കിളിരൂര്, കവിയൂര് പീഡനം, പോള് മുത്തൂറ്റ് വധം, മെര്ക്കിസ്റ്റണ് ഭൂമി ഇടപാട്, ടോട്ടല് ഫോര് യു തട്ടിപ്പ്, അറബിയെ പറ്റിക്കല്, വിവാഹ വാഗ്ദാനം നല്കി ലൈംഗിക ചൂഷണം, ബിനീഷും ബിനോയിയും തകര്ക്കുന്നു
കിളിരൂര്, കവിയൂര് പീഡനം, പോള് മുത്തൂറ്റ് വധം, മെര്ക്കിസ്റ്റണ് ഭൂമി ഇടപാട്, ടോട്ടല് ഫോര് യു തട്ടിപ്പ്, അറബിയെ പറ്റിക്കല്, വിവാഹ വാഗ്ദാനം നല്കി ലൈംഗിക ചൂഷണം അങ്ങനെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ രണ്ട് ആണ്മക്കളും പലവിധ ക്രിമിനല് കേസുകളിലും ആരോപണവിധേയരായിട്ടും രാഷ്ട്രീയ സ്വാധീനം ഉപയോഗിച്ച് രക്ഷപെടുകയാണെന്ന് ആക്ഷേപം. എസ്.എഫ്.ഐയില് ഉണ്ടായിരുന്നപ്പോള് ബിനീഷ് കോടിയേരിക്കെതിരെ രാഷ്ട്രീയ കേസുകള് ഉണ്ടായിട്ടുണ്ട്. എന്നാല് കിളിരൂര് കേസാണ് വിവാദമായത്. അതില് കോടിയേരിയുടെ മക്കള്ക്ക് പങ്കുണ്ടെന്ന് വ്യാപക ആരോപണം ഉയര്ന്നിരുന്നു. ഇരയായ ശാരിയെ കാണാന് എത്തിയ വി.ഐ.പിയോട് ഇവരുടെ പേര് പറഞ്ഞെന്നായിരുന്നു പ്രധാന വിവാദം. ഇക്കാര്യം സന്ദീപ് വാര്യരും ചൂണ്ടിക്കാട്ടുന്നു. കവിയൂര്ക്കേസിലും കോടിയേരിയുടെ മക്കളുടെ പേര് ഉര്ന്ന് വന്നിരുന്നു.
വ്യവസായി പോള് മുത്തൂറ്റ് വധക്കേസില് ബിനീഷ് കോടിയേരിക്ക് പങ്കുണ്ടെന്ന് ആക്ഷേപം ഉയര്ന്നിരുന്നു. സംഭവം നടക്കുമ്പോള് കോടിയേരി ബാലകൃഷ്ണനായിരുന്നു ആഭ്യന്തരമന്ത്രി. അതിനാല് രാഷ്ട്രീയമായും അല്ലാതെയും അദ്ദേഹം പ്രതിസന്ധിയിലായി. അവസാനം സി.ബി.ഐ ആ കേസ് ഏറ്റെടുത്തു. സംസ്ഥാന പൊലീസ് കണ്ടെത്തിയത് പോലെ, പെട്ടെന്നുണ്ടായ പ്രകോപനത്തെ തുടര്ന്നുണ്ടായ കൊലപാതകമാണെന്ന് സി.ബി.ഐയും കണ്ടെത്തി. അതോടെയാണ് പ്രശ്നം കെട്ടടങ്ങിയത്.
തിരുവനന്തപുരം പൊന്മുടിയിലെ മെര്ക്കിസ്റ്റണ് ഭൂമി ഇടപാടില് ബിനീഷ് കോടിയേരിക്ക് പങ്കുണ്ടെന്ന വാര്ത്തകള് വി.എസ് സര്ക്കാരിന്റെ കാലത്ത് പുറത്ത് വന്നിരുന്നു. അതിന് ശേഷമാണ് ബിനീഷ് കോടിയേരിയുടെ കല്യാണം നടന്നത്. വിവാഹ സല്ക്കാരം നടത്തിയത് മെര്ക്കിസ്റ്റണ് ഭൂമി വാങ്ങിയ വ്യവസായി സേവി മനോമാത്യു ആണെന്ന് അന്നത്തെ യുവമോര്ച്ച സംസ്ഥാന അധ്യക്ഷന് കെ.സുരേന്ദ്രന് ആരോപിച്ചിരുന്നു.
കോടിയേരിയുടെ രണ്ട് മക്കള്ക്കുമെതിരെ നിരന്തരം ആരോപണങ്ങള് ഉയരുന്നുണ്ട്. അതില് എന്തെങ്കിലും വസ്തുതയുണ്ടെന്ന് ജനം വിശ്വസിച്ചാല് തെറ്റില്ലെന്നും സന്ദീപ് വാര്യര് പറഞ്ഞു. മാഫിയ പോലെയാണ് ബിനീഷും ബിനോയിയും പ്രവര്ത്തിക്കുന്നതെന്നും അദ്ദേഹം ആരോപിച്ചു. ടോട്ടല് ഫോര് യു തട്ടിപ്പ് സംസ്ഥാനം കണ്ട ഏറ്റവും വലിയ നിക്ഷേപക തട്ടിപ്പുകളിലൊന്നാണ്. ശബരിനാഥന് എന്ന യുവാവിനെ മുന് നിര്ത്തി ബിനീഷ് കോടിയേരിയാണ് ഇതിന് ചുക്കാന് പിടിച്ചതെന്ന് വ്യാപകമായ ആരോപണം ഉയര്ന്നിരുന്നു. ആഭ്യന്തരമന്ത്രിയായിരുന്ന കോടിയേരി ഇടപെട്ടാണ് അതില് നിന്ന് ബിനീഷിനെ ഒഴിവാക്കിയതെന്നും സന്ദീപ് വാര്യര് ആരോപിക്കുന്നു. നടന് ദിലീപ് നടിയെ ആക്രമിച്ച കേസില് അറസ്റ്റിലായപ്പോള് ബിനീഷുമായുള്ള തര്ക്കത്തെ തുടര്ന്ന് പക വീട്ടുകയാണെന്ന് ഭാര്യ കാവ്യാമാധവന് ആരോപിച്ചിരുന്നു.
യു.എ.ഇ പൗരനായ മര്സൂഖിയുടെ കയ്യില് നിന്നും 13 കോടി വാങ്ങിയ ശേഷം മുങ്ങിയ ബിനോയി കോടിയേരിക്ക് ആദ്യം യാത്രാ വിലക്കുണ്ടായിരുന്നു. അതിന് ശേഷമാണ് മര്സൂഖി കേരളത്തിലെത്തിയത്. ആദ്യം പരാതി നിഷേധിച്ച ബിനോയി പിന്നീട് മുഴുവന് പണവും നല്കി കേസ് ഒത്ത് തീര്പ്പാക്കുകയായിരുന്നു. എന്നാല് ഈ പണം എന്ത് ബിസിനസ്സിനാണ് കടം വാങ്ങിയതെന്നും എങ്ങനെയാണ് തിരികെ നല്കിയതെന്നും വ്യക്തമാക്കാന് ബിനോയിയോ, കോടിയേരിയോ തയ്യാറായില്ല. ബിനോയി ദുബായില് ഡാന്സ് ബാര് നടത്തിയിരുന്നെന്ന് വ്യാപക പ്രചാരണം ഉയര്ന്നിരുന്നു. അത് ശരിവയ്ക്കുന്നതാണ് പുതിയ ആരോപണങ്ങള്. എന്തായാലും സെക്രട്ടറിയുടെ മക്കളെ നിലയ്ക്ക് നിര്ത്തണമെന്ന് പാര്ട്ടിക്ക് അകത്ത് തന്നെയാണ് ഏറ്റവും കൂടുതല് പ്രതിഷേധം ഉയര്ന്നിരിക്കുന്നത്.
https://www.facebook.com/Malayalivartha