ശബരിമല വിധി നടപ്പിലാക്കാന്‍ അരയും തലയും മുറുക്കി ഇറങ്ങിയവര്‍ ഇപ്പോള്‍ ഉറക്കത്തിലാണെന്ന് ബാസേലിയോസ് പൗലോസ് ദ്വിതീയന്‍ കാതോലിക്കാ ബാവ രംഗത്തെത്തിയതോടെ യഥാര്‍ത്ഥത്തില്‍ ജയിച്ചത് ശബരിമല വിശ്വാസികളാണ്. ശബരിമലയില്‍ സര്‍ക്കാരും പാര്‍ട്ടിയും ഒന്നും ചെയ്തില്ലെന്ന് പറയുന്ന സിപിഎമ്മിനും നേതാക്കള്‍ക്കും ഏറ്റ കനത്ത തിരിച്ചടിയാണ് ബാബയുടെ നിലപാട്. കഴിഞ്ഞ തെരഞ്ഞെടുപ്പ് പരാജയത്തോടെ നഷ്ടപ്പെട്ട ഭക്തരെ തിരികെ കൊണ്ടു വരാനാണ് പാര്‍ട്ടി തീരുമാനം. എന്നാല്‍ ഇപ്പോള്‍ കുഴഞ്ഞ് മറിയുകയാണ്. ബാബയുടെ അഭിപ്രായത്തോടെ വീണ്ടും സിപിഎം പ്രിരോധത്തിലാണ്. മാത്രമല്ല ന്യൂനപക്ഷങ്ങളും അകലുന്ന മട്ടാണ്. അതിന് പിന്നാലെ ശബരിമലയില്‍ നിയമമില്ലെന്ന് കേന്ദ്രവും വ്യക്തമാക്കിയിട്ടുണ്ട്. ഇതോടെ വരുന്ന ഉപ തെരഞ്ഞെടുപ്പം കീറാമുട്ടിയായി. 

ശബരിമല വിധി നടപ്പിലാക്കാന്‍ അരയും തലയും മുറുക്കി ഇറങ്ങിയവര്‍ ഇപ്പോള്‍ ഉറക്കത്തിലാണെന്നും കോടതി വിധി ബാധകമല്ലെന്ന് പറയുന്ന സര്‍ക്കാരാണ് ഇപ്പോഴുള്ളതെന്നാണ് കത്തോലിക്കാ ബാവ ആരോപിച്ചത്. പരുമലയില്‍ നടന്ന സഭാ പരിപാടിയില്‍ സംസാരിക്കവെയായിരുന്നു അദ്ദേഹത്തിന്റെ പരാമര്‍ശം.

ഉറങ്ങുന്നവരെ നമുക്ക് വിളിച്ചുണര്‍ത്താം. ഉറക്കം നടിക്കുന്നവരെ വിളിച്ചുണര്‍ത്താന്‍ ഒരിക്കലും സാധിക്കില്ല. ഞെരങ്ങിയും മൂളിയും ഇരിക്കുക മാത്രമേ സാധിക്കുകയുള്ളു. ഈ രീതിയില്‍ മുന്നോട്ട് പോകാന്‍ സാധിക്കില്ല. യാക്കോബായ സഭയിലെ 80 ശതമാനം ആളുകളും സമാധാനം ആഗ്രഹിക്കുന്നവരാണ്. നീതിക്കെതിരായി ഒരു സര്‍ക്കാര്‍ ഒത്താശ ചെയ്യണമെങ്കില്‍ അതിന് പിന്നില്‍ എന്താണെന്ന് എല്ലാവര്‍ക്കും അറിയാമെന്നും കാതോലിക്കാ ബാവ കുറ്റപ്പെടുത്തി. കോടതി വിധി നടപ്പാക്കുന്നതുമായി ബന്ധപ്പെട്ട് സര്‍ക്കാരിന്റെ നിസംഗതയെ സുപ്രീം കോടതി കഴിഞ്ഞ ദിവസം വിമര്‍ശിച്ചിരുന്നു.

അതിനിടെ ശബരിമലയില്‍ നിയമമില്ലെന്ന് കേന്ദ്രം വ്യക്തമാക്കിയിട്ടുണ്ട്. ഇതും കേരളത്തില്‍ ചര്‍ച്ചയാകുകയാണ്. ലോകസ്ഭയില്‍ ശശി തരൂര്‍ എംപിയുടെ ചോദ്യത്തിനു മറുപടി നല്‍കവെയാണ് കേന്ദ്രമന്ത്രി രവിശങ്കര്‍ പ്രസാദ് കേന്ദ്രസര്‍ക്കാരിന്റെ നിലപാട് വ്യക്തമാക്കിയത്. ശബരിമല യുവതീ പ്രവേശന വിഷയത്തില്‍ കേന്ദ്രമന്ത്രി രവിശങ്കര്‍ പ്രസാദിനെ പിന്തുണച്ച് ബി.ജെ.പി സംസ്ഥാന അധ്യക്ഷന്‍ പി.എസ് ശ്രീധരന്‍ പിള്ളയും രംഗത്തെത്തി. സുപ്രീം കോടതി വിധി മറികടക്കുന്നതിന് കേന്ദ്രം ഇപ്പോള്‍ നിയമ നിര്‍മ്മാണത്തിനില്ലെന്ന് ലോക്‌സഭയില്‍ കേന്ദ്രമന്ത്രി രവിശങ്കര്‍ പ്രസാദ് പറഞ്ഞിരുന്നു. ഇതിനെ പിന്തുണച്ചാണ് ശ്രീധരന്‍പിള്ള രംഗത്തെത്തിയത്. 

കേന്ദ്രമന്ത്രിയുടെ വാക്കുകള്‍ നിയമാനുസൃതമാണ്. ഉത്തരവാദിത്തമുള്ള ഒരു മന്ത്രിക്ക് അങ്ങനെമാത്രമേ പറയാനാകൂ. കോടതിയുടെ പരിഗണനയിലുള്ള ഒരു കാര്യത്തില്‍ ഇടപെടുന്നത് കോടതിയലക്ഷ്യമെന്ന് കരുതിയാണ് അദ്ദേഹം അങ്ങനെ പറഞ്ഞതെന്നാണ് ഞാന്‍ കരുതുന്നത്' ശ്രീധരന്‍ പിള്ള പറഞ്ഞു. 

കേരള സര്‍ക്കാര്‍ ശബരിമലയെ സ്ത്രീകളെ കൊണ്ടുപോകില്ലെന്ന നിലപാട് ഇപ്പോള്‍ എടുത്തിട്ടുണ്ട്. ഇതോടെ വാദങ്ങള്‍ അവസാനിച്ചു. സമരങ്ങള്‍ക്കുള്ള സാഹചര്യം ഇല്ലാതായെന്നും അദ്ദേഹം പറഞ്ഞു. ശബരിമല വിധിക്കെതിരെ കേന്ദ്ര സര്‍ക്കാര്‍ ഓര്‍ഡിനന്‍സ് കൊണ്ടുവരാന്‍ മടികാണിക്കുന്നുവെന്ന വാദം അജ്ഞത കൊണ്ടുള്ളതാണെന്നും ശ്രധരന്‍ പിള്ള പറഞ്ഞു. 

അതേസമയം ശബരിമല വിഷയത്തില്‍ സര്‍ക്കാര്‍ നിയമം കൊണ്ടുവരണമെന്ന് മുന്‍ ഡി.ജി.പി ടി.പി സെന്‍കുമാര്‍ ആവശ്യപ്പെട്ടു. വിഷയം കോടതിയില്‍ ആയതിനാലാണ് നിയമമന്ത്രി അങ്ങനെ പറഞ്ഞത്. പാര്‍ലമെന്റിന് നിയമം ഉണ്ടാക്കാനാകും. ഇത്തരത്തില്‍ എത്രയോ നിയമങ്ങള്‍ ഉണ്ടാക്കിയിട്ടുണ്ടെന്നും അദ്ദേഹം പറഞ്ഞു. എന്തായാലും വരുന്ന സീസണിലും ശബരിമല തന്നെ ഉയരുമെന്ന് ഇതോടെ ഉറപ്പായിരിക്കുകയാണ്.