന്നെ തരൂരിനെ രാജി വയ്പ്പിക്കാനാണ് കോണ്‍ഗ്രസ് ശ്രമിക്കുന്നത്. തരൂര്‍ രാഷ്ട്രീയം വിട്ടാല്‍ തത്കാലം രക്ഷപ്പെടുമെന്ന് കോണ്‍ഗ്രസ് കരുതുന്നു. നേമം മണ്ഡലത്തിലും നായര്‍ വോട്ടുകളുടെ കേന്ദ്രീകരണമുണ്ട്. മാത്രവുമല്ല എഴുത്തിലും വായനയിലും തത്പരരായ ബുദ്ധിജീവികള്‍ ഏറെയുമുള്ള മണ്ഡലമാണ് നേമം. തരൂര്‍ ചില വികസന പ്രവര്‍ത്തനങ്ങള്‍ നേമത്തിനുവേണ്ടി ചെയ്തിട്ടുമുണ്ട്. സുനന്ദ കേസ് സജീവമാണെങ്കിലും തരൂരിനുള്ള ജനപ്രീതി കുറഞ്ഞിട്ടില്ലെന്നു തന്നെയാണ് കോണ്‍ഗ്രസ് നേതൃത്വം കരുതുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha