സ്വന്തക്കാരെ രക്ഷിക്കാനുള്ള പിണറായി പൊലീസിന്റെ നീക്കങ്ങള്‍ ഒന്നൊന്നായി പാളുന്നു... ഏറ്റവും അവസാനം ഇടുക്കി കൊട്ടക്കമ്പൂര്‍ ഭൂമി ഇടപാടില്‍ മുന്‍ എം.പി ജോയിസ് ജോര്‍ജ്ജിനെ കുറ്റവിമുക്തനാക്കിയ പൊലീസ് റിപ്പോര്‍ട്ട് കോടതി തള്ളി. വീണ്ടും അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ തൊടുപുഴ കോടതി ഉത്തരവിട്ടു. ഇടുക്കി വട്ടവട പഞ്ചായത്തിലെ കൊട്ടക്കമ്പൂരില്‍ ജോയ്‌സ് ജോര്‍ജും കുടുംബാംഗങ്ങളും കൈവശംവച്ചിരുന്ന ഭൂമിയുടെ പട്ടയം മുമ്പ് റദ്ദാക്കിയിരുന്നു. 20 ഏക്കര്‍ ഭൂമിയുടെ ഉടമസ്ഥാവകാശമാണ് ദേവികുളം സബ് കളക്ടര്‍ റദ്ദാക്കിയിരുന്നത്. സര്‍ക്കാരിന്റെ തരിശുഭൂമിയാണെന്ന് കണ്ടെത്തിയതിനെ തുടര്‍ന്നായിരുന്നു നടപടി. കേസ് അന്വേഷിക്കാന്‍ മതിയായ രേഖകളില്ലെന്നും ജോയ്‌സിന്റ പിതാവ് പണം നല്‍കിയാണ് ഭൂമി വാങ്ങിയതെന്നുമായിരുന്നു അന്വേഷണ മൂന്നാര്‍ ഡിവൈഎസ്പിയുടെ റിപ്പോര്‍ട്ട്. 

പട്ടികജാതിക്കാര്‍ക്ക് വിതരണം ചെയ്ത ഭൂമി അനധികൃതമായി കൈവശം വച്ചെണ് കണ്ടെത്തല്‍. ജോയ്‌സ് ജോര്‍ജിന്റെയും ഭാര്യയുടെയും പേരില്‍ എട്ടേക്കറും ശേഷിക്കുന്ന ഭൂമി ബന്ധുക്കളുടെ പേരിലുമാണ് ഉള്ളത്. 2015ലാണ് ജോയ്‌സ് ജോര്‍ജിനും കുടുംബാംഗങ്ങള്‍ക്കുമെതിരേ ഭൂമി തട്ടിപ്പുമായി ബന്ധപ്പെട്ട് പോലീസ് കേസെടുത്തത്. കൊട്ടക്കമ്പൂരില്‍ തനിക്കും കുടുംബത്തിനും ഭൂമിയുണ്ടെന്ന് നാമനിര്‍ദേശപത്രികയോടൊപ്പം സമര്‍പ്പിച്ച സത്യവാങ്മൂലത്തില്‍ ജോയ്‌സ് അറിയിച്ചിരുന്നു. വ്യാജരേഖ വഴിയാണ് ഇവിടെ ഭൂമി കൈവശപ്പെടുത്തി എന്നതാണ് ജോയ്‌സിനെതിരായ പരാതി. ജോയ്‌സിന്റെ പിതാവ് ഇടുക്കി തടിയമ്പാട് പാലിയത്ത് ജോര്‍ജ്, തമിഴ് വംശജരായ ആറുപേരുടെ കൈവശമിരുന്ന ഭൂമി മുക്ത്യാര്‍ വാങ്ങി ഭാര്യയുടെയും മക്കളുടെയും പേരില്‍ രജിസ്റ്റര്‍ ചെയ്യുകയായിരുന്നെന്നാണ് പരാതിയില്‍ പറയുന്നത്. 

ഭൂമിയുടെ രേഖകള്‍ ഹാജരാക്കണമെന്ന് ആവശ്യപ്പെട്ട് ജോയ്‌സ് ജോര്‍ജ് എംപിയ്ക്ക് ദേവികുളം സബ് കളക്ടര്‍ കഴിഞ്ഞ ഡിസംബറില്‍ നോട്ടീസ് അയച്ചിരുന്നു. ജനുവരി 10ന് നേരിട്ട് ഹാജരായി രേഖകള്‍ സമര്‍പ്പിക്കാനാണ് നിര്‍ദ്ദേശം നല്‍കിയിരുന്നത്. വേണ്ടത്ര വിശദീകരണം തേടാതെ സബ്കളക്ടര്‍ പട്ടയം റദ്ദാക്കിയെന്ന് ഇടുക്കി ജില്ല കളക്ടര്‍ കണ്ടെത്തിയിരുന്നു. അതിന്റെ അടിസ്ഥാനത്തിലാണ് രേഖകള്‍ ഹാജരാക്കാന്‍ കഴിഞ്ഞ വര്‍ഷം ജൂലെയില്‍ സബ്കളക്ടര്‍ ആവശ്യപ്പെട്ടിരുന്നു. 
തുടര്‍ന്ന് ജോയ്‌സ് ലാന്‍ഡ് റവന്യൂ കമ്മീഷണറെ സമീപിച്ചു. അപേക്ഷ ലാന്‍ഡ് റവന്യൂ കമ്മീഷണര്‍ നിരസിച്ചതിനെ തുടര്‍ന്നാണ് ജോയ്‌സിനോട് നേരിട്ട് ഹാജരാകാന്‍ സബ് കളക്ടര്‍ അന്ന് നിര്‍ദ്ദേശിച്ചത്.

ഇതേ തുടര്‍ന്ന് ദേവികുളം അഡീഷണല്‍ മജിസ്‌ട്രേറ്റിന് മുന്നില്‍ ഹാജരാകുന്നതിന് ജോയ്‌സ് ജോര്‍ജ് എംപി ഹൈക്കോടതിയില്‍ നിന്ന് ഒരു മാസത്തെ സാവകാശം വാങ്ങിയിരുന്നു. രേഖകള്‍ ഹാജരാക്കാത്തതില്‍ ദുരൂഹതയുണ്ടെന്ന് അന്നേ ആക്ഷേപം ഉയര്‍ന്നിരുന്നു. അത് ശരിവയ്ക്കുന്നതാണ് ഇന്നത്തെ കോടതി ഉത്തരവ്. ഭൂമി ഇടപാടില്‍ സി.ബി.ഐ അന്വേഷണം ആവശ്യപ്പെട്ട് കോണ്‍ഗ്രസ് മുകേഷ് മോഹനും എന്‍.കെ ബിജുവും ഹൈക്കോടതിയില്‍ ഹര്‍ജി നല്‍കിയിരുന്നു. എന്നാല്‍ രാഷ്ട്രീയ വൈരത്തിന് കോടതിയെ ഉപയോഗിക്കരുതെന്ന് കോടതി വിമര്‍ശിക്കുകയും ഹര്‍ജി തള്ളുകയുമായിരുന്നു.